Псаломтӕ 24 - Осетинская Библия. Отдельные книги Ветхого Завета

¹ Давиды псалом. Дунедарӕг, Дӕуыл фӕдзӕхсын мӕхи.

² Мӕ Хуыцау! Дӕуыл дарын мӕ зӕрдӕ, уадз ӕмӕ ма фӕхудинаг уон, ма мыл фӕуӕлахиз уой ме знӕгтӕ.

³ Дӕуыл йӕ зӕрдӕ чи дары, уыдон нӕ фӕхудинаг уыдзысты; гадзрахатӕй чи цӕуы, уыдон ӕгады бынаты баззайдзысты.

⁴ Бацамон мын Дӕ фӕндӕгтӕ, сахуыр мӕ кӕн Дӕ цӕуӕнтыл.

⁵ Сараз мӕ Дӕ раст фӕндагыл ӕмӕ мӕ сахуыр кӕн, уымӕн ӕмӕ Ды дӕ, ирвӕзындзинад мын Чи радта, уыцы Хуыцау, ӕмӕ ӕрвылбон мӕ зӕрдӕ дарын Дӕуыл.

⁶ Ӕрхъуыды ма кӕн Дӕ хорзӕхтӕ, Де ’нусон хӕлардзинад.

⁷ Ме ’взонг бонты тӕригъӕдтӕ мын ма мыс, ӕрымыс мӕ Дӕ хорзӕхмӕ гӕсгӕ — Дӕ уарзты сӕраппонд, Дунедарӕг.

⁸ Дунедарӕг уарзӕгой ӕмӕ рӕстаг у, тӕригъӕдджынты раст фӕндагыл аразы,

⁹ мӕгуырты раст фӕндагмӕ здахы, Йӕ фӕндӕгтыл цӕуын сӕ ахуыр кӕны.

¹⁰ Дунедарӕджы цӕуӕнтӕ — уырнындзинад ӕмӕ рӕстдзинад, Йӕ фидыд ӕмӕ Йӕ фӕдзӕхстытыл Ын фидар чи хӕцы, уыдонӕн.

¹¹ Дунедарӕг, Дӕ номы сӕраппонд мын мӕ тӕригъӕд ныббар, кӕд цыфӕнды стыр у, уӕддӕр!

¹² Хуыцау, чи дзы тӕрсы, уыцы адӕймагӕн бацамондзӕн, цавӕр фӕндаг ӕй равзарын хъӕуы, уый.

¹³ Амондджынӕй цӕрдзӕн, йӕ байзӕддӕгтӕ зӕхх исбонӕн райсдзысты.

¹⁴ Дунедарӕгӕй чи тӕрсы, уыдонӕн раргом кӕны сусӕгдзинад, Йӕ фидыд сын фехъусын кӕны.

¹⁵ Ӕдзух мӕ цӕстӕнгас Дунедарӕгмӕ арӕзт у — мӕ къӕхтӕ мын Уый феуӕгъд кӕны къӕппӕгӕй.

¹⁶ Ӕркӕс мӕм, ныххатыр мын кӕн — ӕз иунӕг ӕмӕ ссӕст дӕн.

¹⁷ Мӕ хъизӕмӕрттӕй мӕ фервӕзын кӕн, уынгӕг ранӕй мӕ ракӕн.

¹⁸ Ӕркӕс-ма мын мӕ хъизӕмармӕ, мӕ удхармӕ, ныххатыр мын кӕн мӕ тӕригъӕдтӕ.

¹⁹ Ӕркӕс-ма, цас знӕгтӕ мын ис, куыд ӕнӕуынон сын дӕн, уымӕ.

²⁰ Мӕ цард мын бахъахъхъӕн, фервӕзын мӕ кӕн, уадз ӕмӕ, мӕ зӕрдӕ Дӕуыл кӕй дардтон, уый тыххӕй къӕмдзӕстыгӕй ма баззайон.

²¹ Дӕ рӕстдзинад, Дӕ сыгъдӕгдзинад мӕ хъахъхъӕнӕд, уымӕн ӕмӕ мӕ зӕрдӕ Дӕуыл дарын.

²² Хуыцау, Израилы йе ’ппӕт фыдбылызтӕй фервӕзын кӕн.