Павелонь сёрмац Титонди 2 - Од Соткс Новый Завет на мордовском-мокша языке 2016

Шумбра тонафтомась

¹ Тон жа корхтак сянь, мезсь фкя мяльса ащи шумбра тонафтомать мархта.

² Тонафтт сире алятненди улемс кятавкс сембоса, ащемс пара лувксса ломаттнень инголе, шумбра-ару мяльса эряйкс, шумбраста кемайкс, кельгикс и сталмонь кирдикс.

³ Тяфта жа сире аватнендивок прясна эряви вятемс кода ладяй иняруфненди, аф васькафнемс ломанень лангс, аф прафтомс симомати, а тонафнемс парошити.

⁴ Тяфта синь тонафтсазь од аватнень кельгомс эсь мирдьснон и идьснон,

⁵ шумбра-ару мяльса и арушиса эрямс, эсь кудботмонь тевснон вятемс, улемс пара ломанькс и кулхцондомс эсь мирдьснон. Эста Шкаень валсь аф сялдови.

⁶ Тяфта жа од цёратнендиге корхтак ёню-шумбра прянь вятемать колга.

⁷ И тонць ульхть кепотьксокс эрь кодама пара тевса. Катк тонь тонафтомаце ули ару, шнаф и аф гастяф,

⁸ и корхтамацевок улеза шумбра и аф сялдови. Эста эрь каршек молись ули визделготф, сяс мес аф азови колганк мезевок кальдяв.

⁹ Уретнень тонафтыть кулхцондомс азорснон, сембоса ваномс синь мяльснон, каршек тейст аф корхтамс

¹⁰ и аф салсемс. Меколанкт, катк сембоса няфнесазь эсь пряснон цебярь и валонь кирди урекс. Катк семботь тиендьсазь тянь лаца, эста синь тевснон вельде мазолгофтови Шкайть, минь Идиеньконь, тонафтомац.

Шкаень пароказнесь канды идема

¹¹ Вдь эвондась Шкаень пароказнесь, кона канды идема сембе ломаттненди.

¹² Тя пароказнесь тонафты эсонк кадомс шкайфтома эряфть, масторлангонь пежу мяльхнень-арьсематнень и ётафтомс тяниень пингонь эряфть шумбра-ару мяльса, видексшиса и Шкайть мяленц ванозь.

¹³ Минь учендсаськ павазу надиямать пяшкодеманц, инь оцю Шкайть и минь Идиеньконь Иисус Христость иневалдонц саманц.

¹⁴ Сон максозе прянц инксонк и тяфта идемазь сембе пежетнень эзда, аруяфтомазь и тиемазь минь Эстейнза ломаньтналкс, кона ваймонь путозь ёрай тиемс пара.

¹⁵ Тянь колга корхтак, кемокстак и няфнек аф виде тефнень лангс, ся азорксшиса, кона максф тейть, и катк кивок аф ваны лангозт вярде алу.