Руфы чиныг 1 - Осетинская Библия. Отдельные книги Ветхого Завета

¹ Фӕтӕгты заман иуахӕмы Израилы зӕххыл скодта ӕххормаг рӕстӕг. Ӕмӕ иудейаг Вифлеемӕй иу лӕг йӕ усимӕ ӕмӕ йӕ дыууӕ фыртимӕ ацӕрынмӕ ацыди Моавы быдырмӕ.

² Уыцы лӕг хуынди Елимелех, йӕ усы ном — Наоми, йӕ фырттӕ та хуындысты Махлон ӕмӕ Килеон; уыдысты иудейаг Вифлеемӕй, ефрафӕгтӕ. Ӕрбацыдысты Моавы быдырмӕ ӕмӕ уым ӕрӕнцадысты.

³ Уалынмӕ Наомийы лӕг Елимелех амарди, ӕмӕ ус баззади йӕ дыууӕ фыртимӕ.

⁴ Лӕппутӕ ракуырдтой моаваг чызджыты, сӕ иуы ном уыди Орпа, иннӕйы ном та — Руф; ӕмӕ уым дӕс азы бӕрц фӕцардысты.

⁵ Фӕлӕ уый фӕстӕ Наомийы фырттӕ дыууӕйӕ дӕр — Махлон ӕмӕ Килеон — амардысты, ӕмӕ сылгоймаг йӕ мой ӕмӕ йӕ фырттӕн сӕ быныл баззади.

⁶ Наоми бавдӕлд ӕмӕ йӕ чындзытимӕ фӕстӕмӕ рараст ис Моавы быдырӕй, уымӕн ӕмӕ, куыд ӕрыхъуыста, афтӕмӕй Хуыцау ӕркасти йӕ адӕммӕ ӕмӕ сын хор радта.

⁷ Наоми, кӕм царди, уырдыгӕй рацыди йӕ дыууӕ чындзимӕ. Иудеймӕ фӕндагыл

⁸ Наоми йӕ чындзытӕн загъта: «Цӕут, алчидӕр уӕ йӕ цӕгатмӕ аздӕхӕд. Сымах мӕ хъӕбултӕн ӕмӕ мӕнӕн цас хӕрзты бацыдыстут, Дунедарӕг уын уыйас хӕрзтӕ схай кӕнӕд!

⁹ Дунедарӕг уын ахӕм арфӕ ракӕнӕд, ӕмӕ уӕ алчидӕр йӕ ног мойы хӕдзары ӕнцой куыд ссара». Ӕмӕ сын аба кодта, фӕлӕ чындзытӕ ӕрдиаг систой ӕмӕ, кӕугӕйӕ, загътой:

¹⁰ «Нӕ! Мах дӕр демӕ цӕуӕм дӕ адӕммӕ».

¹¹ Наоми та сын загъта: «Аздӕхут, мӕ къонатӕ; цӕмӕн хъуамӕ ацӕуат мемӕ? Исты ма, мыййаг, сымахӕн мой чи суаид, ахӕм хъӕбултӕ ис мӕ гуыбыны?

¹² Аздӕхут, мӕ къонатӕ, ацӕут; ӕз моймӕ фӕцӕуынӕн ӕгӕр базӕронд дӕн. Ӕниу, ӕз афтӕ дӕр куы зӕгъин: „Нырма мӕ ныфс ис“, ӕмӕ тӕккӕ ахсӕв лӕгимӕ куы фӕуин ӕмӕ мын уый фӕстӕ лӕппутӕ куы райгуырид,

¹³ уӕд дӕр уыдоны ралӕгмӕ хъуамӕ ӕнхъӕлмӕ кӕсиккат? Кӕдмӕ бадат, куыннӕ хъуамӕ смой кӕнат? Нӕ, мӕ къонатӕ, мӕ зӕрдӕ уыл тынг риссы, уымӕн ӕмӕ мӕ Дунедарӕг бафхӕрдта».

¹⁴ Чындзытӕ та ногӕй нырдиаг кодтой ӕмӕ ныккуыдтой. Орпа аба кодта йе ’фсинӕн ӕмӕ аздӕхти йӕ адӕммӕ, Руф та баззади йемӕ.

¹⁵ Наоми загъта Руфӕн: «Кӕсыс, дӕ файнуст йӕ адӕммӕ, йӕ хуыцӕуттӕм аздӕхт; ды дӕр дӕ файнусты фӕд-фӕд ацу».

¹⁶ Фӕлӕ Руф загъта: «Ӕвӕндонӕй дӕ цӕмӕн хъуамӕ ныууадзон? Куыд хъуамӕ ацӕуон дӕуӕй? Фӕлтау, ды кӕдӕм ацӕуай, ӕз дӕр уырдӕм фӕцӕудзынӕн; ды кӕм ӕрӕнцайай, ӕз дӕр уым ӕрӕнцайдзынӕн; дӕ адӕм суыдзысты мӕ адӕм, дӕ Хуыцау та — мӕ Хуыцау.

¹⁷ Ды кӕм амӕлай, уым ӕз дӕр амӕлдзынӕн, ӕмӕ мӕ уыцы ран баныгӕндзысты. Афтӕтӕ ӕмӕ уфтӕтӕ, стӕй ма мын ноджы фыддӕртӕ фӕуӕд Дунедарӕг, адзалӕй дарддӕр мӕ исты куы фӕхицӕн кӕна дӕуӕй».

¹⁸ Чындз фидарӕй йемӕ цӕуынвӕнд скодта, уый куы федта Наоми, уӕд уӕлдай ницыуал загъта.

¹⁹ Ӕмӕ иумӕ суанг Вифлееммӕ фӕцыдысты. Вифлееммӕ куы бахӕццӕ сты, уӕд сахар ӕнӕхъӕнӕй дӕр сызмӕлыд, ӕмӕ сылгоймӕгтӕ дзырдтой: «Уый Наоми уа?»

²⁰ Наоми сын загъта: «Наоми мӕ ма хонут, фӕлӕ мӕ хонут Мара, уымӕн ӕмӕ мын Ӕппӕтхъомыс судзаггаг маст бавзарын кодта.

²¹ Ардыгӕй дзагармӕй ацыдтӕн, фӕстӕмӕ та мӕ афтидӕй ӕрбаздӕхта Дунедарӕг. Цӕмӕн мӕ хъӕуы хонын Наоми, кӕд ӕмӕ мын Дунедарӕг хъизӕмӕрттӕ бавзарын кодта, кӕд ӕмӕ мӕ ралгъыста Ӕппӕтхъомыс».

²² Афтӕ Наоми йӕ чындзимӕ, моаваг Руфимӕ, ӕрбаздӕхти Моавы бӕстӕй. Вифлееммӕ куы ӕрбахӕццӕ сты, уӕд уыди хъӕбӕрхор кӕрдыны афон.