Райдиан 45 - Осетинская Библия. Отдельные книги Ветхого Завета

¹ Йосеф ма тыххӕй йӕхи урӕдта, йӕ цуры чи уыди, уыдоны раз ӕмӕ ныхъхъӕр кодта: «Ацӕут уе ’ппӕт дӕр!» Йосефы раз ничиуал аззадис, йӕхи йе ’фсымӕртӕн куы ӕргом кодта, уӕд,

² фӕлӕ афтӕ тынг куыдта, ӕмӕ йӕ мысырӕгтӕ дӕр фехъуыстой. Суанг фараоны галуанмӕ дӕр байхъуысти уыцы хабар.

³ Йосеф йе ’фсымӕртӕн загъта: «Ӕз Йосеф дӕн. Мӕ фыд ма ӕгас у ӕви нӕ?» Ӕфсымӕртӕ фӕуыргъуыйау сты ӕмӕ йын не сфӕрӕзтой дзуапп раттын.

⁴ Йосеф та сӕм дзуры: «Хӕстӕг мӕм ӕрбацӕут!» Куы йӕм бацыдысты, уӕд сын афтӕ: «Ӕз Йосеф дӕн, уе ’фсымӕр, Мысырмӕ кӕй ауӕй кодтат, уый.

⁵ Фӕлӕ ма хъынцъым кӕнут, ардӕм мӕ кӕй ауӕй кодтат, уый фӕдыл ныр уӕхи ма хӕрут. Уымӕн ӕмӕ мӕн уӕ цурӕй ардӕм Хуыцау рарвыста сымахӕн уӕ цард бахъахъхъӕныны тыххӕй.

⁶ Зӕххыл стонг заман куы скодта, уӕдӕй дыууӕ азы рацыд, ӕмӕ ма ноджыдӕр фондз азы дӕргъы нӕдӕр хуым кӕндзысты, нӕдӕр хуым кӕрддзысты.

⁷ Фӕлӕ мӕ Хуыцау уӕ цурӕй арвыста, цӕмӕй уын уӕ мыггаг ныууадза зӕххыл, цӕмӕй диссаджы ирвӕзт акӕнат.

⁸ Уӕдӕ мӕ ардӕм сымах нӕ рарвыстат, фӕлӕ мӕ Хуыцау рарвыста ӕмӕ мӕ фараонӕн скодта уынаффӕйы лӕг, мӕ цагъар мын бакодта уымӕн йӕ галуан ӕмӕ ӕгас Мысыры бӕстӕ.

⁹ Рӕвдздӕр ацӕут мӕ фыдмӕ ӕмӕ йын зӕгъут, дӕ фырт Йосеф дӕм ӕрвиты: „Хуыцау мӕ сӕвӕрдта ӕппӕт Мысыры сӕргъы. Рацу мӕм ӕвӕстиатӕй.

¹⁰ Ӕрцӕрдзынӕ мӕнмӕ ӕввахс, Гошены зӕххыл, дӕ цот ӕмӕ дӕ цоты цотимӕ, ӕд лыстӕг фос, ӕд стурвос, ӕд исбон.

¹¹ Уым дӕ тыхсын ницӕмӕй бауадздзынӕн. Стонг заман ма ахӕсдзӕни фондз азы, фӕлӕ нӕдӕр дӕхӕдӕг баййафдзынӕ исты хъуаг, нӕдӕр дӕ хӕдзаронтӕ, нӕдӕр дӕ фос“.

¹² Ныр уӕхи цӕстӕй уынут, сымах дӕр ӕмӕ ды дӕр, ме ’фсымӕр Бениамин, уемӕ Йосеф кӕй ныхас кӕны, уый!

¹³ Мӕ фыдӕн фехъусын кӕнут, Мысыры мын цы стыр кад ис, уый. Цыдӕриддӕр федтат, уый йын рафӕзмут ӕмӕ йӕ ӕвӕстиатӕй ардӕм ӕркӕнут».

