Псаломтӕ 53 - Осетинская Библия. Отдельные книги Ветхого Завета

¹ Зарӕггӕнджыты къорды разамонӕгӕн. Хъисфӕндырты цагъдимӕ. Давиды зондамонӕн псалом,

² зифӕгтӕ Саулмӕ куы ссыдысты ӕмӕ Давиды, йӕхи нӕ бӕстӕйы ӕмбӕхсы, зӕгъгӕ, куы банымыгътой, уӕд.

³ О Хуыцау, фервӕзын мӕ кӕн Дӕ номы руаджы, Дӕ хъаруйы фӕрцы мын равзар мӕ хъаст.

⁴ О Хуыцау, фехъус мын мӕ куывд, Дӕ хъус ӕрдар мӕ дзыхы ныхасмӕ.

⁵ Ӕцӕгӕлӕттӕ сыстадысты мӕ ныхмӕ, ӕгъатыртӕ мӕ хъавынц амарынмӕ, Хуыцауы дӕр ницӕмӕуал дарынц.

⁶ Фӕлӕ мӕнӕн Хуыцау ӕххуыс кӕны, Дунедарӕг мӕ удылхӕцӕг у,

⁷ мӕ фыдгулты бафхӕрдзӕн сӕ фыдракӕндты аххосӕй. Дӕ иузӕрдиондзинад равдис: фесаф сӕ!

⁸ Дунедарӕг, ӕз Дын нывонд ӕрхӕсдзынӕн зӕрдиагӕй, Дӕ фарнхӕссӕг ном Дын стаудзынӕн.

⁹ Уымӕн ӕмӕ мӕ Ды бахызтай алы фыдбылызӕй, ӕмӕ ныр уӕлахизӕй кӕсын мӕ фыдгултӕм.