1 KORINTUS 8 - BOWOT BOHUA

Tohou ukun ijo tonyorah kolou pononga ahkan Songiangdewa

¹ Uhuntuh tohou ukun ijo jari tonyorah kolou pononga ahkan Songiangdewa. Puna morong kolou hion ulun ‘‘Ihto paringoh uras ahpik.’’ Tahpi koahpik napa ulun monjadi bojuhu, rahatoh kasih mangun pribadi ulun.

² Ulun ijo ngohu, ijo io jari ngota'an aro, kotu'uioh jaha ngota'an ijo puna paling kotimbon-timbonoh.

³ Tahpi ulun ijo tu'u-tu'u sita Pohotala, Io tongosono kobain Pohotala.

⁴ Tohou soal kuman ukun ijo jari tonyorah ahkan songiangdewa ihto ngota'an ijo songiang, gambar angihco ijo kotu'uioh, eam aro. Tutang ihto ngota'an ka'a ijo Pohotala tihkas ihco, eam aro ihco bohkon.

⁵ Puna aro ka'a, inon ijo konohawot pohotala tutang tuhan; pios ijo anai ang langit, oluka ijo anai ngosan tana.

⁶ Tahpi bagi ihto, Pohotala tihkas ihco. Io Amai ijo na'oi karon aang'co. Ahkai-Oh ihto bolum. Tutang Tuhan tihkas ihco ka'a, iorih Yesus Kristus. Nguha Io karon angihco tona'oi, tutang kotului Io mahka ihto bolum.

⁷ Oluka kodorih eam paring ulun ngota'an hal rih. Anai ijo lomoi kopahtuhoh nyembah songiangdewa. Jadi, kotului rih nyiring huntuh ka iro magun komo ijo ukun, ijo jari tonyorah ahkan songiangdewa, yorih ukun dewa. Mahka amat iro kuman ukun rih, iro komo bodusa; tului koporocaya iro jaha ba'as.

⁸ Kotu'ui ukun bongon eam nguan kohihco ihto umba Pohotala monjadi labih rapat. Amat ihto kuman ukun rih, ihto eam duon utung ino-inon. Tobalikoh amat ihto eam kumai ukun rih, ihto ka eam rugi ino-inon.

⁹ Tahpi, bua-buah! Ara nyiring nyolung, ijo ulun bohkon monjadi bodusa – kotului koyahkinanoh jaha ba'as – kobain tului Konduang bebas nguan inon iou.

¹⁰ Konohuang'ku koloutuh; Jahkaoh Konduang, ijo anai ngina koyahkinan ijo ba'as, uhun tuot kuman aang koramat dewa. Uliorih ihcobehti nohto Konduang tuot kuman ang anan. Amat koyahkinan ulun rih eam dehen, eamkah orih ahkan mawi ulun rih bohanyi kuman ukun ijo jari tononga ahkan songiang?

¹¹ Tutang kotului rih, mahka koyahkinan Konduang nguan ulun ijo koyahkinanoh eam ba'as rih monjadi sosat. Podahal Kristus mahtoi ahkan ulun rih ka'a.

¹² Tutang amat Konduang nguan kosalan kolourih toharep konduang-konduang Kristen – iorih konduang morusak koyahkinan ulun bohkon, ijo bolomu – mahka Konduang bodusa umba Kristus.

¹³ Orih kotuluioh, amat ukun kotuluioh rih konduang'ku bodusa, mahka ahku samasino eam ahkan kuman usinohcin hino. Tului, ara-ara konduang'ku bodusa tului ahku.