¹⁴ Уыцы ныхӕсты фӕстӕ Йосеф йе ’фсымӕр Бениамины ӕфцӕджы ныттыхст ӕмӕ ныккуыдта. Йосефыл ныттыхсгӕйӕ, куыдта Бениамин дӕр.

¹⁵ Цӕссыг калгӕйӕ, Йосеф фӕбатӕ кодта йе ’фсымӕртӕн, ӕмӕ уый фӕстӕ сӕ бон сси йемӕ ныхас кӕнын.

¹⁶ Фараоны галуанмӕ байхъуысти, зӕгъгӕ, ӕрцыдысты Йосефы ӕфсымӕртӕ, ӕмӕ уыцы хабар фараонӕн ӕмӕ йӕ дӕлдӕртӕн дӕр ӕхсызгон уыди.

¹⁷ Фараон Йосефӕн загъта: «Де ’фсымӕртӕн афтӕ бафӕдзӕхс мӕ номӕй: „Уӕ хӕрджытыл уӕргътӕ сӕвӕрут, фӕцӕут Ханааны зӕхмӕ

¹⁸ ӕмӕ мӕм фӕстӕмӕ ӕрбацӕут уӕ фыдимӕ ӕмӕ уӕ хӕдзаронтимӕ. Ӕз уын ратдзынӕн Мысыры хуыздӕр зӕхх, ӕмӕ уӕхи ӕфсаддзыстут йӕ бӕркадӕй“.

¹⁹ Ноджы ма сын бафӕдзӕхс, уӕ сабитӕ ӕмӕ, зӕгъ, уӕ устыты раласынмӕ Мысырӕй акӕнут уӕрдӕттӕ. Раласут, зӕгъ, уӕ фыды ӕмӕ ӕрбацӕут.

²⁰ Уӕ фӕллӕйттӕ ныууадзын уӕм, зӕгъ, ӕвгъау ма фӕкӕсӕд — Мысыры зӕххыл хуыздӕрӕй цы ис, уыдон, зӕгъ, сымах уыдзысты».

²¹ Гъемӕ афтӕ бакодтой Израилы фырттӕ. Йосеф сын фараоны фӕдзӕхстмӕ гӕсгӕ радта уӕрдӕттӕ, стӕй ма фӕндаггаг дӕр.

²² Ӕфсымӕртӕн радта фӕйнӕ фӕлысты дарӕс, Бениаминӕн та — ӕвзисты ӕртӕсӕдӕ шекелы ӕмӕ фондз фӕлысты дарӕс.

²³ Йӕ фыдӕн Йосеф дӕс нӕл хӕрӕгыл арвыста Мысыры хуыздӕр хӕзнатӕй, дӕс сыл хӕрӕгыл та — хор ӕмӕ фӕндаггаг.

²⁴ Йе ’фсымӕртӕ куы цыдысты, уӕд сын бафӕдзӕхста: «Фӕндагыл-иу быцӕу ма кӕнут».

²⁵ Афтӕмӕй ӕфсымӕртӕ рараст сты Мысырӕй ӕмӕ ӕрбаздӕхтысты Ханааны зӕхмӕ, сӕ фыдмӕ, Йаковмӕ.

²⁶ Радзырдтой йын: «Йосеф сӕрӕгас у, ӕлдариуӕг кӕны ӕгас Мысыры». Йаков фӕджих ис — нӕ сыл ӕууӕндыди.

²⁷ Фӕлӕ Йосефы ныхӕстӕ сӕ фыд Йаковӕн куы рафӕзмыдтой, стӕй, йӕ раласыны тыххӕй Йосеф цы уӕрдӕттӕ сӕрвыста, уыдон куы федта, уӕд фӕныфсджындӕр ис.

²⁸ Израил загъта: «Ӕгъгъӕд фӕуӕд! Ӕгас у нырма мӕ фырт Йосеф! Цӕуон ӕмӕ ма йӕ фенон мӕ мӕлӕты размӕ».