Псаломтӕ 129 - Осетинская Библия. Отдельные книги Ветхого Завета

¹ Уӕлвонг Кувӕндонмӕ цӕуджыты зарӕг. Дунедарӕг! Дзыназын Дӕм уынгӕг ранӕй!

² Дунедарӕг! Фехъус мын мӕ хъӕлӕс, ӕрыхъус мын мӕ куывдмӕ.

³ Дунедарӕг! Ды нын нӕ тӕригъӕдтӕм куы кӕсай, уӕд чи бафӕраздзӕн!

⁴ Фӕлӕ Ды хатыргӕнаг дӕ — уадз ӕмӕ Дын аргъуц кӕной.

⁵ Дунедарӕгыл дарын мӕ зӕрдӕ, ӕнхъӕлмӕ кӕсы мӕ уд, Йӕ ныхасыл мӕ зӕрдӕ дарын.

⁶ Хъахъхъӕнӕг сӕуӕхсидмӕ афтӕ не ’нхъӕлмӕ кӕсы, ӕз Дунедарӕгмӕ куыд кӕсын ӕнхъӕлмӕ.

⁷ Израил йӕ зӕрдӕ дарӕд Дунедарӕгыл, уымӕн ӕмӕ Дунедарӕг хатыргӕнаг у, Йӕ бон у фервӕзын кӕнын.

⁸ Уый фервӕзын кӕндзӕн Израилы йе ’ппӕт тӕригъӕдтӕй.