Павелонь сёрмац Филимононди 1 - Од Соткс Новый Завет на мордовском-мокша языке 2016

Шумбракстомась

¹ Павел, Иисус Христость инкса пякстафсь, и Тимофей кемай ялгась, кучихть пара вал марстонь тевонь тиити, кельгома Филимонти,

² и кемаень пуромксти, кона пуромкшни тонь кудсот, и тяконь лаца Апфияти, кельгома кемай сазороньконди, и Архиппонди, марстонь тевса покодити.

³ Арьсетяма тейнть пароказне и сетьмоши Шкай Аляньконь и Иисус Христос Азорть эзда!

Филимононь кемамац и кельгомац

⁴ Мон озондомста фалу сюконян Шкаезти тонь инксот,

⁵ сяс мес кулян тонь кемамацень колга Иисус Азорти и кельгомацень колга Тейнза и сембе Шкаень ломаттненди.

⁶ Мон озондан, катк марстонь кемаманьке лезды тейть сяда крхкаста содамс-шарьхкодемс сембе ся пароть, кона максф тейнек Христос Иисусонь эзда.

⁷ Кемай ялгай, тонь кельгомаце пяк кеняртьфтемань и кемокстамань монь, сяс мес тонь вельдет ваймясть-кемокстасть Шкаень ломаттнень седисна.

Павел эняльди Онисимонь инкса

⁸ Сяс, хуш монь и ули Христость эзда виезе кошардомс тонь тиемс сянь, мезе эряви,

⁹ сяка сяда цебярькс лувса пшкядемс тейть эняльдема мархта, сяс мес келькте тонь. Аф кие лия, монць, сире Павелсь, а тяни нинге Иисус Христосонь инкса пякстафсь,

¹⁰ эняльдян тейть Онисимонь инкса, кона монь вельден кармась кемама Шкайти, и стане жа арась тейне цёракс тяса, коса мон пякстафан.

¹¹ Мзярда-бди сон ульсь тейть лезксонь аф канды ломанькс, но тяни сон арась лезксонь кандыкс и тейть и тейне. Мон мрдафтса сонь тейть.

¹² А тон васьфтьк сонь, кода монь седибялькскязень.

¹³ Монь мялезель кирдемс сонь эсь вакссон: тонь вастозт лездоль тейне тяса, коса мон пякстафан Пара кулять пачфнеманкса.

¹⁴ Но тонь апак кизефтть монь ашель мялезе мезевок тиемс, катк тонь пара тевце ули тиф аф вихца, а эсь мяльцень коряс.

¹⁵ Шять, пефтома пингс тонь мархтот улеманкса Онисим и аертфоль тонь эздот аф ламос.

¹⁶ Тяни сон тейть ули аф кода ни уре ломань, а уреть коряс сяда питникс, кода кельгома кемай ялга. Сон тейне пяк кельговикс, а конашкава кельговикс эста сон ули тейть, кода ломань и кода Азорти кемай ялга.

¹⁷ Эрь ина, кда лувсамак монь марстонь тевонь тии ялгакс, эста васьфтьк Онисимонь стане, кода васьфтелемайть монь.

¹⁸ Кда сон мезьса-бди обжанзе тонь али шуму ингольдет, лувк тянь монь мельган.

¹⁹ Мон, Павел, сёрмадан эсь кядьсон: мон пандса. Мон ни аф корхтан сянь колга, конашкава тон шумуват монь инголен, прянек-мезнек шумуват!

²⁰ Сяс, кемай ялгай, макск тейне тя лезксть Азорть инкса, Азорть инкса ваймафтк-кемокстак монь седиезень.

²¹ Мон сёрмадан тейть надиязь тонь кулхцондомацень лангс, и содаса, тон тият мянь вельф монь эняльдемазень коряс.

²² Сяка пингть аноклак тейне лоткама васта, сяс мес надиян: озондомантень вельде улян казьф тейнть.

Мекольце валхне

²³ Пара вал пачфтихть тейть Епафрас, кона монь мархтон пякстаф Христос Иисусть инкса,

²⁴ тяфта жа монь мархтон марстонь тевонь тиихне – Марк, Аристарх, Димас, Лука.

²⁵ Иисус Христос Азороньконь пароказнец улеза тинь ваймопожфонтень мархта! Аминь.