1 KORINTUS 14 - BOWOT BOHUA

Pira-pira kotorangan tohou pononga tahkan Roh Pohotala

¹ Hondakrih ihkam ngurahjalan ahkan mongasi ulun-ulun bohkon. Tutang ngurahjalan ka'a ahkan norima pononga-pononga ijo tonongaoh Roh Pohotala, pahtukoh samasino bosodia monyiar rancana-rancana ain Pohotala ahkan ulun kolunon.

² Ulun ijo bopander a'ang basa ijo helan, ulun rih eamoh pander ahkan ulun; io bopander umba Pohotala. Eam aro ulun ijo horahti inon ijo io nuhtuioh, kotului Roh Pohotala ijo ngotuluioh io ngohawot hal-hal ijo tihkas ang tongota'an Pohotala.

³ Tobalikoh ulun ijo nyiar borihta tahkan Pohotala, io monyiaroh ahkan ulun, mangat ngoba'as'ndo, ahkan nonga somangat ahkan'ndo tutang ahkan mapung'ndo.

⁴ Ulun ijo bopander a'ang basa ijo helan tihkas hapan ngoba'as aropoh bongoi iou, rahatoh ulun ijo monyiar borihta tahkan Pohotala dohop ukup monjadi miar.

⁵ Pahamrih kohinutoh amat Konduang paringoh tou pander, umba bomahcam basa ijo helan. Tahpi ijo paling pios, iorih amat Konduang tou mborihta rancana-rancana ain Pohotala. Tului ulun ijo monyiar borihta tahkan Pohotala, labih hajo tahkanumba ulun ijo bopander umba bomahcam basa ijo helan; bohkon haloh, amat ulun ijo bopander a'ang bomahcam basa ijo helan rih, dahpot monarangoh inon ijo tonuhtuioh rih, mangat hopus ukup dahpot mopa'atoh.

⁶ Amat ahku, jahkaoh lombut nokuh ihkam, tutang ahku bopander a'ang bomahcam basa ijo helan, inon mopa'at rih ahkan ihkam? Eam aro mopa'at honjiot ka! Bohkon haloh, amat ahku ngorinah ihco kalimat tahkan Pohotala, ata'ai ahku monarang ang'co tohou Pohotala, ata'ai ahku nyiar borihta tahkan Pohotala, ata'ai ahku majar.

⁷ Pokakas-pokakas musik ijo earo hasongoh honjiot ka, kolou upamaoh suling tutang konyapi, amat lagu-laguoh eam tonowah hawui jelas, koloukuwoh ulun tou ngota'an lagu inon ijo tonowahoh?

⁸ Ihco sutu ijo bohkon hino: Amat tarompet himun bororangai, iai ijo monahtap aropoh tulak hokolahi?

⁹ Kodorih ka'a umba kosanggupan ihkam ahkan bopander umba aro mahcam basa ijo helan. Amat Konduang umba kosanggupan rih ngohawotoh auh-auh ijo eam tarang, eam anai ihcobehti ka ijo tou horahti, inon ijo Konduang nuhtuioh. Tuhtui-tuhtui emu rih nihou eam boromana.

¹⁰ Ang kolunon tuh anai papira aro basa, tahpi earo ihco ka tahkan basa-basa rih jo eam anai rimai.

¹¹ Tahpi amat ahku eam horahti basa ijo tonohawot ihcobehti, mahka ulun ijo hapan basa rih sama kolou ulun bohkonuhtus toharep ahku; kodorih ka'a ahku toharep io.

¹² Tohou ihkam bongom, ahku kota'an ihkam jolik samasino dahpot pononga-pononga tahkan Roh Pohotala. Tahpi ijo mombahtang samasino, harusrih ihkam ngurahjalan ahkan hapan kosanggup ijo dohop ukup monjadi miar.

¹³ Orih kotuluioh ulun ijo bopander a'ang basa ijo helan, harusrih nyawot umba Pohotala, mangat io tononga ka'a kosanggup ahkan monarang inon ijo tonuhtuioh rih.

¹⁴ Kotului amat ahku bodo'a umba basa ijo helan, roh'ku puna bodo'a, tahpi tiruk'ku eam bogawi.

¹⁵ Jadi ahku harus nguan inon? Ituh ijo ahkan ahku nguai: Ahku ahkan bodo'a honong roh'ku, tahpi ahku ahkan bodo'a ka'a umba tiruk'ku. Ahku ahkan monyanyi umba roh'ku, tahpi ahku kani monyanyi ka'a umba tiruk'ku.

¹⁶ Kotului amat Konduang ngohawot torimakasih ahkan Pohotala umba roh'mu iou, tutang anai ulun bohkon ijo eam horahti basa helan ijo tahkan Roh Pohotala rih, mahka ulun rih eam dahpot nuhtui ‘‘Ahku sotuju’’ toharep do'a torimakasih'mu rih, tului io eam kota'an inon ijo konduang nuhtuioh.

¹⁷ Oluka do'a torimakasih'mu ahkan Tuhan orih labih pios, tahpi do'a rih eam anai gunaioh samasino bagi ulun bohkon.

¹⁸ Ahku norimakasih ahkan Pohotala tului ahku bongok tou bopander ang mahca-mahcam basa ijo helan, labih tahkan Konduang paring.

¹⁹ Tahpi, ang luwang puhpung-puhpung ahkan nyembah Tuhan, ahku labih jolik hapan limo tuhtui ijo tou tohorahti ulun, tahkanumba hapan bokuhjan-kuhjan tuhtui a'ang basa ijo helan. Ahku labih jolik kodorih, mangat ahku tou majar ulun.

