1 KORINTUS 3 - BOWOT BOHUA

Karon-pohalu Pohotala

¹ Konduang-konduang! Kotu'uioh ahku eam duon bopander umba konduang, kolou umba ulun ijo tepun Roh Pohotala. Ahku tihkas duon bopander umba ihkam, kolou umba ulun ijo magun bolum numbun kojolik kolunon; kolou umba ulun ijo magun ngoa aang koporocayaoh umba Kristus.

² Lomoi ahku baya duon nonga ahkan'kam ukun ngoa, eam ukun ulun oko; kotului ihkam jaha sukupba'as ahkan orih. Tahpi huntuhka ihkam, magun jaha ba'as ahkan orih,

³ kotului ihkam magun bolum numbun tobiat'kam cara kolunon. Kotului amat magun hiri ahtoi tutang hokolahi sama arop'kam, eamkah orih pokarah ijo ihkam magun numbun tobiat kolunon, kolou ulun-ulun ijo eam kosono Pohotala?

⁴ Amat anai ijo nuhtui, ‘‘Ihkai umba Paulus,’’ tutang ijo bohkon nuhtui, ‘‘Ihkai umba Apolos,’’ eamkah orih pokarah ijo Konduang bohadat kolou ulun-ulun kolunon?

⁵ Kotu'ui iai Apolos rih? Tutang iai Paulus rih? Ihkai tihkas dolang pohalu Pohotala, ijo ius niting ihkam ahkan porocaya umba Kristus. Ihkai baya molalus gawi ijo tonyuhu Tuhan ahkan ihkai nyinong behti.

⁶ Ahku ijo ngombulan, tutang Apolos ijo nyiramoh, tahpi Pohotala bongoi ijo nguan komulan rih bolum.

⁷ Jadi ijo boguna iorih Pohotala, tului Io ijo mombolumoh. Ijo ngombulan tutang ijo nyiramoh eam boguna.

⁸ Koduooh anai kosamaoh. Nyino-nyinong tihkas ahkan norima opah numbun hekabo'o iro.

⁹ Ihkai anairih ulun-ulun ijo hombo-homboh bogawi ahkan Pohotala; tutang ihkam anairih kolou umon Pohotala. Konduang-konduang anairih ka'a kolou lohpou Pohotala.

¹⁰ Umba kotoun ijo tononga Pohotala, ahku kolou ahli mangun, hawuiius ngina galang ahkan gedung rih, tutang ulun bohkon mangun gedung ang isun galang rih. Nyinong ulun harus nohtoanioh moro-morong koloukuwoh io mangunoh ang ngosan galang rih.

¹¹ Tului Pohotala bongoi jari potuot Yesus Kristus kolou ihco-ihcooh, galang ahkan gedung rih; eam aro galang ijo bohkon.

¹² Anai ijo mangun ang ngosan galang rih, hawui hapan bulou, anai ijo hapa perak, anai ijo hapa bahtu permata, anai hino ijo hapan kahju, anai ijo hapa uru koring ata'aika topilai.

¹³ Gawin nyinong ulun ahkan gitan noin ang uhun Kristus lombut hoduli. Kotului ang ondou orih baho ahkan nguan gawin nyino-nyinong ulun botarang. Baho ahkan nguji tutang nukas mutu tahkan gawi rih.

¹⁴ Amat gedung ijo tonombok ulun ang ngosan galang rih tahan pahpong baho, ulun rih ahkan norima upahoh.

¹⁵ Tahpi amat gawin ulun rih topahpong, io ahkan rugi; io bongoi ahkan solamat, io kolou ulun lolos nguha baho.

¹⁶ Kota'ankah Konduang, ijo ihkam anai Lohpou Pohotala? Tutang ijo Roh Pohotala mohcon ang luwang ihkam?

¹⁷ Amat anai ulun ijo morusak Lohpou Pohotala, Pohotala ka ahkan morusak ulun rih. Kotului Lohpou Pohotala anai khusus ain Pohotala iou, tutang ihkam Lohpou rih.

¹⁸ Ararih ihcobehti ka ngabalik aropoh bongoi. Amat anai ulun ang louk'kam, komo aropoh horahti numbun tihpong kolunon tuh, ulun rih harus kolou ulun uong, mangat io monjadi moro-morong horahti.

¹⁹ Kotului ijo ngohu aropoh horahti kobain kolunon, orih rih kouong ang toharep Pohotala. Aang Surat Borasih tonyurat, ‘‘Pohotala nyokohtung ulun-ulun horahti aang koahpik iro bongoi.’’

²⁰ Anai tonyurat koloutuh ka'a, ‘‘Tuhan kota'an ijo tiruk ulun-ulun horahti orihrih tiruk ijo eam boguna.’’

²¹ Kotului orih, ara ihcobehti ka tonyanjung-nyanjung kolunon, tului kopari-paring oh jari tononga monjadi ain'kam:

²² Paulus, Apolos, Petrus, kolunon tuh, pombolum tutang popahtoi, jaman tuh ata'ai ka jaman ijo ahkan lombut, kopari-paringoh anai ain'kam.

²³ Tutang ihkam anaioh, ain Kristus, tutang Kristus, ain Pohotala.