Псаломтӕ 145 - Осетинская Библия. Отдельные книги Ветхого Завета

¹ Алелуйа! Ӕппӕл, мӕ уд, Дунедарӕгӕй!

² Цалынмӕ цӕрон, уӕдмӕ Дунедарӕджы стаудзынӕн; цалынмӕ удӕгас дӕн, уӕдмӕ мӕ Хуыцауы кадӕн зардзынӕн.

³ Уӕ зӕрдӕ ма дарут нӕдӕр хицӕуттыл, нӕдӕр адӕймагыл — уый уын ирвӕзындзинад не ’рхӕсдзӕн.

⁴ Уый йӕ уд сисы ӕмӕ сыджытыл бафты, уыцы бон йемӕ ӕрбайсӕфынц йе ’ппӕт фӕндтӕ.

⁵ Тӕхудиаг у, Йаковы Хуыцау кӕмӕн ӕххуыс кӕны, Дунедарӕгыл, йӕ Хуыцауыл, йӕ зӕрдӕ чи дары.

⁶ Арв, зӕхх, денджыз ӕмӕ сӕ цыдӕриддӕр ис, уыдон Уый сфӕлдыста. Уый ӕнустӕм иузӕрдион у.

⁷ Уый рахӕцы ӕфхӕрды сӕрыл, ӕххормагӕн дзул ратты, суӕгъд кӕны ахӕсты.

⁸ Дунедарӕг куырмытӕн ратты цӕстырухс, Дунедарӕг ӕфхӕрд адӕмы слӕууын кӕны сӕ къӕхтыл, Дунедарӕг уарзы рӕстудты.

⁹ Дунедарӕг ауды ӕрцӕуӕггагыл, Йӕ арм дары сидзӕр ӕмӕ идӕдзыл, ӕнӕхуыцауӕн та йӕ фӕндӕгтӕ ныссуйтӕ кӕны

¹⁰ О Сион! Дунедарӕг, дӕ Хуыцау паддзахиуӕг кӕндзӕни мыггагӕй-мыггагмӕ, фӕлтӕрӕй фӕлтӕрмӕ. Алелуйа!