1 YOHANES 3 - BOWOT BOHUA

Anak-anak Pohotala

¹ Nohtorih, eaminon Pohotala masi ihto, nyiring ihto tongahku kolou anak-anak-Oh. Tutang puna ihto anai rih anak-anak Pohotala. Orihrih bainoh kolunon ijo ja'at tuh eam kosono ihto, kotului kolunon eam ngosono Pohotala.

² Konduang-konduang ijo tonyita! Ihto huntuh anairih anak-anak Pohotala, tahpi koada'an ihto noin, jaha korinah. Tahpi ihto ta'an ijo amat Kristus lombut, ihto ahkan nyolung kolou Io, kotului ihto ahkan nohto Io a'ang koada'an-Oh ijo komorongoh.

³ Paring ulun ijo anai koporocaya tuh toharep Kristus, monjaga aropoh, mangat tu'u-tu'u borasih, borasih tahkan dusa sama kolou Kristus ka'a borasih.

⁴ Ulun ijo nguan dusa, molanggar hukum Pohotala; kotului dusa anairih molanggar hukum Pohotala.

⁵ Ihkam ta'an, ijo Kristus lombut ahkan muhi dusa-dusan kolunon, tutang ijo eam aro dusa aang arop-Oh.

⁶ Paring ulun, ijo bolum hihco umba Kristus, eam hototurus nguan dusa. Ulun ijo hototurus nguan dusa, eam pu'u nohto Kristus ata'ai ngosono-Oh.

⁷ Anak-anak'ku, ara mohonau iai ka ka'a monyosatoh ihkam. Ulun ijo nguan kohondak Pohotala anairih Anak Pohotala, kolouumoh Kristus anairih Anak Pohotala.

⁸ Tahpi ulun ijo hototurus nguan dusa anairih anak Sehtan, kotului Sehtan bodusa tahkan pahtuk. Ahkan tuhrih Anak Pohotala lombut yorih ahkan polonyuh gawin Sehtan.

⁹ Ulun ijo jari monjadi Anak Pohotala, eam hototurus nguan dusa, kotului sipat Pohotala bongoi anai luwangoh. Tutang kotului Pohotala rih Amaioh, mahka io eam duon hototurus nguan dusa.

¹⁰ Tuhrih kobohkoioh holat anak-anak Pohotala umba anak-anak Sehtan; ia-iai eam nguan kohondak Pohotala, ata'ai eam masi konduangoh, io bohkon Anak Pohotala.

Mongasi ihco umba ijobohkon

¹¹ Tahkan pahtuk jari tonyiar borihta tuh ahkan'kam: Ihto harus masi ihco umba ijobohkon.

¹² Ara ihto kolou Kain, ijo monjadi anak Sehtan tutang munu konduangoh bongoi. Inon kotuluioh Kain munu konduangoh rih? Bain hal-hal ijo konuaioh anairih sala, tahpi hal-hal ijo konuan konduangoh anairih morong.

¹³ Bain orih, Konduang-konduang'ku, ara helan amat ulun-ulun kolunon tuh bosingi ihkam.

¹⁴ Ihto ta'an ijo ihto jari soluka tahkan popahtoi, tutang jari hahtun nokuh pombolum. Ihto ta'an rih kotului ihto masi hawui konduang ihto. Ulun ijo eam masi, rimai magun konowasa bain popahtoi.

¹⁵ Ulun ijo bosingi konduangoh, ulun rih pomunu, tutang ihkam ta'an, amat ihcobehti pomunu eam norima pombolum sojahti tutang turus-jahamoh.

¹⁶ Umba jalan tuhrih ihto mongota'an cara masi sama arop; Kristus jari monyorah pombolum-Oh bagi ihto. Kobain orih ihto ka'a harus monyorah pombolum ihto bagi konduang-konduang ihto!

¹⁷ Amat ihcobehti ijo pombolumoh sukup nohto konduangoh anai kotahpas, tahpi eam kani dohop konduangoh rih, koloukuwoh ulun rih dahpot homauh ijo io sita Pohotala?

¹⁸ Anak-anak'ku! Ararih ihto ngasi baya ang nyama, ata'ai tihkas umba kohawot iou. Hondakrih ihto ngasi umba kasih ijo sojahti, ijo tongorinah umba gawin ihto.

Kohanyi ang toharep Pohotala

¹⁹ Kolouorih caraoh ihto ta'an ijo ihto angbarih anak-anak Pohotala ijo morong, tutang ahtoi ihto dahpot teneng ang toharep Pohotala.

²⁰ Ihto ta'an, ijo amat ihto tonosalan bain ahtoi ihto, pongotaan Pohotala labih hajo, tahkan pongotaan ahtoi ihto, tutang ijo Io ta'an koparing-paringoh.

²¹ Jadi, Konduang-konduang ijo tonyita, amat ahtoi ihto eam nosalan ihto, ihto dahpot noharep Pohotala honong kohanyi.

²² Tutang inon ijo ihto nyawot tahkanumba-Oh, ihto norimaoh, tului ihto te'et umba poretah-poretah-Oh, tutang nguan inon ijo ngojorih ahtoi-Oh.

²³ Ijo Io moretahoh ahkan ihto; iorih, ihto harus porocaya ahkan Anak-Oh, yorih Yesus Kristus, tutang ihto harus saling ngasi kolou ijo jari ponoretah Kristus ahkan ihto.

²⁴ Paring ulun ijo te'et ahkan poretah-poretah Pohotala, bolum hihco umba Pohotala, tutang Pohotala hihco umba iro. Tutang ihto ta'an amat Pohotala bolum hihco umba ihto, kotului Io jari nonga Roh-Oh ahkan ihto.