Псаломтӕ 82 - Осетинская Библия. Отдельные книги Ветхого Завета

¹ Зарӕг. Асафы псалом.

² О Хуыцау, ма у ӕнӕсым, ма лӕуу ӕнцад! ма у ӕнӕдзуапп, Хуыцау!

³ Ӕркӕс-ма, Де знӕгтӕ мӕ сӕ хъӕрахсты бын фӕкодтой. Йе сӕфт Дӕ чи уыны, уыдон схӕцыдысты сӕ сӕртыл.

⁴ Дӕ адӕмы ныхмӕ Дын сарӕзтой фыдвӕнд. Дӕ базыры бын кӕй бакодтай, уыдоны ныхмӕ уынаффӕтӕ кӕнынц.

⁵ Зӕгъынц: «Цӕй ӕмӕ ацы адӕмы ныццӕгъдӕм, цӕмӕй Израилы номӕн йӕ кой, йӕ хъӕр дӕр макуыуал райхъуыса!»

⁶ Ӕмзӕрдӕйӕ баныхас кодтой, Дӕ ныхмӕ цӕдис сарӕзтой:

⁷ Едомы цатырты цӕрджытӕ, измаелӕгтӕ, моавӕгтӕ, агарӕгтӕ,

⁸ гевалӕгтӕ, аммонӕгтӕ, амалекӕгтӕ, филистимӕгтӕ Тиры цӕрджытимӕ.

⁹ Сӕ фарс рахӕцыдысты ассириӕгтӕ дӕр, Лоты байзӕддӕгтӕн сӕ хъаруйыл бафтыдтой.

¹⁰ Уӕдӕ сӕ бабын кӕн, Кишоны былгӕрон мидианӕгты, Сисерайы ӕмӕ Йавины куыд бабын кодтай,

¹¹ Ен-Доры цӕрджытӕ куыд фӕцагъды сты ӕмӕ сӕ мӕрдтӕ зӕххӕн хъацӕн куыд фестадысты, уыйау!

¹² Сӕ раздзӕуджыты сын амар Орев ӕмӕ Зеевау, сӕ фӕтӕгты та — Зевах ӕмӕ Цалмуннӕйау!

¹³ Уымӕн ӕмӕ уыдон дзырдтой: «Мах бацахсдзыстӕм Хуыцауы зӕххытӕ».

¹⁴ О мӕ Хуыцау, фӕсур сӕ, дымгӕ йӕ уӕлныхты уаддзалх кӕнӕ зыгуымы муртӕ куыд ахӕссы, уыйау!

¹⁵ Хъӕды бӕлӕстыл зынг куыд сирвӕзы, хӕхтыл арты пиллон куыд афӕйлауы,

¹⁶ афтӕ сӕ Дӕ тымыгъӕй ныффалгӕрон кӕн, Дӕ зилгӕ уадӕй сыл фыд азар бафтау!

¹⁷ Се ’фсарм куыд ссудза ӕмӕ Дӕ куыд бацагурой, Дунедарӕг, афтӕ сын бакӕн!

¹⁸ Мыггагмӕ сыл худинаджы гакк сӕвӕр, фыд тас сыл бафтау! Уадз ӕмӕ фӕхудинаг уой ӕмӕ бабын уой!

¹⁹ Уадз ӕмӕ базоной, Дӕ ном Дунедарӕг кӕй у, ӕрмӕст Ды кӕй дӕ Бӕрзӕндтыл Бадӕг ӕгас зӕххы сӕрмӕ!