Пёторонь васенце сёрмац 4 - Од Соткс Новый Завет на мордовском-мокша языке 2016

Шкайть мархта од эряф

¹ Кода Христоссь кирдсь ронгонь маятамат, стане тиньге уледа анокт тянди, вдь ся, кие кирди маятамат эсь ронгонц лангса, лоткай пежень тиендемда.

² И сяс лядыкс масторлангонь эряфонц сон ётафтсы аф ломанень визькс мяльхнень-арьсематнень коряс, а Шкайть мяленц коряс.

³ Ингольдень пингть тинь ни сатомшка эряде, кода Шкаень аф содай ломатть: тинь макссесть прянтень эрь кодама аф арушис, визькс мяльхненди (алятне аля мархта удомас, жувата мархта удомас, рдазу мяльс-арьсемас), тинь уледе симилакс, пекта вельф тетькикс и сюконякшнеде аф афкуксонь шкайхненди.

⁴ Сяс тяни, мзярда тинь оду аф тиенттяда Шкаень аф содайхнень мархта визьксонь тефт, синь дивандакшнихть тянди и сялдыхть эсонт кальдяв валса.

⁵ Но тейст сави панжемс эсь тевснон Сянь инголе, кие анок судендамс эряйхнень и кулофнень.

⁶ Сяс Пара кулясь пачфтьфоль кулофнендивок вага мес: эряльхть синь Шкайть мяленц коряс ваймопожфса, хуш синь ронгсна, кода лия ломаттнень ронгсновок, судендафтольхть куломас.

⁷ Курок семботи сай пе. Сяс уледа смузю мяльса и валда пряса, и эста ульхтяда анокт озондомати.

⁸ Васенда, седи ваксста кельгода фкя-фкянь, сяс мес кельгомась вельхтяй лама пеже.

⁹ Уледа инжиень кельгикс, и тяда кропця лангозост.

¹⁰ Катк эрсь тинь эздонт покоди-лезды фкя-фкянди ся казнеса, конань тейнза максозе Шкайсь. Эста тинь, кода цебярь покодихне, видеста нолдасасть тевс Шкайть эрь кодама пароказненц.

¹¹ Кда кие корхтай, катк сянь валонза кайгихть кода Шкайть валонза. Кда кие покоди-лезды, ся катк покоди-лезды ся вийса, конань тейнза макссесы Шкайсь. Катк сембонь тянь эса шнави Шкайсь Иисус Христость вельде. Тейнза шнама и азорксши сембе пингс! Аминь.

Маятамат Христости кемамать инкса

¹² Монь кельгомне, тяда диванда, мес тейнть сави ётамс толонь варчсематнень пачк; тянь эса аш мезевок дивандафты.

¹³ Меколанкт, кеняртькшнеда, мес тиньге явсасть Христость мархта марса Сонь маятаманзон. И мзярда панжеви Сонь иневалдоц, эста тинь карматада кеняртькшнема оцю кенярдемаса.

¹⁴ Кда тинь сялттядязь Христость лемонц инкса, эста тинь павазуфтада, сяс мес Иневалдонь Ваймопожфсь, лиякс мярьгомс, Шкайть Ваймопожфоц ащи тинь вельхксонт. Сят Сонь сялдсазь, а тинь Сонь шнасасть.

¹⁵ Кда кие тинь эздонт кирди маятамат эсь лангсонза, катк тя ули аф сянкса, мес сон ломанень шави али салай, али нинге кодама кальдяв тевонь тии, али кода ся, кие эсь шалхконц эцекшнесы лиянь тевс.

¹⁶ А кда кивок эздонт кирди маятамат сяс, мес сон христианин, ся катк тянкса аф визди, а шнасы Шкайть сянкса, мес тейнза максф каннемс тя лемть.

¹⁷ Шкаень судть пингоц сась ни, и васенцекс судендавихть Сонь ломаненза. Арьседова, кда минь эздонк ушеды судендамась, эста кодама пе сатсыне сятнень, конат аф кулхцондсазь Шкайть Пара кулянц?

¹⁸ Кода сёрматф: «Кда видексшинь ломанти ули стака идевомс, сяльде мезе ули пежуфнень мархта и сятнень мархта, конат мезькска аф лувсазь Шкайть?»

¹⁹ Сяс сят, конат кирдихть маятамат Шкайть мяленц коряс, катк макссазь эсь пряснон Тииеньконь кядьс, и сяда товга аф лотксихть пара тевонь тиендемс.