Псаломтӕ 25 - Осетинская Библия. Отдельные книги Ветхого Завета

¹ Давиды псалом. О Дунедарӕг, раст тӕрхон мын рахӕсс, — мӕ цардвӕндаг ӕнӕкъӕм уыди Дӕ разы. Ӕз Дунедарӕгыл дарын мӕ зӕрдӕ ӕмӕ никуы фӕцуддзынӕн.

² О Дунедарӕг, бафӕлвар мӕ, мӕ зӕрдӕйы сусӕгтӕ мын басгар!

³ Дӕ хорзӕх мӕ цӕстыты раз ис ӕдзухдӕр, ӕмӕ цӕрын Де ’цӕгадмӕ гӕсгӕ.

⁴ Ӕз сайӕгойтимӕ ӕмдзӕхдон никуы уыдзынӕн, мӕнгӕрдтимӕ иу фӕндагыл нӕ ацӕудзынӕн.

⁵ Ӕнӕуынон мын у фыдгӕнджыты ӕмбырд, ӕнӕхуыцау адӕмимӕ не ’рбаддзынӕн.

⁶ Ӕназымы нысанӕн-иу ӕрӕхсдзынӕн мӕ къухтӕ, Дӕ нывондхӕссӕны алыварс-иу ӕрзилдзынӕн, о Дунедарӕг.

⁷ Стаудзынӕн дӕ хъӕрӕй, Дӕ диссаджы хабӕрттыл Дын дзурдзынӕн.

⁸ О Дунедарӕг! Ӕз бауарзтон Дӕ хӕдзар, Дӕ кады цӕрӕн!

⁹ Ма мӕ фесаф тӕригъӕдджынтимӕ, тугмондаг чи у, уыдонимӕ!

¹⁰ Сӕ къухтӕ сты фыдракӕндтӕм ӕмхиц, сӕ рахиз къухтӕ — йемыдзаг гӕртӕмттӕй.

¹¹ Ӕз та дӕн ӕнӕкъӕм, — батӕригъӕд мын кӕн, фыдбылызӕй мӕ бахиз!

¹² Раст фӕндагыл слӕууыдысты мӕ къӕхтӕ, ӕмбырдты Дунедарӕджы стаудзынӕн!