Псаломтӕ 67 - Осетинская Библия. Отдельные книги Ветхого Завета

¹ Зарӕггӕнджыты къорды разамонӕгӕн. Давиды псалом. Зарӕг.

² Растӕд Хуыцау, Йӕ фыдгулты ныххӕлиу кӕнӕд, Йе сӕфт Дзы чи уыны, уыдон лидзӕг фӕуӕнт Йӕ цурӕй.

³ Фӕздӕг уӕлдӕфы куыд ӕрбайсӕфы, мыдадз арты куыд атайы, афтӕ ӕнӕхуыцӕуттӕ бабын уӕнт Хуыцауы раз!

⁴ Рӕстгӕнджытӕ та цин кӕнӕнт, райӕнт Хуыцауы раз.

⁵ Хуыцауы кадӕн зарут! Стаут ын Йӕ ном! Ӕврӕгътыл Чи рацӕуы, Уымӕн скад кӕнут! Йӕ ном — Дунедарӕг! Цинӕй райут Йӕ разы!

⁶ Сидзӕртӕн — сӕ фыд, сидзӕргӕстӕн сӕ сӕрылхӕцӕг — Хуыцау Йӕ уаз цӕрӕны.

⁷ Иунӕджытӕн Хуыцау бинонтӕ ратты, ахӕстыты суӕгъд кӕны сӕ рӕхыстӕй, змӕнтджытӕ та баззайынц хурсыгъд ӕдзӕрӕг быдыры.

⁸ О Хуыцау! Ды Дӕ адӕмы разӕй куы цыдтӕ, Ды куы цыдтӕ ӕдзӕрӕг быдырыл,

⁹ уӕд зӕхх ӕнкъуысти; Хуыцауы, Израилы Хуыцауы раз, къӕвда уарыди арвӕй.

¹⁰ О Хуыцау, Дӕ исбоныл-иу парахатӕй къӕвда ӕруагътай, ӕмӕ-иу фӕлмӕцыд адӕм сулӕфыдысты.

¹¹ Уыцы зӕххыл ӕрцардысты Дӕ адӕм, ӕмӕ дзы Ды, Хуыцау, мӕгуырты барӕвдыдтай Дӕ бирӕ хӕрзтӕй.

¹² Дунедарӕг загъта Йӕ ныхас, ӕмӕ Йын ӕй сылгоймӕгты ӕнӕнымӕц ӕфсад хъусын кӕндзӕни дунейыл.

¹³ Паддзӕхтӕ ӕмӕ се ’фсӕдтӕ лидзӕг фесты, хӕдзаргӕс сылгоймӕгтӕ та хъӕздыг ӕфтиаг уарынц.

¹⁴ Кӕд уӕ хӕдзӕртты арты фарсмӕ бадут, уӕддӕр тӕмӕн калдзыстут, йӕ базыртӕ ӕвзистау кӕмӕн ӕрттивынц, йӕ пакъуы та сыгъдӕг сыгъзӕринау кӕмӕн у, уыцы бӕлӕтты хуызӕн.

¹⁵ Ӕппӕтхъомыс а зӕххы паддзӕхты куы ныххӕлиу кодта, уӕд Цалмоны хохыл цыма мит ныууарыд.

¹⁶ О Хуыцауы хох, Башаны хох! О бӕрзонд хох, Башаны хох!

¹⁷ Бӕрзонд хӕхтӕ, хӕлӕггӕнгӕ цы ныккастыстут, Хуыцау Йӕхицӕн цӕрӕнуатӕн кӕй равзӕрста, Дунедарӕг мыггагмӕ кӕм цӕрдзӕн, уыцы хохмӕ?

¹⁸ Дӕсгай мин тохуӕрдӕттӕй рацӕуы Хуыцауы ӕфсад, Йӕхӕдӕг дӕр се ’хсӕн, афтӕмӕй. Дунедарӕг ӕрӕнцади Синайы хохыл — Йӕ Кувӕндоны.

¹⁹ Ды ссыдтӕ бӕрзӕндмӕ, уацайрӕгты райстай, ныронг хиваст чи уыд, уыдонӕн айстай сӕ хуынтӕ ӕмӕ уым ӕрбынат кодтай, о Дунедарӕг Хуыцау!

