1 KORINTUS 6 - BOWOT BOHUA

Ngadu konduang ang Balai Bosara

¹ Ombai anai ang louk ihkam ijo bohanyi tulak nokuh hakim ijo eam kosono Pohotala, mangat ngadu konduangoh ihcoporocaya, amat io anai porokaraoh umba konduangoh rih? Ombai io eam nyawot ukup Pohotala ngobuah porokaraoh orih rih?

² Kuwoh ihkam eam kota'an ijo ukup Pohotala, ahkan mosara kolunon tuh? Jadi, amat puna ihkam ahkan mosara kolunon tuh, kuwoh ihkam eam sanggup ngobuah, karon-porokara mosara ijo eam anai rimai?

³ Inon ihkam eam kota'an, ijo ihto ahkan mosara karon-molehkat? Mahi-mahi hino karon-porokara pambolum nyinong ondou!

⁴ Mahka amat lombut karon-porokara kolou orih, inon ihkam ngaduoh ahkan ulun-ulun ijo eam anai ponuotoh samasino ang ukup?

⁵ Tu'u-tu'u momi'a! Puna ang louk ihkam ihcobehti anai ulun piosbosara, ahkan ngobuah sokehta, louk konduang-konduang'kam, ijo sama-sama Kristen!

⁶ Tahpi tobalikoh, ihcobehti Kristen, tulak nokuh ulun ijo eam Kristen, ahkan ngadu porokaraoh toharep konduangoh ijo Kristen!

⁷ Ara samasino tulak hoporokara nokuh ulun ijo eam Kristen; Amat anai sokehta-sokehta ang louk ihkam ka, jari monjadi ihco kokalah'kam. Labih pios ihkam, konuan eam adil, ata'ai tonorugi iou!

⁸ Tahpi ihkam bongom, malah ijo nguan ulun bohkon hawui eam adil. Ihkam bongom ka'a morugi ulun bohkon. Tutang orih ihkam nguai, justru toharep konduang-konduang'kam ihcoporocaya!

⁹ Kota'ankah ihkam ijo ulun-ulun, ijo eam numbun konohuang Pohotala, eam ahkan monjadi anak ukup Pohotala? Ara kona alik! Ulun-ulun ijo nguan kokihal, ulun-ulun ijo nyembah songiang, ijo pohobandung, ijo nguan gawiou ijo momi'a toharep sama tapaioh,

¹⁰ ijo nahkou, ijo bokuhu, ijo pobusou, ijo jolik ngonjaat-jaat ulun bohkon, tutang mohamis ulun bohkon – paring ulun kolourih eam ahkan monjadi anak ukup Pohotala.

¹¹ Pira-pira ang louk'kam, lomoi hadatoh kolourih. Tahpi huntuh ihkam, tongorinah borasih tahkan dusa. Ihkam jari nyolung ain Pohotala ijo khusus. Ihkam jari hokopios huli umba Pohotala, tului ihkam porocaya umba Tuhan Yesus Kristus, tutang kotului kowasan Roh tahkan Pohotalan ihto.

Hapa behtin'kam ahkan mahormat Pohotala

¹² Anai ijo nuhtui, ijo nyinong ulun dahpot nguan karon aang'co. Tahpi ahkak'ku eam paringoh boguna. Jadi, oluka ahku duon nguan aanginon iou, tahpi ahku eam kani mohanou arop'ku tokowasa bain inon ka.

¹³ Anai ka'a ijo nuhtui, ijo ukun anairih ahkan kono'i tutang kono'i tonahtap ahkan ukun. Tahpi koduo-duooh ahkan todian kobain Pohotala. Behtin ulun eam tou tohapa ahkan nguan ijo kihal, tahpi tihkas hapa mohalu Tuhan. Tutang Tuhan ahkan mohaga behti rih.

¹⁴ Pohotala jari mombolum behtin Tuhan Yesus tahkan popahtoi, kodorih ka'a Pohotala ahkan mombolumoh ihto, hapa kowasa-Oh.

¹⁵ Konduang-konduang kota'an ijo behtin'kam anai ramun behtin Kristus. Jadi, inon tou ahku ngomin ihco ramun behtin Kristus, turus monjadioh ramun behtin 'cobehti sundal? Samasino eam!

¹⁶ Ata'aioh, mihkoh ihkam jaha ngota'an, ijo ulun ijo hihco umba 'cobehti sundal, monjadi ihco umba sundal rih! Tului a'ang Surat Borasih tonyurat, ‘‘Duo behti orih rih monjadi ihco.’’

¹⁷ Tahpi ulun ijo pohihco aropoh umba Tuhan, Roh Tuhan umba roh ulun rih monjadi ihco.

¹⁸ Ngojajong karon-gawi ijo kihal. Kotului paring dusa bohkon, ijo konuan ulun, uras nyolung ang luar behtin ulun rih. Tahpi ulun ijo nguan ijo kihal, rimai nguan dusa toharep behtiu bongoi.

¹⁹ Ihkam harus ngota'an ijo behtin'mu anai unuk mohcon Roh Pohotala. Roh rih mohcon ang luwang ihkam. Tutang Pohotala bongoi ijo nonga Roh rih ahkan'kam. Behtin Konduang rih eam ain emu. Orih ain Pohotala.

²⁰ Pohotala jari moli ihkam tutang jari mbayaroh hawui lunas. Kobain rih, hapa behtin'kam kodorih kolou, nyiring Pohotala tonohoromat.