Псаломтӕ 103 - Осетинская Библия. Отдельные книги Ветхого Завета

¹ Арфӕ ракӕн, мӕ уд, Дунедарӕгӕн! Дунедарӕг, мӕ Хуыцау, стыр дӕ Ды! Кад ӕмӕ стырад — Дӕ фӕлыст.

² Рухсӕй Дӕхи сфӕлыстай дарӕсау ӕмӕ арв айтыгътай цатырау,

³ дӕттӕн сӕ сӕрмӕ ӕрцарӕзтай галуантӕ. Ӕврагъ — Дӕ уӕрдон, дымгӕйы базыртыл тӕхыс.

⁴ Дымгӕтау скӕныс Дӕ зӕдты, зынг ӕмӕ артау — Дӕ лӕггадгӕнджыты.

⁵ Фидар бындурыл ӕрӕвӕрдтай зӕхх ӕмӕ йӕ бынатӕй никуы фӕиртӕсдзӕн.

⁶ Дарӕсау ӕй ӕрӕмбӕрзтай дӕттӕй ӕмӕ уыдон хӕхтӕй фӕуӕлдӕр сты.

⁷ Фӕлӕ дӕ хъӕрӕй згъорынмӕ фесты, лидзынц дӕттӕ Дӕ ныннӕрдӕй.

⁸ Азгъордтой хӕхтыл, ӕркалдысты фӕзмӕ — Ды сын цы бынат снысан кодтай, уырдӕм.

⁹ Ды уыдонӕн арӕнтӕ скодтай ӕмӕ сын нӕй ахизӕн сӕ сӕрты, цӕмӕй зӕхх мауал фӕдӕлдон кӕной.

¹⁰ Суадӕттӕ ауадзыс дӕлвӕзты ӕмӕ атындзынц хӕхты ’хсӕнты.

¹¹ Ӕфсадынц донӕй ӕппӕт быдираг сырдты, хъӕддаг хӕрӕг суадзы йӕ дойны.

¹² Донбылтыл цӕрынц уӕларвон мӕргътӕ, сыфтӕрты ’хсӕнӕй хъуысы сӕ зарын.

¹³ Ды Дӕ бӕрзӕндӕй донхорыг кӕныс хӕхтӕ, зӕхх дӕр Дӕ фӕрцы у ӕфсӕст.

¹⁴ Кӕрдӕг ӕрзайын кӕныс фосӕн, зайӕгхӕлттӕ — адӕмы пайдайӕн, цӕмӕй зӕххӕй амал кӕной хойраг:

¹⁵ адӕймаджы зӕрдӕ хъӕлдзӕггӕнӕг сӕн, стӕй сой, йӕ цӕсгом цӕхӕр кӕмӕй калы; адӕймагӕн хъару дӕттӕг дзул.

¹⁶ Донӕфсӕст сты Дунедарӕджы бӕлӕстӕ, ливайнаг кедртӕ — Йӕхӕдӕг кӕй ныссагъта, уыдон.

¹⁷ Мӕргътӕ сыл ахстӕттӕ кӕнынц, нӕзытыл ӕрбынат кӕнынц къадзтӕ.

¹⁸ Хӕхты рӕгътӕ — сычъиты цӕрӕн, къӕдзӕхты скъуыдтӕ — даманы бынат.

¹⁹ Ды сфӕлдыстай мӕй, цӕмӕй рӕстӕг ӕвдиса, хурӕн бӕлвырд у йӕ ныгуылӕн афон.

²⁰ Айтындзыс талынг — ӕрлӕууы ӕхсӕв, хъӕддаг сырдтӕ рацӕуынц сӕ бынӕттӕй.

²¹ Цуангӕнӕг домбӕйттӕ рыхынц — амӕттаг курынц Хуыцауӕй.

²² Хур куы скӕса, уӕд сӕхи айсдзысты, схуысдзысты сӕ хуыккомы.

²³ Адӕймаг йӕ куысты сӕр ӕрлӕууы ӕмӕ изӕрмилтӕм йӕ астӕу нӕ раст кӕны.

²⁴ Куыд бирӕ сты, Дунедарӕг, Дӕ хъуыддӕгтӕ, ӕппӕтдӕр сфӕлдыстай Дӕ уӕлзонды фӕрцы! Дӕ фӕлдисӕндтӕй йемыдзаг у зӕхх.

²⁵ Уый дын мӕнӕ стыр ӕмӕ ӕгӕрон денджыз, йӕ мидӕг нымӕц дӕр нӕй змӕлӕгойтӕн, стыр ӕмӕ гыццыл цӕрӕгойтӕн.

²⁶ Уым наутӕ дыууӕрдӕм кӕнынц, уым Де сфӕлдыст Левиафан хъазы йӕхицӕн.

²⁷ Се ’ппӕтӕн дӕр сӕ каст Дӕумӕ у — цӕмӕй сын афоныл радтай хӕринаг.

²⁸ Ды сын дӕттыс ӕмӕ уыдон хӕрынц, байгом кӕныс Дӕ арм ӕмӕ уыдон бафсӕдынц.

²⁹ Де ’ргом сӕ куы аздахыс, уӕд схъомпал вӕййынц. Сӕ комулӕфт сын куы айсыс, уӕд ӕрбамӕлынц ӕмӕ та ногӕй сыджыт фестынц.

³⁰ Дӕ Уд куы рарвитыс, уӕд сӕвзӕрынц. Афтӕ Ды сног кӕныс Зӕххы уӕлцъар.

³¹ Кад уӕд Дунедарӕгӕн мыггагмӕ! Райӕд Йӕ фӕлдисӕндтӕй!

³² Уый ӕркӕсы зӕхмӕ ӕмӕ зӕхх нырризы. Хӕхтӕм фӕцагайы ӕмӕ сӕ фӕздӕг скӕлы.

³³ Дунедарӕгыл зардзынӕн, цалынмӕ цӕрон, уӕдмӕ, мӕ Хуыцауы стаудзынӕн, цалынмӕ удӕгас дӕн, уӕдмӕ.

³⁴ Мӕ зарӕг Ын уӕд ӕхцон, ӕз цин кӕндзынӕн Дунедарӕгыл.

³⁵ Тӕригъӕдджынтӕ фесӕфӕнт зӕххӕй, мауал фӕзынӕнт ӕнаккӕгтӕ! Дунедарӕгӕн арфӕ ракӕн, мӕ уд! Алелуйа!