Псаломтӕ 23 - Осетинская Библия. Отдельные книги Ветхого Завета

¹ Давиды псалом. Зӕхх ӕмӕ йыл цыдӕриддӕр ис, уыдон, дун-дуне ӕнӕхъӕнӕй ӕмӕ йе ’ппӕт цӕрджытӕ Дунедарӕджы исбон сты.

² Денджызты сӕрмӕ ӕрӕвӕрдта зӕхх, дӕтты сӕрмӕ йӕ ’рфидар кодта.

³ Дунедарӕджы хохмӕ чи ссӕудзӕн, чи ӕрлӕудзӕн Йӕ уаз цӕрӕны?

⁴ Йӕ къухтӕ ӕнаххос, йӕ зӕрдӕ сыгъдӕг кӕмӕн у, мӕнг хуыцӕуттыл йӕ зӕрдӕ чи нӕ дардта ӕмӕ мӕнг ард чи нӕ хордта.

⁵ Ахӕм адӕймаг райсдзӕни Дунедарӕджы, йӕ Ирвӕзынгӕнӕджы арфӕ ӕмӕ хорзӕх.

⁶ Йаковы Хуыцау! Ахӕм у, Дӕу чи агуры ӕмӕ Дӕ разы ӕрлӕууын кӕй фӕнды уыцы адӕмы хъысмӕт.

⁷ Байгом у, кулдуар, байгом ут, ӕнусон дуӕрттӕ, уадз ӕмӕ кадджын Паддзах бацӕуа!

⁸ Ацы кадджын Паддзах чи у? Уый Дунедарӕг у, фидар ӕмӕ тыхджын, тохы та — хъомысджын.

⁹ Байгом у, кулдуар, байгом ут, ӕнусон дуӕрттӕ, уадз ӕмӕ кадджын Паддзах бацӕуа!

¹⁰ Ацы кадджын Паддзах чи у? Уый у Уӕларвӕфсады Бардарӕг, Уый у кадджын Паддзах.