Псаломтӕ 32 - Осетинская Библия. Отдельные книги Ветхого Завета

¹ Цин кӕнут Дунедарӕгыл, рӕстудтӕ: Дунедарӕджы стауын фидауы рӕстудыл.

² Стаут Дунедарӕджы дыууадӕстӕноны зӕлтӕй, ӕрцӕгъдут Ын дӕстӕнонтыл.

³ Зарут Ын ног зарӕг, дӕсны йын ӕрцӕгъдут цины хъӕртимӕ.

⁴ Уымӕн ӕмӕ Дунедарӕджы ныхас ӕцӕг у, Йӕ хъуыддӕгтӕ иууылдӕр — раст.

⁵ Рӕстдзинад ӕмӕ раст тӕрхон Ын ӕхцон сты, Йӕ хорзӕхӕй йемыдзаг у зӕхх.

⁶ Дунедарӕджы ныхасӕй фӕзындысты уӕлӕрвтӕ, Йӕ комытӕфӕй — стъалыты ӕфсад.

⁷ Уый денджызы дӕттӕ ’рбамбырд кодта лалымау, ӕнӕбын хуыдымты бафснайдта дон.

⁸ Ӕгас зӕхх тӕрсӕд Дунедарӕгӕй, дун-дуне ӕмхуызонӕй ризӕд Йӕ разы.

⁹ Уымӕн ӕмӕ Уый загъта — ӕмӕ сӕххӕст ис; Уый бардзырд радта — ӕмӕ сси афтӕ.

¹⁰ Дунедарӕг фехалы адӕмты уынаффӕтӕ, сӕ фӕндтӕ сын ӕрбайсафы.

¹¹ Дунедарӕджы уынаффӕ та — ӕнустӕм, Йӕ зӕрдӕйы фӕндон — фӕлтӕрӕй фӕлтӕрмӕ.

¹² Тӕхудиаг сты уыцы адӕм, Дунедарӕг сӕ Хуыцау кӕмӕн у, Уый Йӕхицӕн исбонӕн кӕй равзӕрста.

¹³ Дунедарӕг уӕлӕрвтӕй кӕсы дӕлӕмӕ ӕмӕ алы адӕймаджы дӕр уыны.

¹⁴ Йӕ паддзахы бадӕнӕй фӕлгӕсы ӕппӕт зӕххон адӕммӕ.

¹⁵ Се ’ппӕты зӕрдӕтӕ дӕр Уый сфӕлдыста ӕмӕ алкӕмӕн дӕр зоны йӕ хъуыддӕгтӕ.

¹⁶ Паддзахы йе стыр ӕфсад нӕ фервӕзын кӕндзӕн, гуыппырсары нӕ бахъахъхъӕндзӕн йӕ хъомыс.

¹⁷ Бӕхыл зӕрдӕ дарӕн нӕй — хъару йӕм нӕй фервӕзын кӕнынӕн.

¹⁸ Дунедарӕг уыны, чи Дзы тӕрсы ӕмӕ Йӕ хорзӕхыл йӕ зӕрдӕ чи дары, уыдоны.

¹⁹ Уый сӕ фервӕзын кӕндзӕн мӕлӕтӕй, стонг заманы сӕ бафсаддзӕн.

²⁰ Дунедарӕг — нӕ зӕрдӕдарӕн, Уый у махӕн ӕххуыс ӕмӕ уарт.

²¹ Цин кӕнӕм Дунедарӕгыл, нӕ ныфсы мӕсыг — Йӕ уаз ном.

²² О Дунедарӕг, нӕ зӕрдӕ дыл дарӕм, ӕмӕ нӕ Дӕ хорзӕх уӕд.