1 TIMOTEUS 4 - BOWOT BOHUA

Guru-guru palsu

¹ Roh Pohotala honong tegas nuhtui, ijo ang ohkot-ohkot ijo ahkan lombut, 'cokobagi ulun ahkan murtad, ngobele Kristus. Iro ahkan ponumbun umba roh-roh ijo monyosat tutang nutut ajaran-ajaran roh ja'at,

² ijo tonyiar nguha ulun-ulun monapik ijo ngobula. Ahtoi homboruan ulun-ulun orih rih jari pindong.

³ Iro majar ulun ahkan eam kawin tutang eam kuman ukun ijo botatu. Podahal ukun rih tona'oi Pohotala, ahkan tonukun umba ngohawot torimakasih ahkan-Oh, bain ulun-ulun ijo jari porocaya umba Kristus, tutang jari kosono ajaran ijo morong tahkan Pohotala.

⁴ Kokaro angihco ijo tona'oi bain Pohotala orih borasih, tutang eam anai ihco ka ijo harus ngohuoh pali, amat jari norimaoh homboh ngohawot torimakasih ahkan Pohotala.

⁵ Kotului borehkat tahkan Pohotala tutang do'a, nguan ukun orih rih monjadi borasih.

Pohalu Kristus Yesus ijo bogawi hawui pios

⁶ Amat ihko mongajarrih paringoh rih, ahkan konduang-konduang ihco porocaya, ihko ahkan monjadi pohalu Kristus Yesus ijo bogawi honong pios. Tutang ihko ahkan turus nyiram mboruan'mu umba auh Pohotala ijo ihto porocayaoh, tutang umba ajaran-ajaran ijo morong, ijo jari ihko nututoh kotahin tuh.

⁷ Ngomahcu sosana-sosana tohayul ijo eam boguna. Hondakrih ihko molatih arop'mu ahkan pombolum ijo bosombayang.

⁸ Molatih behti honjiot iou gunaioh, tahpi bolatih ahkan homboruan aro gunai a'ang karo hal, kotului bosuang bowot ahkan pombolum aang uhuntuh tutang uhun ijo ahkan lombut.

⁹ Hal orih morong tutang pahtut tonorima hawui tomorocaya sotuwioh.

¹⁰ Orihrih kotuluioh, ihto kolahi tutang bogawi paham, kotului ihto moharap sotuwioh umba Pohotala ijo bolum; Iorih Ponyolamat paring ulun, kopahtukoh sosino ulun-ulun ijo porocaya.

¹¹ Majarohrih paringoh rih, tutang nyuhu ulun-ulun numbunoh.

¹² Ara mohanau ihcobehti ka ngohu ihko randah kotului ihko magun biou. Sobalikoh hondakrih ihko monjadi sutu bagi ulun-ulun porocaya a'ang pander'mu tutang hadat'mu, a'ang cara ihko mongasih sosama tutang porocaya umba Yesus Kristus, tutang umba pombolum'mu ijo borasih.

¹³ Pondehan rih nyiring ahku lombut noin, ihko harus tu'u-tu'u mbasa Surat Borasih ahkan ulun-ulun, tutang njuhung hawui ngajar iro.

¹⁴ Ara ihko langak hapa pononga tahkan Roh Pohotala ijo tononga ahkan'mu, ang ohkot okon-okon ukup ngina longon iro ang ngosan kuhung'mu, tutang nabi-nabi monyiar pohtoh Pohotala tohou arop'mu.

¹⁵ Nguaniourih paringoh rih umba tu'u-tu'u mangat komiar'mu tonopahjah bain paring ulun.

¹⁶ Poriksa arop'mu tutang poriksa ka'a ajaran'mu. Hondakrih ihko te'et nguan paringoh rih, kotului umba kodorih ihko ahkan tonyolamat; pios arop'mu bongom, oluka ulun-ulun ijo ngonih'mu.