2 KORINTUS 11 - BOWOT BOHUA

Paulus tutang rasul-rasul alik

¹ Nyuhurih ahku nguan kolou uong honjiot. Tou, kowa?

² Ahku rindu umba'kam, kolou Pohotala bongoi ka rindu umba'kam. Ihkam anai kolou ihcobehti anakdara bujang tindih, ihco magun borasih, ijo jari ahku mbowotoh, ahkan tonongawinoh umba ihcobehti bosai, iorih Kristus.

³ Tahpi ahku mihkoh tiruk'kam ahkan togoda, mangat eam tehen hino umba Kristus, sama kolou Hawa lomoi ka'a tonihkos bain alik lohi.

⁴ Kotului kolouoh ihkam sanang iou, norima ulun ijo lombut ahkan'kam, tutang majar tohou Yesus ijo bohkon – eam Yesus ijo ihkai pokosonooh ahkan'kam. Tutang ihkam kani ka'a nyambut roh tutang ‘‘Kabar Hinut’’ ijo samasino hokobohkon umba Roh Pohotala tutang Kabar Hinut ijo pu'u ihkam norimaoh tahkan ihkai.

⁵ Ahku samasino eam komo labih randah tahkan ‘‘rasul-rasul’’ ijo luar biasa rih.

⁶ Mihkoh ahku kurang ahpik bopander, tahpi tohou pongotaan, ahku eam ulun palong. Orih jari ihkai mbuktioh ahkan ihkam luwang kokaro hal.

⁷ Ang ohkot ahku mborihta Kabar Hinut tahkan Pohotala ahkan'kam, ahku eam nyawot ihkam ngupah ahku honjiot ka; tutang honong kodorih ahku nguan arop'ku monjadi randah. Ahku nguan rih unuk ngahtang'kam. Inon orih ihco kosalak'ku toharep ihkam?

⁸ Ang ohkot ahku ngohalu ihkam, ahku duon bohata bain ukup-ukup bohkon. Tou tonohawot ahku morugi ukup-ukup rih mangat tou ndohop ihkam.

⁹ Amat ang ohkot orih ahku tahpas, ahku eam pu'u monyusah ihcobehti ka tahkan ihkam. Paring ijo ahku poruluoh, tonyodia bain konduang-konduang ijo lombut tahkan Makedonia. Ahku monjaga pio-pios mangat ahku eam monyusah ihkam a'ang hal inon ka, tutang ahku ahkan turus monjaga mangat orih tahtap kodorih.

¹⁰ Kotamam'ku tuh eam duon konudap ang umoh ka ka'a, ang hopus tana Akhaya, tului tahkan ajar Kristus ijo tu'u anai aang ahku.

¹¹ Ombai ahku nuhtui kodorih? Inon bain kotului ahku eam mongasih ihkam? Pohotala kota'an ahku mongasih.

¹² Inon ijo ahku nguai huntuh ahkan turus ahku nguai, mangat ‘‘rasul-rasul’’ ijo bohkon rih eam anai sokehta ahkan nama-namam aropoh, tutang nuhtui ijo iro bogawi kolou ihkai.

¹³ Ulun-ulun kolourih, anairih rasul-rasul alik. Iro ponggawi-ponggawi ijo nyoruwa ulun, umba nyamar kolou rasul-rasul Kristus.

¹⁴ Eam helan iro nguan kodorih, tului Sehtan bongoi ka nyoruwa kolou molehkat koloang!

¹⁵ Jadi eam aneh ka'a amat pohalu-pohalu sehtan, nyoruwa kolou pohalu-pohalu, ijo nguan kohondak Pohotala. Laiuoh iro ka'a norima balosoh ijo sopadan umba karon gawin iro.

Kongarot Paulus kolou rasul

¹⁶ Ahku ngulangoh sino hino: A'ai nyiring anai ijo ngohu ahku uong. Tahpi amat ihkam rih ngohu ahku kodorih, nyuhuohrih ahku ijo uong tuh monamam ka'a honjiot.

