1 PETRUS 5 - BOWOT BOHUA

Kawan tobirin Pohotala

¹ Ahku nyawot monohtoani, dolang okon ukup'mu. Ahku nyurat tuh kolou jolahan okon, tutang kolou ulun ijo jari monyaksioh bongoi kongarot Kristus, tutang ijo ahkan umba ka'a konohajooh, amat noin kohajon Kristus tongorinah ahkan ulun. Ahku nyawot hawui paham,

² mangat ihkam nyokahtik kawan tobiri ijo tonosorah Pohotala ahkan'kam. Nyokahtikohrih iro hawui jorih ahtoi koloukuwoh ijo tonojolik bain Pohotala, tutang ara umba bahat ahtoi. Ararih hino nguanrih gawin'mu ahkan dahpot utung, molekan kotului ihkam tu'u-tu'u jolik mohalu.

³ Ararih nguaioh kolou pongowasa toharep iro, ijo tomorocaya ahkan'mu, molekan monjadi sutu ahkan iro.

⁴ Tutang ang ohkot Sokahtik Hajo rih lombut noin, ihkam ahkan norima mahkota ijo gomilang, ijo eam ahkan kawus kogomilangoh.

⁵ Kodorih ka'a Konduang, ulun-ulun biou. Tunduk ahkan ulun-ulun ijo oko. Konduang paringoh harus ngominda arop, tutang saling mohalu honong randah ahtoi. Kotului luwang Surat Borasih tonyurat koloutuh, ‘‘Pohotala noharep ulun ijo bojuhu, tahpi kasih umba ulun ijo randah ahtoi.’’

⁶ Tului rih, ngominda arop'mu, ang pinda longon Pohotala ijo ba'as, mangat Io ngahtang ihkam amat jari johcok ohkotoh.

⁷ Sorahohrih karon kowatir'kam ahkan Pohotala, kobain Io ahkan mopoduli'ko.

⁸ Hondakrih, ihkam waspada tutang tohtap bojaga! Bain Sehtan anairih musuh'kam. Io kolou singa, nyalan koanan koohtoi sambil ngaum ngurah ang tonosahapoh.

⁹ Lawan io umba koporocaya ijo segah, tului ihkam kota'an ijo konduang-konduang sosama Kristen bohkonoh, ang sohopus kolunon ka'a ngarot kolou ihkam.

¹⁰ Tahpi uli ihkam ngarot pondehan, Pohotala bongoi ahkan nguan ihkam nyolung soporuna. Io ahkan monombok tutang ngomba'asoh ihkam hawui podehen ihkam. Bain Io anairih Pohotala ijo paham pios ahtoi, ijo ius na'ah ihkam umba mokomo kohajoi-Oh ijo abadi nguha Kristus.

¹¹ Iorih ijo bokowasa nyiring turus-jahamoh! Amen.

Tabe atop surat

¹² Surat'ku ijo iwak tuh, ahku nyurat ahkan'kam umba pondohop Silas, ijo ahku ngohu io ihcobehti konduang Kristen ijo te'et. Ahku jolik nonga juhungan ahkan'kam tutang moyahkin ihkam, bain inon ijo ahku nyurat tuh, borihta ijo tu'u, tohou pononganasi Pohotala. Hondakrih ihkam nambit segah ang ponongaasi rih.

¹³ Sobat-sobat ihcoukup ang Babilon, ijo ka'a konopili bain Pohotala, ngirim tabe ahkan'kam; kolourih ka'a anak'ku Markus ijo tonyita.

¹⁴ Botabe-tabe rih ihco umba ijobohkon, umba kotuwi asi kolou konduang Kristen. Keleh Tuhan nonga kosanang ahkan Konduang paringoh ijo monjadi ain Kristus. Horomat ihkai, Petrus