1 PETRUS 1 - BOWOT BOHUA

^1-2 Konduang-konduang ukup ponitih Pohotala, ijo bororawu ang ponomuoi ang tana Pontus. Galatia, Kapadokia, Asia tutang Bitinia! Ahku Petrus rasul Yesus Kristus, moharap, keleh Pohotala nonga berkat tutang kosanang ahkan'mu nyiring momujar-mujar. Ihkam ponitih monjadi ukup Pohotala, tohorong umba rancana Pohotala, Amai. Tutang Roh Pohotala jari monjodian ihkam ukup ijo borasih, khusus ahkan Pohotala, mangat ihkam te'et umba Kristus tutang tonomuhi bain daha-Oh.

Koharap ijo segah

³ Olailah ihto norimakasih umba Pohotala, Amai, Tuhan ihto Yesus Kristus! Io paham mongasih ihto, orih kotuluioh Io nonga ahkan ihto pombolum ijo bohua, hawui mombolum hoduli Yesus Kristus tahkan popahtoi. Tuh mononga'kan ihto harapan ijo segah.

⁴ Ihto bokoharap ahkan anaitepun borehkat-borehkat ijo tonyodia Pohotala ahkan ukup-Oh, yorih borehkat-borehkat ijo tongina-Oh ang soruga, nyiring eam dahpot rusak, ata'ai monjadi maram, ata'ai ka luntur.

⁵ Paringoh rih anairih ahkan'mu, tului ihkam porocaya umba Pohotala. Mahka ihkam tonojaga umba kowasan Pohotala, mangat ihkam monorima kosolamatan ijo sodia tongorinah aang lain jaman noin.

⁶ Kotului orih hondakrih ihkam jorih ahtoi, oluka huntuh bagi pondehan ohkot, ihkam harus monjadi sedih tului ihkam nyuru mahca-mahcam tihkos.

⁷ Tituioh iorih, ahkan mbukti inon ihkam tu'u-tu'u porocaya, umba Tuhan ata'ai eam. Bulou ijo duon rusak ka, tonguji umba baho. Nah, porocaya ihkam anairih labih borega tahkan bulou, jadi harus tonguji ka'a mangat monjadi segah. Tutang honong kolourih, ihkam ahkan tonara tutang tonohoromat, hawui tonongahtang ang ondou Yesus Kristus lombut hoduli.

⁸ Ihkam ngasih Io, oluka soun ihkam eam nohto Io. Tutang ihkam porocaya umba Io, oluka houn ihkam eam nohto-Oh. Orih kotuluioh ihkam jorih, tutang nginyam kojorih ijo hajo tutang eam duon tonyorihta.

⁹ Tului titun koporocaya'kam johcok, yorih, kosolamatan homboruan'mu.

¹⁰ Kosolamatan tuhrih ijo tonolihti tutang tonyolidik bain dolang nabi, tutang iro nujum tohou borehkat ijo tononga Pohotala ahkan'mu.

¹¹ Iro nyolidik koloukuwoh, tutang mira hal orih ahkan nyolung, ijo konohuangoh bain Roh Kristus ijo anai ang luwang arop iro. Ang ohkot rih, Roh-Oh monujum ahkan iro, tohou karot-karot ijo harus tonyuru bain Kristus tutang tohou kohajoi-Oh ijo ahkan nutut ulimba rih.

¹² Ahkan nabi-nabi rih Pohotala momborihta, ijo inon ijo iro nguai eam ahkan gunan iro, molekan bagi'mu; yotuh hal-hal ijo uhuntuh, tuh ihkam ngonih honong korinah, tahkan dolang pomborihta Kabar Hinut tohou Yesus Kristus. Iro monyiar hal-hal rih bagi'mu umba kowasa Roh Pohotala ijo tongirim-Oh tahkan soruga. Mahihino molehkat-molehkat ka jolik ka'a ngota'an kabar ijo iro nyiaroh rih.

Pona'ah ahkan bolum borasih

¹³ Bain rih, hondakrih ihkam siap sodia. Bojaga iou tutang boharaprih sotuwioh aang borehkat ijo ahkan tononga ahkan'mu aang ohkot Yesus Kristus lombut noin.

¹⁴ Te'etiou umba Pohotala, tutang ara bolum numbun konohuang'mu ijo houn, aang ohkot ihkam magun jaha kosono Pohotala.

¹⁵ Sombalikoh, hondakrih ihkam borasih a'ang kokaro angihco ijo ihkam nguai, sama kolou Pohotala ijo na'ah ihkam rih borasih.

¹⁶ A'ang Surat Borasih tonyurat, ‘‘Hondakrih ihkam borasih tului Ahku borasih.’’

¹⁷ Ihkam ngohawot Pohotala rih Amai, aang ohkot ihkam bodo'a nitu Io. Nah, Pohotala orihrih ijo ahkan mosara kolunon tohorong umba gawiu nyinong-behti, eam nohto kolunoi. Tului rih kotahin ihkam magun anai ang kolunon tuh, hondakrih ihkam mopohajo Pohotala a'ang pombolum'mu.

¹⁸ Ihkam ta'an inon ijo jari tonombayaroh ahkan momorodehka ihkam tahkan pombolum ijo sia-sia, ijo tonowaris bain tahtu ajuh'mu. Bayaranoh, eamrih angihco ijo tou rusak, kolou perak ata'ai bulou,

¹⁹ molekan angihco, ijo paham borega; iorih behtin Kristus bongoi, ijo monjadi kolou tobiri ijo toporahpah ahkan Pohotala, eam aro cahcat ata'ai celaoh.

²⁰ Kristus tonopili bain Pohotala hounumba kolunon tona'oi. Tutang aang ondou-ondou donisapai laiu jaman tuh, Io lombut nokuh kolunon mangat ihkam tonyolamat-Oh.

²¹ Nguha Iorih ihkam porocaya ahkan Pohotala, ijo jari ngombolum Io hoduli tahkan popahtoi, tutang mopohajooh. Jadi, Pohotalarih ijo ihkam porocayaoh tutang ahkan Pohotalarih ka'a ihkam ngina koharapan.

²² Tului ihkam te'et umba ajaran tahkan Pohotala, mahka ihkam moporasih arop, tutang ihkam ngasi ulun-ulun porocaya socara ihlas. Kobain rih, kopiosrih ihkam sita ihco umba ijobohkon, umba sotuwi ahtoi.

²³ Kotului nguha auh Pohotala ijo bolum tutang ijo abadi ihkam ius tonojadioh kolunon bohua, ijo eamoh konanak tahkan kolunon, molekan tahkan Amai ijo abadi.

²⁴ A'ang Surat Borasih tonyurat koloutuh, ‘‘Paring ukup kolunon, kolou uru, tutang kokaro kohajoioh, kolou dolak uru. Uru molanyu, dolakoh ka boduruh;

²⁵ tahpi auh Tuhan tehen ahkan turus-jaham.’’ Auh orih Kabar Hinut ijo ius tonosiar ahkan'mu.