1 TESALONIKA 2 - BOWOT BOHUA

Gawin Paulus ang Tesalonika

¹ Konduang-konduang! Ihkam bongon ta'an ijo pasap ihkai nokuh ihkam eam ngohus.

² Ihkam ta'an ijo, sounmba ihkai lombut ahkan'kam ang Tesalonika, ihkai jari tonoporos tutang tonohina ang Pilipi. Tahpi oluka, aro ulun molawan ihkai, Pohotalan ihto jari nonga ihkai kohanyi ahkan mborihta ahkan'kam Kabar Hinut ijo asar-Oh tahkanmba-Oh.

³ Poimbit kai ahkan'kam eamoh angihco koliru; ka'a eam umba konohuang ijo eam morong ata'ai ahkan monihpu.

⁴ Eam! Ihkai eam mander ahkan monyanang ahtoi ulun, molekan monyanang ahtoi Pohotala, ijo mocoba ahtoi ihkai. Kotului ihkai tongohu layak bain Pohotala ahkan mborihta Kabar Hinut rih.

⁵ Ihkam bongom ta'an, ijo eam pu'u ihkai honyama manih, ata'ai tihpu-tihpu umba ihkam, ahkan monyuhuk konohuang-konohuang ijo bokuhu. Pohotala saksioh!

⁶ Ihkai eam ka'a ngurah jalan, ahkan ngondahpot tara tahkan ulun – pios tahkan ihkam, oluka tahkan ulun bohkon. Komorongoh kolou rasul Kristus, ihkai tou iou nutut aang'co tahkan ihkam.

⁷ Tahpi ihkai bohadat bolomu lembai uhun anai ang tohun ihkam, kolou ihcobehti inai mohalu anak-anakoh.

⁸ Tului ngasi nyayang ihkai, ihkai bosodia nonga ahkan'kam, eam iou Kabar Hinut ijo tahkan Pohotala rih, tahpi pombolum ihkai ka'a. Tului ihkai paham ngasi ihkam paring!

⁹ Tontu ihkam magun ingat, koloukuwoh kokarasoh ihkai bousaha tutang hokolawan. Hondou ngolomi ihkai bogawi, mangat ihkai eam nyusah ihcobehti ka tahkan ihkam, 'co-ohkot ihkai mborihta Kabar Hinut ijo tahkan Pohotala rih ahkan'kam.

¹⁰ Ihkai bolum honong borasih, morong tutang eam anai cela toharep ihkam, ijo jari porocaya ahkan Kristus. Ihkam holeam saksin-saksin ihkai, kodorih ka'a Pohotala.

¹¹ Ihkam ta'an, ijo ihkai mohaga ihkam nyino-nyinong, kolou ihcobehti Amai mohaga anak-anakoh.

¹² Ihkai ningak ihkam, ihkai nonga juhung ahkan ihkam, tutang ihkai hojojuan mangat ihkam bolum kodorih kolou, nyiring monyanang ahtoi Pohotala. Tului Pohotala ius na'ah ihkam, monjadi warga Kolunon Bohua ain Pohotala tutang nginyam karon-kohajoi-Oh.

¹³ Anai hino ihco hal bohkon, ijo napa ihkai toturus norimakasih ahkan Pohotala. Hal rih iorih, ijo ang ohkot ihkai monyapai borihta tahkan Pohotala ahkan'kam, ihkam ngonih tutang norima borihta rih, eam kolou borihta tahkan ulun, tahpi kolou borihta ijo moro-morong tahkan Pohotala. Iorih ijo rahat bogawi a'ang arop'kam ijo porocaya umba Kristus.

¹⁴ Konduang-konduang! Hal ijo ihkam nyuruoh, jari tonyuru ka'a bain ukup-ukup Pohotala ang Yudea ijo jadi ain Kristus Yesus. Ihkam monyuru karot tahkan hila uhtus'kam bongom, sama kolou ijo tonyuru bain ukup-ukup Pohotala ang Yudea rih tahkan sila ulun-ulun Yahudi.

¹⁵ Ulun-ulun orih ijo munu Tuhan Yesus tutang nabi-nabi, hawui ngoporos ihkai. Iro momusuh paring ulun, tutang Pohotala, samasino eam sanang umba iro.

¹⁶ Dahanghino iro mohalang-halang ihkai, ahkan mborihta ahkan uhtus-uhtus bohkon Yahudi, borihta ijo dahpot monyolamat uhtus-uhtus orih. Honong kodorih ulun-ulun Yahudi orih, mondahang toturus dusa-dusan iro, nyiring jombalahoh sukup. Tutang huntuh iro kolaiuoh nopahas tulut Pohotala!

Kojolik Paulus masap ulun Tesalonika sino hino

¹⁷ Tahpi Konduang-konduang tahkan ihkai hombilang pondehan ohkot tahkan ihkam – hombilang ang mahto, tahpi eam ang ahtoi – ihkai mahin rindu ahkan'kam, tutang bousaha tu'u-tu'u ahkan hosombang hino umba ihkam!

¹⁸ Ihkai boniat tulak masap ihkam; tutang ahku jari monyobaoh sino duo tikat, tahpi Sehtan mohalang ihkai.

¹⁹ Punatu'u ihkamrih koharap tutang kojorih ihkai. Tului noin amat Tuhan Yesus lombut, tutang ihto noharep-Oh, mahka ihkamrih ijo ahkan monjadi kotamam ihkai!

²⁰ Puna kodorih ihkam monjadi kotamam tutang kojorih ihkai!