Пёторонь васенце сёрмац 2 - Од Соткс Новый Завет на мордовском-мокша языке 2016

¹ Сяс, кадость эрь кодама кяжть, васькафнемать, шамафксонь каннемать, сельмонь каямать и эрь кодама кяжи корхтафтомать.

² Потяй иднятнень лаца вешендеда ярхцамс ару, ваймопожфонь лофцта, лиякс мярьгомс, Шкаень валда, конань вийса тинь кастада и пачкоттяда идемати.

³ Вдь тинь варжасть-няесть, конашкава пара Шкайсь.

Уледа кода эряй кефт

⁴ Сада Тейнза. Сон эряфонь максы кев, конань ломаттне ёрдазь, но конань Шкайсь кочказе и лувозе питникс.

⁵ Тиньге, кода эряй кефне, тиевода ваймопожфонь кудкс. Эста тинь ульхтяда иняру озксвятиень оцюнякс и карматада каннема Шкайти ваймопожфонь озксказнет, конат тушендыхть Сонь мялезонза Иисус Христосонь инкса.

⁶ Сёрматфксса азф: «Вага, Мон Сионца путса кочкаф и питнидонга питни кевть, кудужень кирди кевть. И ся, кие кемай Тейнза, мзярдонга аф прай визькс шамас».

⁷ Тейнть, кемайхненди, тя кевсь – питнидонга питни, а сятненди, кит аф кемайхть, «тя кев, конань ёрдазь кудонь путыхне, но кона арась кудужень кирди кевкс; кев, конань ланга ломаттне пупоряйхть и прашендыхть».

⁸ Синь пупоряйхть сяс, мес аф кулхцондсазь Шкайть валонц. Тяфта тейст инголькиге ладяфоль.

⁹ Но тинь – кочкаф юромсь, Оцязорть озксвятиень оцюнянза, иняру ломаньтналсь, ломаттне, конатнень Шкайсь лувсыне Эсеннекс. Тинь тертьфтяда пачфнемс Сянь пара тевонзон колга, кие лихтедязь тинь шобдаста Эсь мазыдонга мазы валдозонза.

¹⁰ Инголи тинь уледе аф ломаньтналкс, а тяни тинь араде Шкаень ломаньтналкс. Инголи Сон ашезе эвондакшне тейнть Эсь кельгозь ужяльдеманц, а тяни максозе сонь тейнть.

Христосонь ломанти вешфксне

¹¹ Кельгома ялгат, эняльдян тейнть, кода нюрьхкяня пингонди лия масторста сафненди, тяда вятнев ронгть визькс мялензон-арьсеманзон мельге, конат молихть ваймонтень каршек.

¹² Шкаень аф содайхнень ёткса эряда цебярь тевонь тиендезь. Эста сятка, конат сялдыхть эсонт, кода кальдяв тевонь тиихнень, няемок тинь пара тевонтень, шнасазь Шкайть ся шиста, мзярда Сон эвондасы тейст Эсь прянц.

¹³ Азорть инкса уледа кулхцондыкс масторлангонь сембе оцюнятненди: оцязорти, сяс мес сон сембонь лангса азор,

¹⁴ тяконь лаца лия оцюнятнендиге, конатнень сон кучезень наказамс кальдяв тевонь тиихнень и шнамс цебярь тевонь тиихнень.

¹⁵ Шкайть мялец тяфтама: тинь, пара тевонь тиендезь, лоткафтолесть аф шарьхкоди ломаттнень ёньфтома корхтамаснон.

¹⁶ Эряда воляшиса, аньцек тяза уле тя воляшись тейнть кальдяв тевонь кяшема вастокс, а меколанкт, эряда кода Шкайть покодиенза.

¹⁷ Сембе ломаттнень лувость питникс Шкайть сельмоса, кельгость кемай ялгантень, пеледа Шкайда, оцязорть путнесть пара лувксс.

Уледа кулхцондыкс азоронтенди

¹⁸ Покодихть, уледа кулхцондыкс эсь азоронтенди, сембоса путнемок синь пара лувксс. Уледа кулхцондыкс аф аньцек сятненди, конат пара и ляпе седихть, но сятнендиге, конат кяжихть.

¹⁹ Вдь Шкайть мялезонза, кда кивок, улемок кулхцондыкс Шкайти, кирди маятамат, хуш мезевок кальдяв афи тись.

²⁰ Мезенкса тинь шнамс, кда тинь кирттяда пикссемат кальдяв тевонкса? А кда тинь кирттяда лама маятама пара тевонь тиеманкса, тя тушенды Шкайть мяльс.

²¹ Тинь тянди уледе тертьфт, сяс мес Христосовок минь инксонк маятась, и тянь эса няфтсь тейнек кепотькс: миньге молелеме Сонь мельганза.

²² «Сон ашезь тие кодамовок пеже, и Сонь кургстонза ашезь лисе фкявок васькафнемань вал».

²³ Мзярда Сонь сялдозь, Сон фкявок сялды вал ашезь аза каршек; мзярда маятась, Сон ашезень эвфне синь, но максозе Эсь прянц Шкайти, виде Судьяти.

²⁴ Сон Сонць Эсь ронгсонза кеподезень минь пеженьконь крёз лангс вов мезенкса: кадомок пеженьконь, эрялеме видексшить коряс. Сонь сярятьфксонзон-аржензон вельде тинь уледе пчкафтфт.

²⁵ Мзярда-бди тинь уледе кода эрьготьф учат, но тяни мрдаде эсь Ваныентенди, ваймонтень Ванфтыснонды.