¹⁷ Pongo tuh, ahkan ahku ngohawot kotamam'ku, tahpi bohkon Tuhan ijo nyuhu ahku ngohawot orih. A'ang hal tuh ahku tu'u-tu'u pander kolou ulun uong.

¹⁸ Puna anai aro ulun ijo monamam hal-hal kolunon, jadi ahku kani botamam-tamam ka'a.

¹⁹ Ihkam hawui sanang ahtoi, bosabar toharep ulun ijo uong, kotului ihkam komo arop kodorih ahpik!

²⁰ Ihkam mohonou ahku kolou ulun mohojihpon ihkam, ata'ai mohamih, tutang ngomin utung tahkan ihkam, ata'ai komo arop labih isung tahkan ihkam, tutang bohanyi napar'kam.

²¹ Ahku mia ngahku, ijo ihkai dalou bolomu, ahkan nguan kolou orih rih. Tahpi inon ijo ulun bohkon bohanyi tamam, ahku bohanyi ka'a! (Ahku bopander kolou ulun uong.)

²² Ulun Ibranikah iro? Ahku ka'a ulun Ibrani! Ulun Israelkah iro? Ahku ka'a ulun Israel! Lihit Abrahamkah iro? Ahku ka kodorih!

²³ Pohalu-pohalu Kristuskah iro? Naingoh kolou ahku ius nihou ahkal, tahpi ahku puna pohalu ijo puna labih morong tahkan iro paringoh! Ahku bogawi labih karas, ahku labih bojoin ponosolong ang luwang sipir, ahku labih aro tonyiksa tutang bojoin nyiring mahtoi.

²⁴ Jari limo tikat ahku tonyiksa bain ulun Yahudi, buah patu ponahcatsapu tolun pulu siou tikat.

²⁵ Tolu tikat ahku ponahcat bain ulun-ulun Romawi; pu'u ka'a ahku tomukah umba bahtu. Tolu tikat ahku buah kahom kapal ang tasik, tutang sino ahku hanyut aang tasik kotahin duo pulu ohpat jam.

²⁶ Aro tikat ahku nguan ponyalan'ku ijo bohaya; tongacam bohaya danum suhu, bohaya ponyilou, bohaya tahkan ulun Yahudi, olu tahkan pihak ulun bohkon Yahudi, bohaya ang luwang lowu, bohaya ang ruar lowu, bohaya ang tasik, tutang bohaya tahkan ulun-ulun ijo ngohawot arop kolou konduang Kristen, podahal bohkon.

²⁷ Ahku ujuh uhat tulang, tutang mongolawan sotongah mahtoi, bojoin eam tiruh, eam kuman, eam ngorih, aro tikat ahku tonotah ang koada'an bolo'u, sorungin kotului kurang hatin, tutang eam aro anai unuk mohcon.

²⁸ Ang bambai paringoh orihrih, nyinong ondou ahku mihkoh ka'a ahkan koada'an paring ukup.

²⁹ Amat anai ijo bolomu, ahku ka umba komo kolomu ka'a. Amat anai ijo botahak ang luwang dusa, ahtoi'ku umba lonyuh.

³⁰ Nah, amat ahku harus monamam angihco mahka ahku namam hal-hal ijo ngorinah kolomuk'ku rih.

³¹ Pohotala, Amai tahkan Tuhan Yesus kota'an, ijo ahku eam bobalik. Tonotara Arai-Oh turus-jahamoh.

³² Kotihka ahku anai ang Damaskus, gubernur ijo kowasa ang anan ang pinda pomoretah Lahca Aretas, nyuhu sorodadu monjaga nyinong bauntukang lowu rih ahkan nawan ahku.

³³ Tahpi umba ihco koranjang ahku tonguluh nokuh pinda, nguha ihco luwang ang dinding kota. Kodorih ahku liwus tahkan longon gubernur rih.