²⁰ Konduang-konduang! Ara niruk kolou anak-inyam. A'ang hal koja'at, hondakrih ihkam tehtep kolou anak-inyam. Tahpi a'ang tiruk hondakrih ihkam monjadi ulun ijo oko.

²¹ A'ang Surat Borasih tonyurat koloutuh, ‘‘Tuhan nuhtui, ‘Hawui nguha ulun-ulun ijo bopander umba basa ijo ganjil, Ahku pander umba ukup tuh. Molekan hawui nguha ulun-ulun bohkonuhtus, Ahku ahkan pander umba ukup-Ku, olu kodorih, iro eam kani ngonih karon-auh-Ku!’ ’’

²² Jadi pononga ahkan pander umba bomahcam basa ijo helan, anairih kolou tanda ahkan ulun ijo eam porocaya, bohkon ahkan ulun ijo porocaya. Tutang pononga ahkan mborihta rancana Pohotala umba kolunon, anairih tanda ahkan ulun ijo porocaya, eam ahkan ulun ijo eam porocaya.

²³ Kotului orih, amat jahkaoh, ang tohun puhpung ukup, hopus ukup pander a'ang bomahcam basa ijo helan, turus lombut pira-pira ulun luar, ata'ai ulun-ulun ijo bohkon Kristen, tontu ulun-ulun rih ahkan ngohu ihkam jari bobucon paringoh!

²⁴ Tahpi amat Konduang paringoh nyiar borihta tahkan Pohotala, turus lombut ihcobehti ijo bohkon Kristen ata'ai ihcobehti luar, mahka hal-hal ijo tonyiar bain Konduang paringoh, ahkan ngorinah dusa-dusan ulun rih, tutang nguan io sadar ahkan dusai-dusaioh.

²⁵ Hal-hal ijo bosuhuk ang ahtoioh ahkan tokorinah, nyiring io ahkan ngominda aropoh turus nyembah Pohotala. Io ahkan ngahku ijo Pohotala moro-morong anai ang tohun ihkam.

Tahta cara aang ukup

²⁶ Jadi, Konduang-konduang, inon rimaioh paringoh rih? Amat ihkam hopuhpung ahkan nyembah Tuhan, anai ijo monyanyi, anai ijo majar, anai ijo mborihta angihco tahkan Pohotala, anai ijo bopander a'ang basa ijo helan, tutang anai ijo monarang inon ijo tonuhtui rih. Tahpi paringoh orih harus nguaioh mangat majar tutang mangat ahkan kopios paringoh.

²⁷ Amat anai ijo kani bopander a'ang basa ijo helan, harusrih duo ata'ai paling aro tolu behti cara hotolinjam. Tutang harus anai ijo monarangoh, inon ijo tonuhtui bain ulun ijo bopander rih.

²⁸ Amat eam anai ijo tou monarangoh, mahka ulun-ulun ijo bopander ang basa ijo helan rih, pahtut tonih ang puhpung orih. Nauh iro bopander a'ang ahtoi iou ahkan Pohotala.

²⁹ Duo ata'ai tolu behti ijo anaingina borihta tahkan Pohotala, harus nyapai mborihta rih pondehan ijo bohkon, nimbang inon ijo tonuhtui rih.

³⁰ Tahpi amat jahkaoh borihta tahkan Pohotala rih, lombut aang ihcobehti bohkon, ijo tuot a'ang puhpung rih, mahka ulun ijo rahat bopander rih, harus tondo.

³¹ Honong cara ijo kodorih, Konduang-konduang paringoh, mihco-mihco tou monyapaioh borihta tahkan Pohotala; mangat paringoh duon norima ajar tutang monjadi mahi porocaya.

³² Pononganasi tahkan Roh ahkan nyapai borihta tahkan Pohotala, dahpot tonomorong bain ulun ijo nyapai borihta rih.

³³ Pohotala anai Pohotala ijo jolik ahkan tertib. Io bohkon Pohotala ijo jolik a'ang koridu. Kolou ijo monjadi ang tohun ukup Pohotala,

³⁴ bawi harus tonih ang ohkot rapat ukup. Iro eam dahpot ijin bopander. Iro eam tou nambit gawinokon, orihrih hototurung umba hadat agama.

³⁵ Amat iro kani mongota'an angihco, iro harus ngisok orihrih umba bosai iro ang lohpou. Paham mia amat ihcobehti ulunbawi bopander ang tohun puhpung ukup.

³⁶ Inon auh Pohotala, lombut tahkan ihkam? ata'ai tihkas ahkan'kam iou auh rih tonyapaioh?

³⁷ Amat anai ulun ijo nanyam anai pononga, ahkan nyiar mborihta tahkan Pohotala, ata'ai io anai pononga ijo bohkon, tahkan Roh Pohotala, ulun rih harus sadar, ijo inon ijo ahku nyuratoh tuh anairih poretah tahkan Tuhan.

³⁸ Tahpi amat anai ijo eam norima tuh, ara poduli io.

³⁹ Bain tului orih, Konduang-konduang ngurahjalan ahkan duon monyiar borihta tahkan Pohotala, tahpi a'ai ngohana ulun ijo kani bopander aang aro mahcam basa ijo helan.

⁴⁰ Tahpi paringoh harus konuan honong pios tutang toahtur.