1 KORINTUS 16 - BOWOT BOHUA

Pononga ahkan sama ihto ulun Kristen

¹ Uhuntuh tohou duit ijo ihkam kani nongaoh ahkan sama ihto ulun Kristen, ahku pingat mangat ihkam nguai sorurui potunjuk ijo jari ahku nonga ahkan ukup-ukup ang Galatia.

² Aang ondou pahtukoh, nyinong menggu, kopiosoh Konduang paringoh misah duit, nyinong behti sorurui umba kodahpotoh. Ngina duit orih nyiring ahku lombut, mangat aang ohkot rih eam porulu hino tonipun.

³ Noin amat ahku lombut, ahku ahkan nyuhu ulun-ulun ijo jari ihkam sotujuoh. Ahku ahkan nonga ahkan iro surat pongitot, mangat iro ngomin duit pononga rih nokuh Yerusalem.

⁴ Tutang amat topahjahoh pios, ijo ahku tulak ka'a umba iro, mahka ahku ahkan tulak homboh iro.

Rancana Paulus

⁵ Ahku ahkan masap ihkam ulimba nguha Makedonia, bain ahku boniat ahkan nguha anan.

⁶ Tou ka'a ahku ahkan mohcon honjulu umba ihkam, mihkoh kotahin musim sorongin. Uliorih ihkam duon dohop ahku noturus ponyalak nokuh unuk ijo pongooh.

⁷ Ahku eam kani masap ihkam, sokadar tondo iou. Amat Tuhan ngijin, ahku jolik mohcon hawui tahi umba ihkam.

⁸ Pondehan rih ahku ahkan mohcon ang lowu tuh, ang Epesus, nyiring Ondou Pentakosta.

⁹ Aro kosapetoh ang ohtoi ahkan karon-gawi ijo boguna, olu ka aro ka'a ulun ijo molawan.

¹⁰ Amat Timoteus lombut, nyambut io honong pios, mangat io nginyam rajin ang louk ihkam, tului io kolou ahku ka'a bogawi ahkan Tuhan.

¹¹ A'ai nyiring anai ijo moremeh io. Dohop io mangat io duon noturus ponyalaioh buli nokuh ahku hawui solamat, kotului ahku ngindoi polombutoh, homboh umba konduang-konduang ijo bohkonoh.

¹² Tohou konduang ihto Apolos, jari pira tikat ahku nonga tiruk ahkaioh, mangat io homboh konduang ijo bohkonoh, tulak masap ihkam. Tahpi io jaha komo yakin, ijo io harus tulak uhuntuh. Olu kodorih, amat anai kosapet noin, puna io ahkan lombut.

Ponuhtup surat

¹³ Kohondakrih ihkam borondong tutang segah ang pombolum'mu kolou ulun Kristen. Nguanaang hawui bohanyi tutang jadi ba'as.

¹⁴ Paring ijo ihkam nguai, nguan rih hawui ngasi.

¹⁵ Konduang punaoh ngosono Stepanus tutang ukup jolahai; iro ijo pahtukoh monjadi ulun Kristen ang Akhaya. Iro honong kotuwi ahtoi, bogawi khusus ahkan mohalu ukup Pohotala.

¹⁶ Ahku nongatiruk honong tu'u-tu'u, mangat ihkam nutut okon ulun-ulun ijo kolourih, hawui ulun-ulun bohkon ijo bogawi sama tutang mohalu homboh iro.

¹⁷ Ahku sanang ngosan polombut Stepanus, Portunatus, tutang Akkaikus; Iro koloujahka tokirin ihkam ahkak'ku.

¹⁸ Iro jari napa ahtoi'ku monjadi jorih, kolou iro ngojorih ahtoi'mu. Ulun-ulun kolou orih harus tonorega.

¹⁹ Ukup-ukup ang Asia ngirim taben iro ahkan ihkam. Akwila tutang Priskila, hawui ukup ijo hopuhpung ang lohpou iro ka, ngirim taben Kristen ijo bolasut.

²⁰ Paring konduang ang ohtoi ngirim tahbe ahkan ihkam. Hotabe-hotabe ijo mesra kolou konduang Kristen.

²¹ Ahku ndahangoh ang ohtoi, tabe ijo ahku nyuratoh bongok: Tahbe tahkan ahku, Paulus.

²² Ulun ijo eam sita Tuhan, nauhoh io buah tulut! MARANAHTA – Tuhan ihkai, lombut iou!

²³ Keleh Tuhan Yesus mborehkat Konduang.

²⁴ Homboh kasih ahkan Konduang paringoh ijo hihco umba Kristus Yesus. Horomat ihkai, Paulus