Псаломтӕ 28 - Осетинская Библия. Отдельные книги Ветхого Завета

¹ Давиды псалом. Скад кӕнут Дунедарӕгӕн, Хуыцауы фырттӕ, Дунедарӕджы кад ӕмӕ хъомыс сыстаут!

² Скад кӕнут Дунедарӕджы номӕн, Дунедарӕгӕн бакувут Йӕ диссаджы рӕсугъд Кувӕндоны!

³ Дунедарӕджы хъӕлӕс денджызты сӕрмӕ ныййазӕлыд, цытджын Хуыцау ныннӕрыди, Дунедарӕджы хъӕлӕс бӕстӕ ныццарыдта дӕтты сӕрмӕ.

⁴ Дунедарӕджы хъӕлӕс — хъомысджын, Дунедарӕджы хъӕлӕс — стыр диссаг.

⁵ Дунедарӕджы хъӕлӕс кедртӕ акалы, ливайнаг кедртӕ афӕлдахы Дунедарӕг.

⁶ Ливаны хӕхтӕ фесхъиуынц уӕныгау, Сирионы хӕхтӕ — ӕвзонг дзӕбидыртау.

⁷ Дунедарӕджы хъӕлӕс арты цӕхӕртӕ рацӕгъды.

⁸ Дунедарӕджы хъӕлӕсӕй ӕдзӕрӕг быдыр нынкъуысыд, сӕнкъуысти ӕдзӕрӕг быдыр Кадеш.

⁹ Дунедарӕджы хъӕлӕсӕй тулдз бӕлӕстӕ ӕртасынц, сбӕгънӕг вӕййынц хъӕдтӕ; Йӕ Кувӕндонӕй хъуысы: «Кад Дын уӕд!»

¹⁰ Дунедарӕг доны хъаймӕты заман Йӕ паддзахы бадӕны бадти, Дунедарӕг ӕнусмӕ дӕр Йӕ паддзахы бадӕны баддзӕнис.

¹¹ Дунедарӕг ратдзӕни тых Йӕ адӕмӕн, Дунедарӕг Йӕ адӕмӕн фарн балӕвар кӕндзӕн.