1 PETRUS 4 - BOWOT BOHUA

Pombolum ijo bohua

¹ Tului Kristus jari ngarot socara behtiu, ihkam ka'a harus ngoba'as arop, umba tiruk ijo kolourih. Kotului ulun ijo ngarot socara behtiu, eam hino nguan dusa.

² Kobain orih, hondakrih ihkam bolum toturusoh ang kolunon tuh, numbun konohuang Pohotala, tutang eam numbun kojolik kolunon.

³ Aang wayah ijo nokalou, ihkam jari sukup tahi nguan inon ijo jolik tonguan bain ulun-ulun ijo eam kosono Tuhan. Ihkam bolum eam hinut. Ihkam numbun kojolik bolaiusi, bobusou-busou, koramin-pesta, ngorih-ngorih tutang nyembah dewa socara pongojilokoh.

⁴ Huntuh ulun ijo eam kosono Tuhan, helan, ijo ihkam eam umba bolum kolou iro, nginyam dusa eam aro tihkas. Orihrih kotuluioh iro mohina ihkam.

⁵ Tahpi iro noin, harus nonga tanggung-jawab ahkan Pohotala, ijo jari sodia ahkan mosara ulun, ijo bolum tutang ijo mahtoi.

⁶ Orihrih baiuoh Kabar Hinut jari tomborihta ka'a ahkan ulun-ulun mahtoi. Konohuangoh mangat iro, ijo jari tomosara a'ang koada'an behtiuoh – kolou haloh paring ulun ahkan tomosara – duon bolum socara rohani, numbun kohondak Pohotala.

Ponggawi pononga tahkan Pohotala

⁷ Kokaro aang'co jari doni koopahoh, tului rih hondakrih ihkam ngowasa arop tutang bosodia, mangat ihkam dahpot bodo'a.

⁸ Labih tahkanumba kokaro-karooh, hondakrih ihkam tu'u-tu'u mongasi ihco umba ijobohkon, kotului hawui saling masi ihkam ahkan bosodia ka'a ahkan saling mongapun.

⁹ Hondakrih, ihkam norima ihco umba ijobohkon, ang lohpou nyinong-nyinong eam bokuhtuk.

¹⁰ Ihkam nyino-nyinong jari norima pononga-pononga ijo hokobohkon tahkan Pohotala. Kotului orih kolou ponggawi ijo pios tahkan ponongan-ponongan Pohotala, hondakrih ihkam monggunaoh pongonduon rih ahkan kogunan sama-sama.

¹¹ Ulun ijo monyiar borihta, harusrih monyiar borihta tahkan Pohotala, ulun ijo mohalu ulun bohkon, harusrih mohalu umba koba'as ijo tahkan Pohotala, mangat a'ang kokaro hal, Pohotala dahpot ponohajo nguha Yesus Kristus. Iorih ijo bokowasa tutang harus ponohajo ahkan turus-jahamoh. Amen.

Ngarot kolou ulun Kristen

¹² Konduang-konduang ijo ponokasih! Ihkam uhuntuh paham ngarot kotului rahat tonguji. Tahpi ararih komo helan, koloujahka anai aangihco ijo luar biasa nyolung ahkan'mu.

¹³ Malah, hondakrih ihkam nanjam sanang, kotului umba ngarot hihco umba Kristus. Mahka noin amat kohajon Kristus tongorinah, ihkam ahkan tongojorih.

¹⁴ Ihkam botuah amat ihkam tonohina, kotului ihkam murid Kristus. Orih rimai Roh ijo tohoromat yorih Roh Pohotala anai aang ihko.

¹⁵ Ara ihcobehti ka tahkan tohun ihkam ngarot tului io pomunu, ata'ai ponahkou, ata'ai ponyilau, ata'ai tului io sampur urusan ulun bohkon.

¹⁶ Tahpi amat ihkam ngarot bain ihkam ulun Kristen, ara mia tului hal rih. Botorimakasihrih umba Pohotala, ijo ihkam ngomin aran Kristus.

¹⁷ Jari johcok ohkotoh Pohotala mosara kolunon. Tutang ukup Pohotala bongoi, ijo ahkan tomosara labih houn. Nah, amat Pohotala ahkan nopara umba ihto, koloukuwohrih kojadioh noin, umba ulun-ulun ijo eam porocaya, umba Kabar Hinut tahkan Pohotala rih?

¹⁸ Luwang Surat Borasih tonyurat koloutuh, ‘‘Amat ulun-ulun ijo pios ka'a jari bohali ahkan tonyolamat, inon hino ijo ahkan nyolung umba ulun-ulun bodusa ijo eam ngosono Tuhan!’’

¹⁹ Bain orih, amat anai ulun-ulun ijo ngarot tului Pohotala ngohondak kolourih, hondakrih ulun-ulun rih bolum hawui morong tutang moporocaya arop umba Pona'oi iro. Io ahkan turus molalus bowot-Oh.