Псаломтӕ 80 - Осетинская Библия. Отдельные книги Ветхого Завета

¹ Зарӕггӕнджыты къорды разамонӕгӕн. «Ха-гиттит»-ы зӕлтӕм гӕсгӕ. Асафы псалом.

² Цингӕнгӕ зарут Хуыцауӕн — Уый нӕ тых у! Цины хъӕр сисут Йаковы Хуыцауы кадӕн!

³ Ныззарут Ын, рӕсугъд Ын ӕрцӕгъдут далатӕй, ӕхцонзӕл дыууадӕстӕнонтӕй ӕмӕ хъисфӕндыртӕй!

⁴ Сыкъауадындзӕй-иу ныууасут мӕйноджы ӕмӕ цӕлхыдзаг мӕйы бӕрӕгбӕтты рӕстӕджы!

⁵ Уый Израилӕн у ӕгъдау, Йаковы Хуыцауы амынд.

⁶ Йосефы байзӕддагӕн ӕй бафӕдзӕхста, Мысыры зӕххӕй куы рацыдысты, уӕд. Уым фыццаг хатт, кӕй нӕ зыдтой, уыцы хъӕлӕс фехъуыстой:

⁷ «Де уӕхсчытӕй дын де ’ргъом ӕристон, дӕ чыргъӕдтӕ дын айстон дӕ къухтӕй.

⁸ Уынгӕджы сахат Мӕм сдзынӕзтай, ӕмӕ дӕ Ӕз фервӕзын кодтон, сау ӕврагъы хуылфӕй дын дзуапп радтон, Меривайы доны цур дӕ бафӕлвӕрдтон.

⁹ Мӕ адӕм, ӕрбайхъусут-ма ногӕй Мӕ фӕдзӕхстмӕ! О Израил, куы Мӕм байхъусис!

¹⁰ Ӕцӕгӕлон хуыцауыл дӕхи макуы бафӕдзӕхс, ӕндӕрбӕстаг хуыцаумӕ макуы скув!

¹¹ Ӕз Дунедарӕг дӕн, дӕ Хуыцау, Мысыры зӕххӕй дӕ Чи ракодта, уый. Байгом кӕн дӕ дзых, ӕмӕ дӕ бафсадон.

¹² Фӕлӕ Мӕм Мӕ адӕм нӕ байхъуыстой. Израил Мӕ коммӕ нӕ касти.

¹³ Сӕ хиваст зӕрдӕйы бар сӕ ныууагътон, ӕмӕ сӕ цыдӕриддӕр фӕндыд, уыдӕттӕ кодтой.

¹⁴ Тӕхуды, куы Мӕм байхъуыстаиккой Мӕ адӕм! Израил Мӕ фӕндагыл куы цыдаид!

¹⁵ Ӕз ын уайсахат йӕ фыдгулты басастаин, йе ’фхӕрджытыл ын Мӕ азар ныххуырстаин.

¹⁶ Ӕмӕ, Дунедарӕгӕй йе сӕфт чи уыдта, уыдон зӕрдӕлхӕнӕнтӕ кодтаиккой Йӕ разы, мыггагмӕйы ӕфхӕрд райстаиккой.

¹⁷ Сымахӕн та хойрагӕн ӕвзаргӕ мӕнӕу лӕвӕрдтаид, къӕдзӕхӕй цы мыд тӕдзы, уымӕй уӕ ӕфсӕстаид».