Псаломтӕ 97 - Осетинская Библия. Отдельные книги Ветхого Завета

¹ Псалом. Зарут Дунедарӕгӕн ног зарӕг, уымӕн ӕмӕ Уый диссӕгтӕ сарӕзта. Йӕ рахиз къухӕй, Йӕ уаз къухӕй Уый райста уӕлахиз!

² Дунедарӕг раргом кодта Йӕ ирвӕзындзинад, ӕппӕт адӕмтӕн раргом кодта Йӕ рӕстад.

³ Йӕ зӕрдыл ӕрлӕууыди Йӕ хорзӕх, Израилы адӕмыл иузӕрдион кӕй у, уый. Ӕмӕ зӕххы кӕрӕттӕм адӕмтӕ нӕ Хуыцауы ирвӕзындзинад федтой.

⁴ Цинӕй райут Дунедарӕгыл, ӕгас зӕххы цӕрджытӕ! Цинхъӕр кӕнут, хъӕлдзӕг ут ӕмӕ зарут!

⁵ Зарут Дунедарӕгӕн дыууадӕстӕнонты цагъдимӕ, Зарут хъӕрӕй дыууадӕстӕнонты зӕлтимӕ!

⁶ Хӕтӕлтӕ ӕмӕ сыкъауадындзы цагъдимӕ цинӕй райут уӕ Паддзахы, Дунедарӕджы раз!

⁷ Нӕрӕд денджыз ӕмӕ дзы цыдӕриддӕр ис, уыдон, цинвӕдис кӕнӕд дун-дуне йе ’ппӕт цӕрджытимӕ!

⁸ Цӕугӕдӕттӕ Йын ӕмдзӕгъд кӕнӕнт, цин кӕнӕнт хӕхтӕ

⁹ Дунедарӕджы раз, Уымӕн ӕмӕ Уый зӕххӕн тӕрхон кӕнынмӕ рацӕуы. Уый дун-дунейӕн рахӕсдзӕн рӕстаг ӕмӕ ӕнӕхӕрам тӕрхон.