Пёторонь васенце сёрмац 5 - Од Соткс Новый Завет на мордовском-мокша языке 2016

Тонафтомат кемаень пуромксонь оцюнятненди

¹ Тяни мон пшкядян кемаень пуромксонь оцюнянтенди: монга лацост кемаень пуромксонь оцюнян и эсь сельмосон няине Христость маятаманзон и Сонь мархтонза явса ся иневалдть, кона эвондай эсь пингстонза. Мон эняльдян тейнть:

² ванода Шкайть стаданц мельге, кона максф тейнть. Ванода сонь мельганза седи ваксста, оцю мяльса, кода кельгсы Шкайсь, но аф сянкса, мес тинь кошардодязь тянди, и аф казненкса.

³ Тяда азоронда тейнть максф ломаттнень лангса, но уледа тейст цебярь кепотьксокс.

⁴ И мзярда сай Инь Оцю Ванысь, эста тейнть максови иневалдонь аф пужи каштазсь.

⁵ Тиньге, од ломатть, уледа кулхцондыкс кемаень пуромксонь оцюнянтенди. И тинь сембе, кулхцондомок фкя-фкянь, киньге инголе тяда оцюлгофне пря, сяс мес Шкайсь ащи каршек прянь няихненди, а сятяв ваймотненди максси пароказне.

⁶ Сяс сятявста максость прянтень Шкайть виидонга вии кядянзон алу, и Шкайсь эсь пингстонза кепоттядязь тинь.

⁷ Сембе пичефксонтень веляфтость лангозонза, сяс мес Сон пичеди-канзеди тинь инксонт.

⁸ Уледа сргозьфт и фалу анокт, сяс мес тинь душманонте, идемэвозсь, якай вакссонт, кода уркоды лев, кона вешенди кинь сивомс.

⁹ Уледа кемот эсь кемамасонт и стяда идемэвозти каршек. Тинь содасасть: тяфтама маятамат кирдихть тинь кемай ялгантевок сембе масторга.

¹⁰ Но тейнть аф ламос сави маятакшнемс. Маятамдонт меле Шкайсь стяфттядязь тинь, титядязь тинь афсатыксфтомокс, кемокстатядязь и максы тейнть вийхть. Эрь кодама пароказнень максы Шкайсь тердедязь тинь Христость вельде Эсь пефтома пингонь иневалдозонза.

¹¹ Шнама Тейнза и азорксши сембе пингс! Аминь.

Мекольце валхне

¹² Тя нюрьхкяня сёрмать мон сёрмадыне Силуанонь, кемай ялгазень вельде, конань лангс ули кода надиямс. Монь мялезе кеподемс тинь мялентень и кемокстамс тинь: ся пароказнесь, конаса тинь ащетяда, афкукс Шкайть эзда.

¹³ Пара вал кучи тейнть монь цёразе Марк и тинцень лацонт Шкайса кочкаф кемаень пуромкссь, кона Вавилонца.

¹⁴ Шумбракснеда фкя-фкянь мархта кельгомань паламаса. Сетьмоши сембонди тейнть, кит Христос Иисуссот! Аминь.