1 TESALONIKA 4 - BOWOT BOHUA

Pombolum ijo ngojorih ahtoi Pohotala

¹ Laiuoh Konduang-konduang, ihkai jari nonga sutu ahkan'kam, tohou koloukuwoh ihkam harus bolum ahkan ngojorih ahtoi Pohotala. Kopuna ihkam jari bolum kolourih. Tahpi huntuh ngosan kowasan Tuhan Yesus, ihkai nyawot honong paham umba'kam, tutang nyuhu ihkam mangat paham bousaha hino a'ang hal orih!

² Tului ihkam jari kota'an, potunjuk-potunjuk ijo jari ihkai nongaoh ahkan'kam, ngosan kowasan Tuhan Yesus.

³ Tuhrih kohondak Pohotala: Mangat ihkam bolum khusus ahkai-Oh, borasih, ngomahcu kokaro gawi ijo kihal.

⁴ Nyinong ulunbahkas ang louk ihkam, pahtut ngota'an, koloukuwoh bolum hihco oruhoh, umba cara ijo ngojorih ahtoi Pohotala tutang kolunon.

⁵ Ara bolum nutut kojolik, jolikbolai toharep oruh'kam, kolou ijo konuan bain ulun-ulun ijo eam kosono Pohotala.

⁶ A'ang hal kolouorih, a'ai ihcobehti ka nguan kosalan umba konduangoh ata'ai ka monihpuoh. Lomoi ihkai jari nonga tingak ijo paham ahkan'kam, ijo Tuhan ahkan mohukum ulun-ulun ijo nguan kosalan-kosalan kolouorih.

⁷ Pohotala na'ah ihto, eam mangat ihto bolum kihal, molekan mangat ihto bolum umba cara ijo ngojorih ahtoi-Oh.

⁸ Ulun ijo nulak ajaran tuh, eamoh nulak ulun molekan nulak Pohotala, ijo nonga Roh-Oh ijo borasih ahkan'kam.

⁹ Eam gunai hino ihkai nyurat ahkan'kam, tohou koloukuwoh ihkam harus ngasi konduang-konduang ijo 'cokoporocaya. Ihkam bongon jari tongajar bain Pohotala ahkan ngasih ihco umba ijobohkon.

¹⁰ Tutang hal tuh jari ihkam pokarahoh toharep paring konduang 'cokoporocaya ang hopus Makedonia. Tahpi, Konduang-konduang, ihkai nyawot hawui paham mangat pombolum'kam monjadi labih pios hino.

¹¹ Bousaha iou bolum honong teneng tutang eam umba sampur posoalan ulun bohkon. Hondakrih ihkam bogawi ngurah napakah bongon, koloukuwoh ihkai lomoi jari moretah'kam.

¹² Amat ihkam bolum kodorih, ihkam eam bohambin umba ia-iai ka'a, tutang ulun-ulun eam porocaya umba Kristus, ahkan mohoromat ihkam.

Polombut Tuhan

¹³ Konduang-konduang ihkai jolik mangat ihkam kota'an ijo kotu'ui tohou ulun-ulun ijo jari mahtoi; mangat ihkam eam sedih ahtoi kolou ulun-ulun bohkon ijo eam anai koharapan.

¹⁴ Ihto porocaya ijo Yesus jari mahtoi tutang bolum hoduli. Orih kotuluioh, ihto porocaya ka'a, ijo Pohotala ahkan mbolum hoduli paring ulun ijo porocaya umba Yesus, tutang jari palus, mangat iro bolum homboh Io.

¹⁵ Tohou hal orih tuhrih ajar Tuhan ijo ihkai kani nyapaioh ahkan'kam: Ang ohkot Tuhan Yesus lombut, ihto ijo magun bolum eam ahkan nosolu ulun-ulun ijo jari mahtoi labih houn.

¹⁶ Noin molehkat hajo ahkan na'ah umba auh ijo muhing, tutang sorunai Pohotala tomohpos kolou tanda aba-aba. Turus Tuhan Yesus bongoi ahkan nosuluh tahkan soruga, tutang ulun-ulun Kristen ijo jari mahtoi ahkan tongomonyun labih soun.

¹⁷ Uliorih ihto ijo magun bolum ang ohkot rih ahkan hombo-homboh hogatang umba iro nohkuh luwang bounondou-bounondou ahkan hosombang umba Tuhan ang diang. Turus ihto ahkan mohcon umba Tuhan turus-jahamoh.

¹⁸ Tului rih, hondakrih ihkam saling ngomba'as ahtoi honong hapan tuhtui-tuhtui tuh.