1 YOHANES 5 - BOWOT BOHUA

Komanang ihto ngosan kolunon

¹ Ulun ijo porocaya ijo Yesus anairih Lahca Ponyolamat ijo tonobowot Pohotala, ulun orih anairih Anak Pohotala. Ulun ijo mongasih ihcobehti amai, mongasih anakoh ka'a.

² Umba jalan tuhrih ihto ta'an, ijo ihto mongasi anak-anak Pohotala: Ihto mongasi Pohotala tutang te'et umba poretah-poretah-Oh.

³ Tului mongasih Pohotala rimai te'et ahkan poretah-poretah-Oh. Tutang poretah-poretah-Oh eamrih bahat ahkan ihto,

⁴ tului nyinong anak Pohotala sanggup pokalah kolunon ijo ja'at tuh. Tutang ihto mongalah kolunon umba koporocayan ihto.

⁵ Iaikah duon ngalahoh kolunon? Tihkas ulun ijo porocaya, ijo Yesus anairih Anak Pohotala.

Kosaksian tohou Yesus Kristus

⁶ Yesus Kristusrih ijo lombut nokuh kolunon umba danum popondus-Oh, tutang umba dahan popahtoi-Oh. Io lombut eam tihkas umba danum iou, tahpi umba danum tutang daha. Tutang Roh Pohotala bongoi, nonga kosaksian ijo orih morong, tului Roh eam pu'u bobalik.

⁷ Anai tolu saksi:

⁸ Roh Pohotala, danum tutang daha – kotolu-toluoh nonga kosaksian ijo sama.

⁹ Ihto porocaya umba kosaksian kolunon, tahpi kosaksian Pohotala labih ba'as hino. Tutang orihrih kosaksian ijo jari tononga bain Pohotala tohou Anak-Oh.

¹⁰ Kotului orih, ulun ijo porocaya ahkan Anak Pohotala jari norima kosaksian rih ang luwang ahtoioh; tahpi ulun ijo eam anai koporocaya umba Pohotala, jari ngohu soahkan-ahkan Pohotala pobalik. Tului io eam porocaya, inon ijo tonuhtui Pohotala tohou Anak-Oh.

¹¹ Tuhrih kosaksian rih: Pohotala jari nonga ahkan ihto pombolum sojahti tutang kototahiu, tutang Anak-Oh anairih tohasak pombolum rih.

¹² Ulun ijo anaitepun Anak Pohotala io anaitepun pombolum rih; tutang ulun ijo eam anaitepun Io, eam anaitepun pombolum rih.

Pombolum sojahti tutang kototahiu

¹³ Ahku nyurat ahkan ihkam ijo porocaya ahkan Anak Pohotala, mangat ihkam ta'an ijo ihkam jari anaingina pombolum sojahti tutang kototahiu.

¹⁴ Tutang ihto bohanyi noharep Pohotala, tului ihto yahkin Io monorima do'a ihto, amat ihto nyawot inon iou, ijo tohorong umba kohandak-Oh.

¹⁵ Tului ihto ta'an ijo Io ngonihoh ihto, amat ihto nyawot umba-Oh, mahka ihto ta'an ka'a, ijo Io nongaoh ihto, inon ijo ihto nyawot tahkan Io.

¹⁶ Amat ihkam nohto anai ihcobehti sosama Kristen, nguan dusa ijo eam ngonjorian ulun rih nihou pombolum sojahti tutang kototahiu, kohondakrih ihkam bodo'a ahkan Pohotala, tutang Pohotala ahkan nonga pombolum rih ahkaioh. Tuh hokokona umba iro, ijo dusaoh eam ngonjorian iro nihou pombolum rih. Tahpi anai dusa ijo ngonjorian ulun nihou pombolum rih. Tohou hal rih ahku eam nuhtui ijo ihkam harus bodo'a umba Pohotala.

¹⁷ Paring gawi ijo sala anairih dusa, tahpi anai dusa ijo eam ngonjorian ulun nihou pombolum sojahti tutang kototahiu rih.

¹⁸ Ihto ta'an ijo paring ulun ijo jari monjadi anak-anak Pohotala, eam hototurus mawi dusa, tului Anak Pohotala ngolindungoh, tutang si Ja'at eam dahpot mawi ino-inon tohimo io.

¹⁹ Ihto ta'an ijo ihto ain Pohotala, oluka hopus kolunon tuh ang pinda kowasan Si Ja'at.

²⁰ Ihto ta'an ijo Anak Pohotala jari lombut, tutang jari nongaoh kohorahti ahkan ihto, mangat ihto kosono Pohotala ijo morong. Ihto bolum hihco umba Pohotala ijo morong, tutang bolum hihco umba Anak-Oh Yesus Kristus. Tuhrih Pohotala ijo morong, tutang tuhrih pombolum ijo sojahti tutang kototahiu.

²¹ Anak-anak'ku, ngomahcuohrih arop'kam tahkan dewa-dewa!