Псаломтӕ 20 - Осетинская Библия. Отдельные книги Ветхого Завета

¹ Зарӕггӕнджыты къорды разамонӕгӕн. Давиды псалом.

² О Дунедарӕг! Дӕ хъаруйыл цин кӕны паддзах, йӕ зӕрдӕ райы Дӕ ирвӕзындзинадӕй!

³ Цӕмӕ бӕллыд, уый йын радтай, йӕ курдиатыл нӕ атигъ кодтай Дӕхи.

⁴ Схайджын ӕй кодтай Дӕ бирӕ арфӕтӕй, йӕ сӕрыл ын сыгъзӕрин кады худ ӕркодтай.

⁵ Уый Дӕуӕй куырдта цард, ӕмӕ йын Ды бирӕ цӕрӕнбон радтай ӕнусмӕ.

⁶ Дӕ ирвӕзындзинад ын ӕрхаста намыс, бӕрзонд ӕй систай, ӕмӕ ӕрттивы йӕ ном.

⁷ Арфӕгонд у Дӕуӕй ӕнусмӕ, Дӕ цӕсгомы рухсӕй райы йӕ зӕрдӕ.

⁸ Дунедарӕг паддзахӕн йӕ ныфс у, Бӕрзӕндтыл Бадӕджы хорзӕх ӕй ис, ӕмӕ нӕ фӕцуддзӕн.

⁹ Дӕ къухӕй нӕ аирвӕздзысты Де знӕгтӕ, Дӕ рахиз къух баххӕсдзӕни, ӕнӕуынон кӕмӕн Дӕ, уыдонмӕ.

¹⁰ Дӕ азары заман сӕ Ды судзгӕ пец фестын кӕндзынӕ. Дунедарӕджы маст сӕ фесафдзӕн, арты хай бауыдзысты.

¹¹ Ды сын зӕххы цъарӕй фесафдзынӕ сӕ байзӕддаджы, мыггагыскъуыд сӕ фӕкӕндзынӕ адӕмы ’хсӕн.

¹² Уыдон Дӕ ныхмӕ аразынц фыдвӕндтӕ, фӕлӕ ницы рауайдзӕн сӕ сау фӕндтӕй.

¹³ Ды сӕм ныхъхъавдзынӕ Дӕ фатӕй, ӕмӕ лидзӕг фӕуыдзысты.

¹⁴ О Дунедарӕг, Де стыр хъомыс сӕм равдис! Мах зардзыстӕм ӕмӕ кад кӕндзыстӕм Дӕ хъомысӕн!