1 TESALONIKA 3 - BOWOT BOHUA

¹ Laiuoh, korinduan ihkai eam duon tonahan hino. Tului orih ihkai niruk labih pios ihkai tonohtah bongon'kai ang Atene,

² pondehan ihkai nyuhu konduang ihto Timoteus. Io ihcobehti pohalu Pohotala, ijo bogawi homboh ihkai ahkan momborihta Kabar Hinut tohou Kristus. Ihkai monyuhu Timoteus ahkan'kam, mangat io ngomba'as ihkam tutang juhung ihkam, ahkan labih porocaya hino umba Kristus.

³ Honong kodorih eam ihcobehti ka, tahkan ihkam ijo undur aropoh tului karot-karot ihto tuh. Ihkam bongon kota'an ijo karot-karot rih nyolong luwang rancana Pohotala ahkan ihto.

⁴ Ang ohkot ihkai magun hihco ihkam, ihkai jari mborihta ahkan'kam labih houn, ijo ihto ahkan ngarot. Tutang kopuna rih moro-morong ius nyolung, ihkam bongon kota'anoh.

⁵ Orihrih kotuluioh ahku nyuhu Timoteus, tului ahku jolik sasino ta'an koloukuwoh komiar'kam a'ang porocaya umba Kristus. Ahku mihkoh Sehtan bohasir nihkos ihkam nyiring paring koheka kouyuh ihkai monjadi ngahus.

⁶ Huntuh Timoteus jari buli, tutang jari nyorihta ahkan ihkai borihta kojorih, tohou koloukuwoh amoh ihkam porocaya umba Kristus tutang saling ngasih. Io nyorihta ahkan 'kai, ijo ihkam toturus anaingina kenang-kenangan ijo pios tohou ihkai ang ahtoi'kam. Tutang ihkam jolik hosombang umba ihkai, sama kolou ihkai ka jolik hosombang umba ihkam.

⁷ Orih rih kotuluioh, Konduang-konduang, ang luwang kokaro kosusah tutang kokarot ihkai, ihkai dahpot apung bain borihta tohou ihkam. Koporocayaan'kam ahkan Kristus mopohajooh ahtoi ihkai,

⁸ nyiring huntuh ihkai nginyam tu'u-tu'u pombolum, asar ihkam tehtep tombok segah hihco umba Tuhan.

⁹ Eaminon hajooh torimakasih ihkai umba Pohotala ngosan paring kojorih ijo ihkai nyuruoh ang toharep-Oh, kotului ihkam.

¹⁰ Hondou ngolomi ihkai nyawot umbaroh, honong kotuwiahtoi, mangat ihkai dahpot hosombang bongon umba ihkam, ahkan monyukup inon ijo ihkam poruluoh ahkan porocaya ahkan Kristus koloukuwoh kopahtutoh.

¹¹ Keleh Pohotala, Amai ihto bongoi tutang Tuhan ihto Yesus Kristus ngorahta jalan bagi ihkai ahkan hosombang umba ihkam!

¹² Keleh Tuhan nguan ihkam mahimahi mongasih ihco sama ijobohkon, tutang mahi ka'a ngasi paring ulun, nyiring kasih'kam rih botambah-tambah toturus, sama kolou kasih ihkai umba ihkam.

¹³ Honong kodorih Tuhan ahkan ngomba'as ahtoi'kam, nyiring ihkam borasih, tutang eam aro kosalai ang toharep Pohotala, Amai ihto, ang ohkot Tuhan ihto Yesus Kristus lombut homboh paring ulun ijo monjadi Aiu-Oh.