Псаломтӕ 149 - Осетинская Библия. Отдельные книги Ветхого Завета

¹ Алелуйа! Дунедарӕгӕн ног зарӕг зарут, кады зарӕг сыгъдӕджыты ӕмбырды.

² Цин кӕнӕд Израил йе Скӕнӕджы раз, райӕнт Сионы фырттӕ сӕ Паддзахы раз.

³ Кафтӕй Йын стаут Йӕ ном, зарут Ыл далатӕ ӕмӕ хъисфӕндырты цагъдимӕ.

⁴ Уымӕн ӕмӕ Дунедарӕг ауды Йӕ адӕмыл, скадджын кӕны сӕрныллӕгты, фервӕзын сӕ кӕны.

⁵ Райӕнт иузӕрдионтӕ кадимӕ, цин кӕнӕнт сӕ сынтӕджыты дӕр.

⁶ Хуыцауы стауӕн ныхас — сӕ былалгъыл, сӕ къухы — дыкомыг кард,

⁷ цӕмӕй адӕмты ӕмӕ алы знӕмты бафхӕрой;

⁸ сӕ паддзӕхты сын сбӕттой рӕхыстӕй, сӕ уӕздӕттыл сын хъадамантӕ бакӕной,

⁹ цы тӕрхон сын ныффыстӕуыди, уый сыл ӕрцӕуын кӕной. Уыцы кад ӕрхаудзӕн ӕрмӕстдӕр Йӕ иузӕрдионтӕм. Алелуйа!