2 KORINTUS 12 - BOWOT BOHUA

Pongorinah tutang ponohto ijo tononga Pohotala ahkan Paulus

¹ Puna eam aro utungoh amat botamam. Tahpi ahku kani ka'a monamam hal-hal, ijo Pohotala ngorinahoh ahkak'ku a'ang pongorinah ata'ai a'ang ponopahjah.

² Ahku ngosono ihcobehti Kristen ijo opat bolas toun ijo soun, tonongahtang nokuh unuk ijo pongoisungoh ang soruga. (Ahku eam ta'an inon behtiu oh moro-morong konahtang ata'ai rih tihkas ihco ponopahjah – Pohotala iou ijo kota'an.)

^3-4 Ahku ngulangoh sino hino. Ahku ta'an ijo ulun tuh konahtang nyolong nokuh Pirdaus. (Ahku eam kota'an kuwoh behtiuoh moro-morong konahtang ata'ai orihrih tihkas ihco ponopahjah iou – Pohotala iou ijo kota'an). Ang anan ulun rih ngonih hal-hal, ijo eam duon tonguap bain ulun, tutang eam ka'a tonongaijin ahkan ulun, mangat ngohawotoh.

⁵ Tohou ulun orih ijo kani ahku namamoh, eam tohou arop'ku bongok. Tohou arop'ku, tihkas hal-hal ijo nunjuk kolomu aik'ku orihrih ijo kani ahku namamoh.

⁶ Jahkaoh ahku jolik ka'a monamam angihco, ahku eam kani monjadi panderngahus ijo auh puang; ahku ahkan ngohawot ijo morong. Tahpi ahku nahan arop, mangat eam anai ulun ijo ngohu ahku labih tahkanumba inon ijo jari io nohto ahku nguai, ata'ai ijo jari io ngonihoh ahku nuhtuioh.

⁷ Tahpi mangat ahku a'ai dalou bojuhu, tului topahjah-topahjah ijo luar biasa rih, ahku tononga kolou ihco ponyahkit aang behtik'ku ijo kolou pokahkas Sehtan. Ponyahkit rih tononga ahkan mahcat ahku mangat ahku eam monjadi bojuhu.

⁸ Tolu tikat ahku bodo'a ahkan Tuhan, mangat ponyahkit rih tongahtang tahkan ahku.

⁹ Tahpi Tuhan muhtah, ‘‘Ahku ngasih ihko tutang rih jari sukup ahkan'kam; tului kowasak-Ku, justru paling ba'as amat'kam ang koada'an bolomu.’’ Orih kotuluioh ahku labih sanang namam umba kolomu-kolomu'ku, tului amat ahku bolomu, mahka justru, a'ang ohkot orihrih ahku komo Kristus ngolindung ahku umba koba'as-Oh.

¹⁰ Jadi, ahku jorih umba kolomu-kolomu'ku rih. Ahku ka'a jorih amat bain kotului Kristus ahku tonopitnah, ahku buah kohapit, toduru-duru tutang ahku nyuru kosusah. Tului amat ahku bolomu, mahka ang ohkot orih rih, justru ahku ba'as.

Kihkoh Paulus tohou ulun-ulun Korintus

¹¹ Tu'u ahku jari nguan 'jo kolou ulun uong – tahpi ihkam ijo nguan ahku jari kolouorih. Kotu'uioh ihkam ijo harus monara ahku. Tului oluka ahku eam anai bororima ino-inon, ahku samasino eam kalah toharep ‘‘rasul-rasul’’ ijo luar biasa rih.

¹² Tanda-tanda helan tutang hal-hal luar biasa hawoi gawi-gawi ijo hajo-hajo ius tongorinah honong sabar umba'kam ahkan mbukti ijo ahku ihcobehti rasul.

¹³ Aang hal inon ihkam kurang tonunengoh, tonindung umba ukup-ukup ijo bohkon? Pali-paling tihkas a'ang hal tuh; ijo ahku eam monyusah ihkam ahkan bolanjak'ku. Apunrih ahku ngosan kosala'an orih.

¹⁴ Uhuntuh, tuh jari ahkan kotolu tikatoh ahku sodia ahkan masap ihkam. Tutang ahku eam kani monyusah ihkam, tului ijo ahku jolik eam inon ijo ihkam tepuioh, molekan behtin'kam. Tului eam anak-inyam ijo harus ngurah bolanja ahkan ulun okooh, tahpi ulun okooh ijo harus ngurah bolanja ahkan pombolum anak-anakoh.

¹⁵ Tului orih, hawoi sanang ahtoi'ku rela moporahpah kokaro-karonoh ahkan'kam, malahan arop'ku bongok ka. Amat ahku kodorih ngasi ihkam, kuwohrih pahtut ihkam kurang ngasi ahku?

¹⁶ Nah, ihkam satuju ijo ahku eam pu'u nyusah ihkam. Tahpi anai ijo nuhtui ijo ahku tuh ulun bokolilit, ijo ahku dahpot utung tahkan ihkam tului tipu daya'ku.

¹⁷ Amoh tau! Kuwohkah nguha ulun-ulun ijo ahku nyuhuoh, nokuh ihkam rih ngoraut utung tahkan ihkam?

¹⁸ Ahku jari nyuhu Titus tulak masap ihkam, tutang ahku nyuhu konduang Kristen ijo bohkon rih, tulak homboh umba io. Kuwoh Titus ngomin utung tahkan ihkam? Tahpi ihkai boduo bogawi umba titun ijo sama, tutang monggawioh umba cara-cara ijo sama!

¹⁹ Dahpot jadi ihkam ngohu ihkai kotahin tuh, rahat bousaha mbela arop toharep ihkam? Ihkam koliru samasino! Pohotala ngota'an ijo paring ijo ihkai nuhtui orih anairih numbun kohondak Kristus. Tutang paring ijo ihkai nguai anairih ahkan mangun pombolum homboruan'kam.

²⁰ Ahku kowatir ijo aang ohkot ahku masap ihkam noin, ahku nyombang ihkam eam kolou inon ijo ahku harapoh, tutang ihkam ka ahkan nyombang ahku eam kolou ijo ihkam harapoh. Ara-ara noin anai ijo hokolahi, hiri ahtoi, bolasut ahtoi, gunan ahkai bongoi, pinah-mopitnah, hasut-mohasut, bojuhu tutang monderoh.

²¹ Ahku mihkoh amat-amat aang ohkot ahku lombut noin Pohotala ahkan porandah ahku ang toharep'kam, tutang ahku ahkan nangih tului aro, ang louk ihkam ijo bodusa lomoi, eam hubah tutang eam tondo nguan gawin-gawin iro ijo kihal, kojilok tutang eam pantas.