1 TIMOTEUS 5 - BOWOT BOHUA

Kopahtut toharep ulun-ulun ijo 'cokoporocaya

¹ Ara ihko bosingi honong paham umba ulun ijo labih oko tahkanumba ihko, molekan mahkatiou io ngonih auh-auh'mu, koloujahka io amai'mu. Nguanumbarih iro ulun-ulun biou, kolou konduang'mu,

² tutang bawi-bawi oko kolou inai. Bawi-bawi biu hondakoh ihko kolou ari'mu, umba sihkap'mu ijo borasih.

³ Horomatrih balu-balu ijo moro-morong bolum ihcobehti bongoi.

⁴ Tahpi amat ihcobehti bolu, anai anak-anakoh ata'ai osui-osuioh, iro orihrih ijo pahtu-pahtukoh harus tononga pongosono ijo iro wajib nohtoani injah jolahan iro, tutang malos budi ulun oko tutang tahtu iro. Kotului hal orihrih ngojorih ahtoi Pohotala.

⁵ Balu ijo tu'u-tu'u ihcobehti bongoi tutang eamanai ia-iai ijo dahpot mohaga io, tihkas boharap ahkan Pohotala. Hondou ngalomi io turus bodo'a ahkan Pohotala ahkan nyawot pondohop-Oh.

⁶ Tahpi balu ijo jolik bolum jorih-jirah, jari mahtoi oluka io magun bolum.

⁷ Nyapairih potunjuk-potunjuk tuh ahkan iro, mangat iro bolum earo kosalai.

⁸ Tahpi amat anai ulun ijo eam mohaga aring-konduangoh, labi-labih jolahaioh bongoi, ulun rih ngulim koporocayaoh; io labih ja'at tahkan ulun ijo eam porocaya.

⁹ Tihkas balu ijo sorurui syarat-syarat pongo tuh tou posolong koluwang daptar balu-balu; umuroh patut eam kurang tahkan onom pulu toun, houn tihkas sinotikat kawin,

¹⁰ bosewut kolou ulunbawi ijo nguan hal-hal ijo pios, kolou misaroh; jari pohajo anak-anakoh honong pios, sanang norima bohkonuhtus nginap ang lohpouoh, mohalu ulun-ulun porocaya, mondohop ulun-ulun ijo susah, tutang nguan rih hawui tu'u-tu'u, kokaro mahcam gawi ijo pios.

¹¹ Ara posolong ang luwang daftar rih, balu-balu ijo magun biou. Kotului amat anyam jolikbolai iro monjadi paham tu'u, iro kani kawin hino, tutang nohtah Kristus.

¹² Mahka iro bosala tului mokila bowot ijo tononga ahkaioh.

¹³ Mahihino iro jari ponihou kotihka, tutang soluka nyolong lohpou ulun. Tutang ijo labih ja'at hino, iorih ijo iro bolajar mopitnah aran ulun bohkon, tutang sampur urusan ulun, hawui momander hal-hal ijo eam pahtut tonomander.

¹⁴ Orihrih kotuluioh ahku kani, mangat balu-balu biou pios kawin hino, dahpot anak hino tutang hogoguan lohpou kosalahoh, mangat musuh-musuh ihto eam dahpot kosapetoh ahkan ngoja'at-ja'at aran ihto.

¹⁵ Kotului anai balu-balu ijo jari sosat umba Sehtan.

¹⁶ Tahpi amat ihcobehti bawi Kristen, anai anak jolahai ijo ius monjadi balu, io harus dohop balu-balu rih; ara mahanou ukup ijo nanggung iro. Honong kodorih ukup dahpot dohop balu-balu ijo samasino eam aro aring-konduang.

¹⁷ Okon ukup ijo molalus gawiuoh honong pios, pahtut nonga porega duo kalilipet; pahtuk sasino, iro ijo rajin kotbah tutang majar.

¹⁸ Kotului luwang Surat borasih tonyurat, ‘‘Sahpi ijo rahat nihcak-ngihik gandum mekak luang gandum tahkan pahtingoh, ara mangop boui,’’ ka'a, ‘‘Ulun ijo bogawi anai hak dahpot uhpahoh.’’

¹⁹ Ara norima tuduhan toharep ihcobehti okon ukup, kocoali amat tongondehen bain duo behti saksi ata'ai labih.

²⁰ Ulun ijo nguan dusa harusrih toningak ang toharep hopus ukup, mangat ijo bokon monjadi mihkoh.

²¹ Ang toharep Pohotala, Kristus Yesus tutang molehkat-molehkat ijo tonopili, ahku nyawot honong paham mangat ihko numbun potunjuk-potunjuk tuh, earo tongohu toharep iai ka, tutang earo hopihak-pihak.

²² Ara dalou join ngina longo ngosan ihcobehti ulun, guna nahtap ponuotoh kolou pohalu Tuhan. Amat ulun bohkon bodusa, ara umba taput a'ang dusa orih. Jaga arop'mu mangat tahtap borasih.

²³ Ara hino ngorih danum iou; ngorih ka'a honjiot anggur ahkan dohop polonyuh suang usin konoin'mu, tului ihko bojoin poros-poros.

²⁴ Dusa 'cokobagi ulun, hounumba ponosara, jari gihtan honong tarang. Tahpi dusan ulun bohkon, punai tongota'an ulioh.

²⁵ Kodorih ka'a gawi-gawi pios nyolung gihtan. Tutang ijo murah gihtan sinoka, eam tou toturus tonyuhuk.