Псаломтӕ 15 - Осетинская Библия. Отдельные книги Ветхого Завета

¹ Давиды зарӕг. Хъахъхъӕн мӕ, Дунедарӕг, уымӕн ӕмӕ Дӕуыл дарын мӕ зӕрдӕ!

² Ӕз загътон Дунедарӕгӕн: «Ӕрмӕстдӕр Ды — мӕ Бардарӕг, мӕ иунӕг фарн Ды дӕ!»

³ Зӕххыл Дын чи ис, Дӕ уыцы диссаджы сыгъдӕджытӕм, ӕз тырнын зӕрдиагӕй.

⁴ Ӕндӕр хуыцӕутты фӕдыл чи цӕуы, уыдон мастӕй цух ма уӕнт. Ӕз семӕ туджы нывӕндтӕ нӕ хӕсдзынӕн, ме ’взагыл сӕ хуыцӕутты нӕмттӕ нӕ уыдзысты.

⁵ Дунедарӕг! Ды — мӕ исбон, мӕ хъысмӕт. Дӕ къухы ис мӕ фидӕн.

⁶ Мӕнмӕ ӕрхауди диссаджы арӕнтӕ, ӕхцон мын у мӕ исбон!

⁷ Арфӕ ракӕндзынӕн Дунедарӕгӕн, раст зондыл мӕ чи ӕфтауы, Уымӕн. Йӕ зондамынд мӕ хъахъхъӕны ӕхсӕв дӕр!

⁸ Дунедарӕг мӕ цӕстыты раз ис ӕдзухдӕр, Уый мӕ рахизфарс ис — ӕз нӕ фӕцуддзынӕн.

⁹ Райы мӕ зӕрдӕ, мӕ былалгъыл — цин, суанг мӕ буар дӕр зӕрдӕдаргӕйӕ ӕрӕнцайдзӕн.

¹⁰ Уымӕн ӕмӕ Ды мӕн нӕ ныууадздзынӕ мӕрдтыбӕсты, Дӕ сыгъдӕджы нӕ бауадздзынӕ ӕмбийын.

¹¹ Ды мын бацамыдтай царды фӕндӕгтӕ: цинӕфсӕст уыдзынӕн Дӕ цӕсгомы раз, Дӕ рахиз къухы бын — ӕнусон амонд.