Псаломтӕ 8 - Осетинская Библия. Отдельные книги Ветхого Завета

¹ Зарӕггӕнджыты къорды разамонӕгӕн: Сӕндуцджыты хъӕлдзӕг зарӕджы зӕлтӕм гӕсгӕ. Давиды псалом.

² О Дунедарӕг, нӕ Бардарӕг! Куыд кадджын у ӕгас зӕххыл Дӕ ном! Уӕлӕрвтӕй фӕуӕлдӕр ис Дӕ кад!

³ Чысыл сабитӕ ӕмӕ дзидзидайтӕн сыстауын кодтай Дӕхи, Де знӕгтӕн Ды равдыстай Дӕ хъару, цӕмӕй фыдгултӕ базоной сӕ бон.

⁴ Де ’нгуылдзтӕ цы уӕлӕрвтӕ сфӕлдыстой, уым цы мӕй, цы стъалытӕ ӕрцауыгътой, уыдонмӕ куы скӕсын,

⁵ уӕд фӕзӕгъын: «Цы у адӕймаг, ӕмӕ Дӕ зӕрдыл лӕууа, цы у адӕймаджы фырт, ӕмӕ йыл Ды мӕт кӕнай?»

⁶ Ды йӕ зӕдтӕй бирӕ дӕлдӕр нӕ сӕвӕрдтай, кад ӕмӕ йын цыт радтай.

⁷ Цыдӕриддӕр сфӕлдыстай — йӕ бар ын сӕ бакодтай, ӕппӕт дӕр ын йӕ къӕхты бын ӕрӕвӕрдтай:

⁸ лыстӕг фос, стуртӕ ӕмӕ хъӕддаг сырдты,

⁹ уӕларвон мӕргъты, денджызы кӕсӕгты, фурды ӕрфыты ӕппӕт змӕлджыты.

¹⁰ О Дунедарӕг, нӕ Хуыцау! Ӕппӕт дунейы кадджын у Дӕ ном!