1 KORINTUS 2 - BOWOT BOHUA

Borihta tohou Kristus mahtoi nyopolahki

¹ Konduang-konduang! Aang ohkot ahku lombut nohkuh ihkam tutang mborihta ahkan'kam tohou rancana Pohotala ijo jaha ngota'an kobain kolunon, ahku eam hapa kohorahtin kolunon tuh, ata'ai pander umba auh ijo muluk-muluk.

² Tului ahku ius nehkat, ijo kotahin ahku anai hihco ihkam. Ahku eam ahkan monyorihta ino-inon, bohkon tohou Yesus Kristus; khususoh, ijo Io jari mahtoi nyopolahki.

³ Kotihka ahku anai umba ihkam, ahku bolomu tutang moruguh mihkoh.

⁴ Borihta ijo ahku nyiaroh ahkan'kam, eam ahku nyapaioh umba tuhtui monyak nyaling numbun kohorahtin ulun. Tahpi ahku monyiaroh rih umba cara ijo korinah, ijo Roh Pohotala bokowasa.

⁵ Ahku nguai kodorih, mangat koporocayan'kam umba Kristus, eam hogalang kohorahtin ulun, molekan hogalang kowasan Pohotala.

Kopihtar Pohotala

⁶ Oluka kodorih ang louk ulun-ulun ijo pombolum rohanioh jari botuo, ahku puna pander tohou kopihtar. Tahpi kopihtar tuh bohkon kopihtaran kolunon, ata'ai kopihtaran dolang pongowasaoh jaman tuh, ijo kowasaioh ahkan dilap.

⁷ Kopihtar ijo ahku nyorihtaoh tuh, iorih kopihtar tahkan Pohotala. Kopihtar rih eam tongota'an kobain kopihtaran kolunon, tahpi Pohotala jari nahtap ahkan kosanang ihto sounumba kolunon tuh jari tona'oi.

⁸ Eam ihcobehti ka tahkan pongowasa-pongowasa jaman tuh, ijo ngota'an tohou kopihtar rih. Kotului, jakaoh iro jari mongota'aioh, tontu iro eam ahkan nyopolahki Tuhan ihco tonohoromat rih.

⁹ Tombalikoh, hal rih, anai kolou auh ijo tonyurat aang Surat Borasih, ‘‘Inon ijo eam pu'u tonopahjah ata'ai konahan kobain ulun, tutang eam pu'u hino lombut aang tiruk ulun orih ijo tonahtap Pohotala ahkan ulun-ulun ijo sita Io.’’

¹⁰ Tahpi Pohotala jari ngorinahoh ahkan ihto hawui nguha Roh-Oh. Roh Pohotala moriksa dolang hal'co, nyiring umba dolang rancana Pohotala ijo paling bosuhuk samasino ka.

¹¹ Kotului ijo mongota'an usin ahtoi ihcobehti, orihrih roh ulun rih bongoi, kowa? Kodorih ka'a tohou Pohotala. Ijo ngota'an usin ahtoi Pohotala tihkas Roh Pohotala rih bongoi!

¹² Tutang ihto eam tononga roh kolunon tuh, molekan Roh ijo tahkan Pohotala, mangat ihto ngota'an, paringoh pononganasi Pohotala ahkan ihto.

¹³ Kotului rih, amat ihkai monarang dolang hal tohou Pohotala ahkan ulun-ulun ijo anaingina Roh Pohotala, ihkai eam monarangoh numbun kopihtaran kolunon, molekan numbun ajar Roh Pohotala.

¹⁴ Ulun ijo eam anaingina Roh Pohotala, eam dahpot monorima inon ijo ngorinah bain Roh rih. Kotului bagi ulun rih dolang hal konohawot kolou ihco kouong bewe. Ulun rih eam duon mohorahtioh, tului hal-hal rih tihkas duon tonilaioh numbun rohani.

¹⁵ Ulun ijo anaingina Roh Pohotala duon monilai paring a'angihco, tahpi eam ihcobehti ka, bohak monilai Io.

¹⁶ Luwang Surat Borasih tonyurat, ‘‘Iai ijo kota'an tiruk Tuhan? Tutang iai ijo duon moningak Io?’’ Ihto ijo tepun tiruk ijo sama umba Kristus.