Псаломтӕ 65 - Осетинская Библия. Отдельные книги Ветхого Завета

¹ Сыстаут Дунедарӕджы, ӕппӕт зӕххон цӕрджытӕ!

² Сыстаут Ын Йӕ ном, скад Ын кӕнут!

³ Зӕгъут Хуыцауӕн: «Куыд тӕссаг сты Дӕ хъуыддӕгтӕ! Дӕ хъомысы фӕрцы Де знӕгтӕ ӕрсӕтдзысты Дӕ разы.

⁴ Ӕппӕт зӕххон цӕрджытӕ ӕрзоныг кӕнӕнт Дӕ разы, зарӕнт Дӕ кадӕн, Дӕ номы кадӕн зарӕнт!»

⁵ Ӕркӕсут-ма, Хуыцау цы сарӕзта, уымӕ: Йӕ хъуыддӕгтӕ тасы ӕфтауынц адӕмы.

⁶ Уый денджыз фестын кодта сурзӕхх; цӕугӕдоны сӕрты фистӕгӕй цыдыстӕм ӕмӕ цин кодтам Йӕ разы!

⁷ Йӕ хъомысы фӕрцы паддзахиуӕг кӕндзӕн ӕнусмӕ; Уый ӕппӕт адӕмтӕм Йӕ цӕст дары, цӕмӕй змӕнтджытӕ ма сыстой.

⁸ Адӕмтӕ! Арфӕ ракӕнут нӕ Хуыцауӕн, скад Ын кӕнут хъӕрӕй!

⁹ Уый нын нӕ цард хъахъхъӕны ӕмӕ нӕ фӕцудын нӕ уадзы.

¹⁰ Фӕлвӕрдтай нӕ, Хуыцау, стайын нӕ кодтай ӕвзистау.

¹¹ Ахсӕн хызы нӕ баппӕрстай, хъадамӕнтӕ ныл сӕвӕрдтай,

¹² адӕймаджы дӕлбар нӕ бакодтай. Зындоны хъиамӕт бавзӕрстам мах, ӕмӕ нӕ Ды ракодтай сӕрибармӕ.

¹³ Дӕ Кувӕндонмӕ иууылсудзинӕгтӕ бахӕсдзынӕн, мӕ сомы сӕххӕст кӕндзынӕн Дӕ разы —

¹⁴ уынгӕг заман мӕ дзыхӕй чи рацыди, уый.

¹⁵ Иууылсудзинаг нывӕндтӕ Дын ӕрхӕсдзынӕн, хӕрзхаст фысты фиу Дын ссудздзынӕн, галтӕ ӕмӕ сӕгътӕ Дын ӕрхӕсдзынӕн нывондӕн.

¹⁶ Хуыцауӕй чи тӕрсы, уыдон ӕрбацӕуӕнт ӕмӕ байхъусӕнт: цы мын сарӕзта, уый уын дзурдзынӕн.

¹⁷ Скуывтон Ӕм, скад Ын кодтон мӕ дзыхы дзырдӕй.

¹⁸ Мӕ зӕрдӕйы хӕрамӕй исты куы уыдаид, уӕд мын Бардарӕг мӕ куывд нӕ айстаид.

¹⁹ Фӕлӕ мӕ фехъуыста Хуыцау, мӕ куывд мын айста.

²⁰ Арфӕгонд у, мӕ куывдыл мын Йӕхи Чи нӕ атигъ кодта, Йӕ хорзӕхӕй мӕ Чи схайджын кодта, уыцы Хуыцау.