Псаломтӕ 52 - Осетинская Библия. Отдельные книги Ветхого Завета

¹ Зарӕггӕнджыты къорды разамонӕгӕн. «Махалат»-ы зӕлтӕм гӕсгӕ. Давиды зондамонӕн псалом.

² Ӕнӕзонд дзуры йӕ мидзӕрдӕйы: «Хуыцау нӕй». Адӕм фехӕлдысты, ӕбуалгъ митыл бафтыдысты; хорз хъуыддаг аразӕг нал ис.

³ Хуыцау уӕларвӕй фӕлгӕсы адӕммӕ, кӕсы: цымӕ се ’хсӕн, Хуыцауы чи агуры, ахӕм иу ӕмбаргӕ адӕймаг ис?

⁴ Се ’ппӕт дӕр адзӕгъӕл сты, фехӕлдысты се ’ппӕт дӕр; хорздзинад ничиуал кӕны, иунӕг адӕймаг дӕр.

⁵ «Ау, не ’рӕмбардзысты фыдгӕнджытӕ, мӕ адӕмы мын дзулы хӕрд чи кӕны ӕмӕ Хуыцауы чи нӕ агуры, уыдон?»

⁶ Ӕппындӕр сын тас кӕм ницӕмӕй уыд, уым сыл ӕвиппайды ӕвирхъау тас ӕртыхсдзӕн. Хуыцау дын де знӕгты стджытӕ ныххӕлиу кӕндзӕн, фӕхудинаг сӕ кӕндзынӕ, уымӕн ӕмӕ сыл Хуыцау атигъ кӕндзӕн Йӕхи.

⁷ Тӕхуды ӕмӕ Израилӕн Сионӕй ирвӕзындзинад лӕвӕрд куы ’рцӕуид! Хуыцау Йӕ адӕмы уацарӕй куы раздаха, уӕд Йаков ныццин кӕндзӕни ӕмӕ Израил райдзӕни.