Райдиан 7 - Осетинская Библия. Отдельные книги Ветхого Завета

¹ Дунедарӕг Нойӕн загъта: «Бахиз наумӕ дӕ бинонтимӕ. Ныры дуджы адӕмӕй Мӕ цӕсты иунӕг ды дӕ рӕстӕвзар.

² Цӕрӕгойтӕн сӕ сыгъдӕджытӕй демӕ райс фӕйнӕ авд къайы, сыгъдӕг чи нӕу, уыдонӕй та — фӕйнӕ иу къайы.

³ Уӕларвон мӕргътӕй дӕр райс фӕйнӕ авд къайы. Уадз ӕмӕ зӕххыл баззайа сӕ мыггаг.

⁴ Авд боны фӕстӕ дыууиссӕдз боны ӕмӕ дыууиссӕдз ӕхсӕвы дӕргъы зӕххыл уадздзынӕн къӕвда. Ӕмӕ зӕххы цъарӕй фесафдзынӕн, цӕрӕг удӕй цыдӕриддӕр сфӕлдыстон, уыдон».

⁵ Ной ӕппӕт дӕр сарӕзта, Дунедарӕг ын куыд бафӕдзӕхста, афтӕ.

⁶ Зӕххыл доныхъаймӕт куы райдыдта, уӕд Нойыл цыдис ӕхсӕзсӕдӕ азы.

⁷ Доны хъаймӕтӕй Ной йӕхи бафснайдта науы, йӕ фырттӕ, йӕ ус ӕмӕ йӕ чындзытӕ дӕр — йемӕ.

⁸ Сыгъдӕг ӕмӕ ӕнӕсыгъдӕг цӕрӕгойтӕ, ноджы ма мӕргътӕ ӕмӕ алы хилӕгойтӕ

⁹ Нойы наумӕ бахызтысты къӕйттӕ, нӕлтӕ ӕмӕ сылтӕ — Хуыцау Нойӕн куыд бафӕдзӕхста, афтӕ.

¹⁰ Авд боны фӕстӕ зӕххыл райдыдта доныхъаймӕт.

¹¹ Нойӕн йӕ царды ӕхсӕзсӕдӕ фыццӕгӕм азы дыккаг мӕй куы ралӕууыди, уӕд, ӕвддӕсӕм бон, стыдтой дӕлзӕхх доны ӕппӕт гуырӕнтӕ, фегом сты арвы дуӕрттӕ,

¹² ӕмӕ зӕхмӕ калди тыгъдызӕй — дыууиссӕдз боны ӕмӕ дыууиссӕдз ӕхсӕвы.

¹³ Тӕккӕ уыцы бон бахызтысты наумӕ Ной, йӕ фырттӕ Сим, Хам ӕмӕ Йафет, стӕй йӕ ус ӕмӕ йӕ чындзытӕ.

¹⁴ Семӕ бакодтой сырд ӕмӕ фосы алы мыггагӕй, хилӕгой ӕмӕ маргъы алы мыггагӕй.

¹⁵ Цӕрӕг удӕй цыдӕриддӕр ис, се ’ппӕт дӕр ӕрбацыдысты Ноймӕ ӕмӕ къайгай бахызтысты наумӕ.

¹⁶ Цӕрӕгойтӕн сӕ алы мыггагӕй дӕр бахызти нӕлтӕ ӕмӕ сылтӕ — Хуыцау Нойӕн куыд бафӕдзӕхста, афтӕ. Ӕмӕ Дунедарӕг дуар сӕхгӕдта Нойы фӕдыл.

¹⁷ Зӕххыл доныхъаймӕт абухта дыууиссӕдз боны. Дон сбирӕ ис ӕмӕ зӕххы сӕрмӕ систа нау.

¹⁸ Дон ӕфсӕрста ӕмӕ тынг сбирӕ ис зӕххыл, ӕмӕ нау цыди доныл.

¹⁹ Дон афтӕ тынг сабузта, ӕмӕ, арвы бын бӕрзонд хохӕй цыдӕриддӕр уыди, уыдон доны бын фесты:

²⁰ фынддӕс ӕлмӕрины фӕуӕлдӕр ис дон ӕппӕты бӕрзонддӕр хӕхтӕй.

²¹ Бабын ис зӕххыл цӕрӕг алы уд дӕр: мӕргътӕ, фос, сырдтӕ ӕмӕ, зӕхх бӕз-бӕз кӕмӕй кодта, уыцы хилӕгойтӕ, стӕй адӕм иууылдӕр.

²² Зӕххы цъарыл царды комулӕфт кӕй мидӕг уыди, уыдон се ’ппӕт дӕр бабын сты.

²³ Зӕххыл цӕрӕг удӕй цыдӕриддӕр уыд — адӕмӕй, стыр ӕмӕ чысыл цӕрӕгойӕ, уӕларвон маргъӕй — мӕлӕты хъуыры аирвӕзтысты. Иууылдӕр зӕххы цъарӕй сӕфт ӕрцыдысты. Ӕрмӕст ма баззади Ной ӕмӕ, йемӕ науы чи уыди, уыдон.

²⁴ Ныр дон та зӕххы сӕрмӕ абузта дӕс ӕмӕ авдыссӕдз боны.