1 KORINTUS 13 - BOWOT BOHUA

Pongasih

¹ Oluka ahku dahpot bopander umba bomahcam basan kolunon, nyiring umba basa karon-molehkat samasino ka, tahpi ahku earo mongasih ulun bohkon, mahka pander-pander'ku orih baya auh ijo muhing earo rimai.

² Oluka ahku ahpik nyiar borita tahkan Pohotala rih, tutang horahti paring hal ijo timbon-timbon, tutang ngota'an kokaro aang'co hawui paham porocaya umba Pohotala, nyiring dahpot nguan puruk bokisat tahpi ahku eam ngasi ulun-ulun bohkon, mahka ahku eam aro rimai ino-inon!

³ Oluka paring ijo ahku tepuioh, ahku nyodahkahoh ahkan ulun-ulun porosbolum, tutang ahku nyarah behtik'ku ahkan tomahpong, tahpi ahku eam ngasi ulun-ulun bohkon, mahka paringoh rih eam anai gunaioh samasino.

⁴ Ulun ijo ngasi ulun bohkon; sabar tutang hinut ahtoi. Io eam nyambun umba kobehu, eam bobalik, eam bojuhu.

⁵ Io eam namamarop, eam kasar, io eam maksa ulun bohkon ahkan numbun konohuangoh bongoi, eam ka'a join tosinggung, tutang eam mondondam.

⁶ Ulun ijo pongasih umba ulun-ulun bohkon, eam sanang umba koja'at, io tihkas sanang umba kopios.

⁷ Io tahan noharep paring ang'co, tutang kani porocaya umba ijo hinut ang nyinong ulun; aang koada'an ijo koloukuwoh ka ka'a ulun ijo mongasih rih, eam pu'u nihou koharapoh, tutang sabar ngindoi kokaron ang'co.

⁸ Eam pu'u ahkan anai wayah, ang umoh ulun eam porulu saling hopongasih. Uhuntuh, tuh anai ulun ijo ahpik nyiar borihta tahkan Pohotala, tahpi noin io ahkan tondo nyiar borihta rih. Uhuntuh anai ijo ahpik bopander a'ang bomahcam basa ijo helan, tahpi noin io ahkan tondo bopander aang basa-basa rih. Huntuh anai ulun ijo ngota'an aro hal, tahpi noin inon ijo iro ngota'ai rih ahkan tonolingou.

⁹ Bain pongotaan ihto tutang kosanggup ihto ahkan nyiar borihta tahkan Pohotala, magun kurang soporuna.

¹⁰ Noin ahkan johcok ohkotoh, Pohotala nguan paringoh soporuna, tutang ijo eam soporuna rih ahkan dilap.

¹¹ Ang ohkot ahku magun anak-inyam, ahku bopander kolou anak-inyam, ahku bopokomo kolou anak-inyam, tutang tiruk'ku kolou anak-inyam. Uhuntuh ahku jari oko, karon-hadat kolou anak-inyam jari ahku diaioh.

¹² Inon ijo ihto nohtooh huntuh, tuh anai rih kolou kokolingon ijo kawus ang soramin. Tahpi noin ihto ahkan nohto korinah, hawui tarang. Uhuntuh ahku jaha kota'an paringaangoh, tahpi noin ahku ahkan ngota'an paringaangoh, sama kolou Pohotala ngota'an paringoh, tohou arop'ku.

¹³ Jadi, ahkan wayah tuh, anai tolu hal ijo ihto harus tehtep nguai: porocaya, bokoharap, tutang saling ngasih. Ijo paling boguna tahkan kotolu-tolu ohrih, iorih, pongasih ulun-ulun bohkon.