Псаломтӕ 37 - Осетинская Библия. Отдельные книги Ветхого Завета

¹ Давиды псалом. Зӕрдыл дарынӕн.

² Дунедарӕг, тызмӕгӕй мын ма уайдзӕф кӕн, Дӕ карзӕй мӕ ма ’фхӕр.

³ Дӕ фӕттӕ нынныхстысты мӕ буары, ӕруӕз мыл кодта Дӕ къух.

⁴ Дӕ азарӕй мӕ буарыл ӕгас бынат нал баззад; мӕ тӕригъӕдты фыдӕй ме стджыты рыст нал ӕнцайы.

⁵ Мӕ тӕригъӕдты аныгъуылдтӕн, сӕ уаргъ сын хӕссын нал фӕразын.

⁶ Ме ’нӕзонды аххосӕй сысмаг сты, хӕф кӕнынц мӕ цӕфтӕ.

⁷ Ныггуыбыр дӕн, ӕрлӕмӕгъ дӕн бынтондӕр, хъынцъымгӕнгӕйӕ арвитын мӕ бон.

⁸ Мӕ фӕрстӕ низӕй судзынц, ӕгас бынат нал ис мӕ буары.

⁹ Бастадтӕн, басасти мӕ хъару, зӕрдӕрыстӕй ныхъхъӕр кӕнын.

¹⁰ О Дунедарӕг, зоныс мын мӕ бӕллицтӕ, мӕ иу сулӕфт дӕр сусӕг нӕу Дӕуӕй.

¹¹ Мӕ зӕрдӕ ризы, батади мӕ хъару, мӕ цӕсты рухс мынӕг кӕны.

¹² Мӕ хӕлӕрттӕ ӕмӕ мӕ лымӕнтӕ иуварс лидзынц мӕ низӕй, мӕ хиуӕттӕ мӕм нал цӕуынц хӕстӕг.

¹³ Мӕн амарынмӕ чи бӕллы, уыдон мын ахсӕн хызтӕ сӕвӕрдтой. Ме сӕфтмӕ бӕллынц ӕмӕ мӕ ’лгъитынц, бон-изӕрмӕ сау фӕндтӕ нывӕндынц.

¹⁴ Фӕлӕ ӕз ницы хъусын, къуырмайау, фӕлӕ ӕз ницы дзурын гобийау.

¹⁵ Хъусӕй чи нӕ хъусы ӕмӕ дзуапп раттын чи нӕ фӕразы, уый хуызӕн сдӕн.

¹⁶ Уымӕн ӕмӕ, Дунедарӕг, Дӕуыл дарын мӕ зӕрдӕ; Дунедарӕг, мӕ Хуыцау, Ды мын дзуапп ратдзынӕ ӕнӕмӕнг.

¹⁷ Кувын ӕз: «Куы фӕцудон, мыййаг, уӕд мыл мӕ фыдгултӕ ма ферайӕнт, сӕрбӕрзондӕй мыл ма худӕнт».

¹⁸ Ӕрхауынӕввонг дӕн, мӕ рыст мӕ уӕгъд нӕ уадзы.

¹⁹ Мӕ азымыл сӕттын, мӕ тӕригъӕдыл фӕсмонӕй мӕлын.

²⁰ Мӕ фыдгултӕ та фидар кӕнынц сӕ царды, ӕнӕ ’фсонӕй ӕнӕуынон кӕмӕн дӕн, уыдон сбирӕ сты.

²¹ Мӕ хорз мын фидынц ӕвзӕрӕй, хорздзинад ракӕнынмӕ кӕй бӕллын, уымӕн.

²² О Дунедарӕг, мӕ Хуыцау, ма мӕ ныууадз, ма адард у мӕнӕй!

²³ Фӕтагъд мӕм кӕн ӕххуысмӕ, о, мӕ Дунедарӕг, мӕ Ирвӕзынгӕнӕг!