²⁰ Бонӕй-бонмӕ арфӕгонд уӕд Дунедарӕг! Уый фӕрцы фӕразӕм мах нӕ уаргъ хӕссын.

²¹ Нӕ Хуыцау ирвӕзынгӕнӕг Хуыцау у. Дунедарӕг Хуыцау мах суанг мӕлӕты хъӕлӕсӕй дӕр фелвасдзӕн.

²² Хуыцау ныппырх кӕндзӕн Йӕ фыдгулты сӕртӕ, фыдракӕндтӕ кӕныныл чи фӕцалх ис, уыдоны ӕнӕлвыд тенкатӕ.

²³ Дунедарӕг загъта: «Ӕз сӕ ӕрбаздахдзынӕн Башаны хохӕй, денджызы арфӕй сӕ фелвасдзынӕн,

²⁴ ӕмӕ дӕ фыдгулты туджы аныгъуылдзысты дӕ къӕхтӕ, дӕ куыдз та сын ӕй сдӕрдзӕни».

²⁵ О Хуыцау, Дӕ рацыд Дын фендзысты адӕм, Кувӕндонмӕ куыд цӕуы мӕ Хуыцау ӕмӕ мӕ Паддзах!

²⁶ Разӕй цӕудзысты зарӕггӕнджытӕ, фӕстейы — хъисын фӕндыртӕй цӕгъдджытӕ, астӕуӕй та — чызджытӕ сӕ далатимӕ.

²⁷ Уӕ бӕрӕгбӕтты заман-иу куы ӕрӕмбырд уат, уӕд иумӕ кад кӕнут Хуыцауӕн! Сыстаут Дунедарӕджы, Израилы байзӕддӕгтӕ!

²⁸ Уӕ разамонджытӕ фыццаг рӕнхъы уыдзысты Бениамины чысыл байзӕддагӕй, уыдоны фӕстӕ — Иудӕйы байзӕддагӕй, уыдоны фӕстӕ — Зевулоны байзӕддагӕй, уыдоны фӕстӕ та — Неффалимы байзӕддагӕй.

²⁹ Израилы адӕм, фидар лӕуут, уӕ Хуыцау уын куыд бафӕдзӕхста, афтӕ! О Хуыцау, мах сӕраппонд цы сарӕзтай, уый нын уагӕвӕрды хуызы сфидар кӕн!

³⁰ Паддзӕхтӕ Дын Йерусалиммӕ, Дӕ Кувӕндонмӕ, ӕрбахӕсдзысты хъалон.

³¹ Ды-иу ӕрмахуыр скӕн, хъӕзы мидӕг цы сырд цӕры, уый, адӕмты уӕнгуыты ’хсӕн богъты рӕгъау ӕрсабыр кӕн. Уадз ӕрзоныг кӕной Дӕ разы ӕмӕ Дын се ’взист ӕрбахӕссой; ныххӕлиу кӕн хӕстӕргом адӕмы!

³² Мысырӕй ӕрхуы мигӕнӕнтӕ сласдзысты; эфиопӕгтӕ сӕ къухтӕ сиваздзысты Хуыцаумӕ.

³³ А зӕххы паддзахӕдтӕ! Хуыцауы кадӕн зарут! Фӕндыртӕй цӕгъдут,

³⁴ тъымы-тъымайӕ нырмӕ Йӕ цыд уӕлӕрвты Кӕмӕн у, Уымӕн! Хуыцауӕн райхъуысы Йӕ хъӕлӕс, Йӕ хъомысджын хъӕлӕс.

³⁵ Сыстаут Хуыцауы! Израилы сӕрмӕ — Йе стырад, ӕврӕгътӕй нӕм разыны Йӕ хъомыс.

³⁶ О Хуыцау, Ды тасы ӕфтауыс Дӕ Кувӕндоны! О, Израилы Хуыцау! Уый Йӕ адӕмӕн дӕтты хъомыс ӕмӕ ӕхсар. Арфӕгонд у Хуыцау!