Псаломтӕ 142 - Осетинская Библия. Отдельные книги Ветхого Завета

¹ Давиды псалом. О Дунедарӕг, фехъус мын мӕ куывд, ӕрдар Дӕ хъус мӕ лӕгъстӕмӕ, ӕнӕ дзуаппӕй мӕ ма ныууадз: Ды иузӕрдыг ӕмӕ рӕстаг дӕ!

² Дӕ цагъаримӕ ма ӕрлӕуу тӕрхоны — кӕй бон у сраст кӕнын йӕхи Дӕ разы?

³ Мӕ фӕдыл сагъуыди знаг ӕмӕ мӕ ссӕнды, раджы чи амарди, уый хуызӕн мӕ талынгмӕ ӕппары.

⁴ Мӕ уд мӕ мидӕг бастади, мӕ зӕрдӕ бандзыг ис.

⁵ Ӕрымысыдтӕн незамантӕ ӕз, мӕ хъуыдыйы Дӕ алы хъуыддаг дарын, дис кӕнын Дӕ къухты скондыл.

⁶ Мӕ цӕнгтӕ ивазын Дӕумӕ, донхъуаг зӕххау Дӕм тырны мӕ уд.

⁷ О Дунедарӕг, ратт мын тагъддӕр дзуапп: баруади мӕ уд мӕ мидӕг! Дӕ цӕсгом ма ӕмбӕхс мӕнӕй, цӕмӕй ӕз ма уон ингӕнмӕ цӕуӕгау.

⁸ Сӕумӕйӕ мын Дӕ хорзӕх равдис — Дӕуыл дарын мӕ зӕрдӕ. Ды сараз раст фӕндагыл мӕн — Дӕумӕ тырны мӕ уд.

⁹ О Дунедарӕг, фервӕзын мӕ кӕн знӕгтӕй, ӕххуысагур Дӕумӕ сидын.

¹⁰ Дӕ фӕндон ӕххӕст кӕнын мӕ сахуыр кӕн — Ды мӕ Хуыцау дӕ. Дӕ фарн хӕссӕг Уд мӕ раст фӕндагыл кӕнӕд!

¹¹ Дӕ номы сӕраппонд мӕ райгас кӕн, о Дунедарӕг, рӕстаг дӕ Ды, фыдбылызӕй мӕ фервӕзын кӕн.

¹² Дӕ хорзӕхмӕ гӕсгӕ ме знӕгтӕн скӕн кӕрон, бабын мын кӕн мӕ фыдгулты, уымӕн ӕмӕ ӕз Дӕ цагъар дӕн.