2 KORINTUS 1 - BOWOT BOHUA

¹ Konduang-konduang ukup Pohotala ang Korintus, tutang sohopus ukup ain Pohotala ijo anai ang Akhaya. Ahku, Paulus, rasul Kristus Yesus ijo tonotuot tului kohondak Pohotala, hombo-homboh umba konduang ihto Timoteus,

² bokoharap keleh Pohotala, Amai ihto tutang Tuhan Yesus Kristus nonga borehkat tutang kosanang ahkan ihkam.

Paulus norimakasih ahkan Pohotala

³ Tara ahkan Pohotala, Amai tahkan Tuhan ihto Yesus Kristus. Io Amai ijo paham hinut ahtoioh, tutang Io Pohotala ijo nonga koba'as homboruan ahkan ulun.

⁴ Io ngoba'as homboruan ihkai ang nyinong kosusah ijo ihkai nyuruoh, mangat hapa koba'as rih ijo ihkai norimaoh tahkan Pohotala, ihkai ka dahpot ngoba'as homboruan paring ulun ijo a'ang kosusahan.

⁵ Karot-karot ijo tonyuru bain Kristus, jari aro ihkai nyuruoh ka'a. Tutang nguha Kristus hino, homboruan ihkai mahi-mahi konomba'as.

⁶ Amat ihkai nyuru kosusah, orih anairih ahkan ngoba'as homboruan ihkam, demi solamat'kam. Amat homboruan ihkai tongomba'as, mahka ihkam tahput tongomba'as nyiring ihkam monjadi tabah a'ang koporos-koporos, kolou ijo ihkai ka ngarot ka'a.

⁷ Ihkai toturus jakin tutang eam pu'u bembang tohou Konduang, tului ihkai kota'an ijo ihkam umba ngarot homboh ihkai. Tutang bain tului rih ihkam umba ka'a tongomba'as hombo-homboh ihkai.

⁸ Konduang-konduang! Ihkai kani ihkam ngotaan tohou kohali ijo ihkai nyuruoh ang tana Asia. Kokarot ijo ihkai ngohtui rih dalou bahat mohenyek ihkai, nyiring ihkai eam duon bokoharap hino ahkan bolum,

⁹ anyamoh kolou jari tomosara hukum mahtoi iou. Tahpi hal rih nyolung, mangat ihkai ara bosikuh ang koba'as ihkai bongon, molekan aang Pohotala ijo mombolum ulun mahtoi.

¹⁰ Iorih ijo jari nyolamat ihkai tahkan bohaya popahtoi ijo hajo rih. Tutang Iorih ka'a, ijo ahkan nyolamat ihkai noin, ang ondou-ondou pongohino, kotului umba Io ihkai bokoharap.

¹¹ Ihkai yakin ijo umba do'a-do'a'kam ahkan ihkai, Pohotala ahkan monyolamat ihkai hino tahkan bohaya. Pohotala jorih mborehkat ihkai kolou puhtah ngosan do'a-do'a ahkan ihkai, tutang tului orih aro ulun ahkan ngohawot torimakasih ahkan Pohotala.

Paulus ngubah rancanaoh

¹² Ihkai tamam, tului ahtoi bua ihkai, moyakin ihkai, ijo pombolum ihkai ang kolunon tuh – pahtukoh kohihco ihkai umba Konduang, ius ihkai nihtoioh hawui ihlas, tutang borasih. Ihkai nguan orih rih eam tului kohorahtin ulun, tahpi tului koulih ijo tononga Pohotala.

^13-14 Ijo ihkai nyurat ahkan'kam, iorih tihkas tohou hal-hal ijo tou ihkam mbasaoh tutang horahtioh. Uhuntuh ihkam eam horahti tohou ihkai kourasoh, tahpi ahku harap noin ihkam ahkan tu'u-tu'u horahti ihkai. Honong kodorih, ang ohkot Tuhan Yesus lombut noin, ihkam ahkan tamam ngosan ihkai, numbun ihkai ka'a tamam tohou ihkam.

¹⁵ Tului koyakinan orihrih, mahka ahku aang pahtukoh borocana ahkan masap ihkam, mangat ihkam dahpot borehkat duo tikat.

¹⁶ Ahku nohuang masap ihkam a'ang ponomuoi'ku nokuh Makedonia tutang tondo hino masap ihkam ang ponomuoi'ku buli, mangat ihkam duon dohop ahku noturus ponomuoi'ku nokuh Yudea.

¹⁷ Tahpi ahku ius ngubah niat'ku rih; nah, inon rih ijo korinah ijo tiruk'ku eam dehen? Ohkot nguan rancana, inon ahku nguan rancana numbun konohuang'ku bongok, honjulu nuhtui ‘‘Yo’’ tutang honjulu ‘‘Eam’’?

¹⁸ Aangaran Pohotala ijo dahpot tomorocaya, bowot'ku umba Konduang bohkonlah ‘‘Yo’’ tutang ‘‘Eam’’.

¹⁹ Kotului Yesus Kristus, Anak Pohotala, ijo tomborihta ahkan'kam bain Silas, Timoteus tutang bain ahku bongok, bohkon ulun ‘‘Yo’’ tutang ‘‘Eam’’. Sobalikoh Io monjadi puhtah ‘‘Yo’’, tahkan Pohotala.

²⁰ Tului nguha Io, Pohotala jari nuhtui ‘‘Yo’’ toharep paring bowot-Oh. Hogalang orihrih ihto ngohawot ‘‘Amen’’ ahkan Pohotala kotului Yesus Kristus. Ihkai nguan kodorih mangat Pohotala tonohoromat.

²¹ Pohotala bongoi ijo nguan ihkai, tutang Konduang segah hihco umba Kristus: Iorih ka'a ijo mitih ihto khusus ahkan arop-Oh.

²² Ahkan orih Pohotala jari monsah ihto monjadi Aiou-Oh, tutang nonga Roh Aiu ang luwang ahtoi ihto kolou jaminan, ijo Io ahkan nonga ahkan ihto paring ijo tonobowot-Oh.

²³ Pohotala saksi aik'ku – tului Io taan usin ahtoi aik'ku – ijo ahku eam jadi tulak nokuh Korintus, kotului ahku eam kani nguan ahtoi'kam sedih.

²⁴ Ahku eam hojojuan ihkam, tohou inon ijo ihkam harus porocayaoh, tului ihkam jari paham porocaya umba Kristus. Ahku tihkas bogawi sama umba ihkam mangat ihkam mahi-mahi sanang.