Псаломтӕ 90 - Осетинская Библия. Отдельные книги Ветхого Завета

¹ Иууылбӕрзондӕн Йӕ дӕлбазыр чи цӕры, уый Ӕппӕтхъомысы аууоны ссары ӕнцой.

² Дунедарӕгӕн зӕгъы: «Ды — мӕ ирвӕзӕн фидар, мӕ къӕдзӕх, мӕ зӕрдӕ Кӕуыл дарын, уыцы Хуыцау!»

³ Уый дӕ фервӕзын кӕндзӕн ахсӕн хызӕй ӕмӕ алы фыдбылызӕй.

⁴ Йӕ базыры бын дӕ бакӕндзӕн, ӕмӕ дын тас ницӕмӕй уыдзӕн. Йӕ иузӕрдиондзинад — дӕ сис ӕмӕ дӕ уарт.

⁵ Ӕхсӕв дын тас нӕ уыдзӕни фыдмонтӕй, боныгон — тӕхгӕ фатӕй,

⁶ талынджы хъуызӕг емынӕйӕ ӕмӕ ӕмбисбон сафӕг рынӕй.

⁷ Минӕй ӕрхаудзысты Дӕ разы, дӕс мины та — дӕ рахизфарс, фӕлӕ ды баззайдзынӕ ӕвыдӕй.

⁸ Ӕрмӕстдӕр ӕвдисӕн уыдзынӕ — дӕхи цӕстӕй фыдлӕгты ӕфхӕрд фендзынӕ.

⁹ Уымӕн ӕмӕ ды загътай: «Мӕ зӕрдӕ Дунедарӕгыл дарын». Дунедарӕгыл бафӕдзӕхстай дӕхи,

¹⁰ ӕмӕ фыдбылызы нӕ бахаудзынӕ, дӕ хӕдзармӕ бӕллӕх нӕ бацӕудзӕн.

¹¹ Бафӕдзӕхсдзӕни дӕ Йӕ зӕдтӕн — дӕ алы фӕндагыл дӕ бахъахъхъӕндзысты.

¹² Сӕ къухтыл дӕ ахӕсдзысты, ӕмӕ дӕ къах дурыл дӕр не скъуырдзынӕ.

¹³ Домбай ӕмӕ сау калмы дӕ къӕхты бын кӕндзынӕ, домбай ӕмӕ залымы ныссӕнддзынӕ.

¹⁴ Дунедарӕг зӕгъы: «Уарзы Мӕ, ӕмӕ йӕ Ӕз фервӕзын кӕндзынӕн Мӕ ном Мын зоны, ӕмӕ йӕ Ӕз бахиздзынӕн.

¹⁵ Фӕсиддзӕн Мӕм, ӕмӕ йӕ Ӕз фехъусдзынӕн. Йӕ тыхсты сахат йемӕ дӕн. Ӕххуысмӕ йӕм фӕзындзынӕн ӕмӕ йӕ скадджын кӕндзынӕн.

¹⁶ Царды бонтӕй йӕ бафсаддзынӕн, Мӕ ирвӕзындзинад ын раргом кӕндзынӕн».